Yoluxucu xəstəliklər həmişə dünyada tibbi problemlərdən biri kimi özünü göstərib. Bu xəstəlikləri törədən virus və bakteriyalar orqanizmə hava-damcı, su və qida vasitəsilə, xəstə insanların əşyalarından istifadə etməklə daxil olur.
Son həftələr ölkəmizdə də əhali arasında, yüksək yoluxma riskinə malik xəstəliklərə, suçiçəyinə və Hepatit A-ya yoluxanların sayında artım müşahidə olunur.
Peyvəndləmə zəruridir
Həkim-infeksionist Aydan Sevizadə deyir ki, suçiçəyi, Hepatit A və qızılca ilə bağlı müraciət edən xəstələrin sayı artıb: "Onların arasında uşaqlar çoxluq təşkil edir. Bunun bir səbəbi payız və qış mövsümündə yuxarı tənəffüs yolu infeksiyalarının geniş yayılmasıdır. Digər önəmli səbəb isə odur ki, orqanizmin immun sistemi zəiflədiyi zaman yoluxucu xəstəliklərə qarşı müqavimət azalır. Uşaq orqanizmi daha zəif olduğu üçün onlarda qızılca və suçiçəyi kimi infeksiyalara yoluxma riski də çox olur".
A.Sevizadə bildirir ki, qızılcanın geniş yayılmasının qarşısını almaq üçün peyvəndləmənin aparılması zəruridir: "Milli peyvənd təqviminə görə uşaqlar arasında 2 doza vaksinləmə aparılır: 12-18-ci ayında və 4-6 yaşarası. Peyvənd olunan uşaqlarda yoluxma riski çox aşağıdır, digərlərinin əksinə olaraq onlar təhlükə altında deyillər. Belə ki, peyvənd olunmayan hər 10 uşaqdan 8-nin qızılcaya yoluxma riski var".
Həkim-infeksionist deyir ki, qızılca və suçiçəyində xüsusi müalicə tətbiq edilmir: "Xəstələrə yataq rejimi və bol maye qəbulunu tövsiyə edirik. İmmun sisteminin qüvvətlənməsi üçün qida rasionuna mövsümi meyvə-tərəvəzlərin əlavə edilməsi mütləqdir. Qızılca və suçiçəyinin müalicəsi zamanı antibiotik məsləhət görülmür. Belə ki, bu yoluxucu xəstəliklərdə onların təsiri yox dərəcəsindədir".
Gigiyena qaydalarına riayət edilmədikdə yoluxma riski yüksəlir
Hepatit A-ya yoluxma çirkli və çiy suyun istifadəsi zamanı baş verir. Ona yaşayış səviyyəsinin aşağı olduğu yerlərdə daha çox rast gəlinir. A.Sevizadə deyir ki, bu virus əllərdə saatlarla qala bildiyinə görə yoluxmada gigiyenanın rolu olduqca böyükdür: "İctimai yerlərdə, məktəblərdə, bağçalarda, xəstəxana və iş yerlərində gigiyena qaydalarına riayət edilmədikdə yoluxma riski yüksəlir. Hepatit A-ya qarşı profilaktik tədbir olaraq əllər təmiz saxlanılmalı, çirklənmiş və çiy sudan istifadə edilməməli, meyvə-tərəvəzlər təmiz yuyulmalıdır".
Həkim-infeksionist bildirir ki, Hepatit A-nın kəskin mərhələsində dəri və selikli qişaların saralması, halsızlıq, iştahsızlıq, ürəkbulanma kimi əlamətlər özünü göstərir: "Xəstələr bu halda mütəxəssisə müraciət etməlidirlər. Daha sonra müvafiq müayinə aparılaraq diaqnoz qoyulur, müalicə tətbiq olunmur. Ürəkbulanma-qusma səbəbilə qidalanmada problem olarsa, infuzion terapiya aparılır, rahat həzm olunan qidalar verilir. Xəstələrə yataq rejimi, çoxlu maye və meyvə-tərəvəz qəbulu, azyağlı yeməklərdən istifadə etmək tövsiyə olunur. Spirtli içkilərin qəbulu isə qəti qadağan edilir".
Qızılcaya tək-tək yoluxma olub
Səhiyyə Nazirliyinin məlumatına görə, respublikanın bəzi bölgələrində qızılca virusuna tək-tək yoluxma halları müşahidə edilib. Hadisələr qızılca əleyhinə peyvənd olunmayan uşaqlar arasında qeydə alınıb. Bununla əlaqədar olaraq xəstəlik ocaqlarında əks-epidemik tədbirlər aparılıb, qızılca peyvəndindən kənarda qalan uşaqlar QPM (qızılca-parotit-məxmərək əleyhinə) vaksini ilə peyvəndə cəlb olunurlar.
Bildirilib ki, hazırda peyvənd işləri davam etdirilir, epidemioloji vəziyyət stabildir. Qızılca xəstəliyinə yoluxma hallarının qarşısının alınması məqsədilə hər hansı səbəbdən peyvənddən kənar qalan uşaqların yaşayış yeri üzrə ambulator-poliklinik xidmət göstərən tibb müəssisələrində qızılca, epidemik parotit və məxmərək infeksiyaları əleyhinə QPM vaksini ilə peyvənd edilməsi tövsiyə olunur.
Ülkər XASPOLADOVA,
"Azərbaycan"
