Qazaxda 2025-ci ilin sosial-iqtisadi inkişafının yekunlarına və 2026-cı ildə qarşıda duran vəzifələrə həsr olunmuş hesabat yığıncağı keçirilmişdir.
Yığıncaqda rayon icra hakimiyyətinin başçısı Rəcəb Babaşov məruzə ilə çıxış etmişdir. Bildirmişdir ki, əsası Ümummilli Lider Heydər Əliyev tərəfindən qoyulan və Prezident İlham Əliyev tərəfindən uğurla davam etdirilən iqtisadi siyasət bu gün özünün yeni inkişaf mərhələsinə qədəm qoymuşdur. Bu inkişaf müstəqilliyimizi möhkəmləndirmiş, beynəlxalq aləmdə Azərbaycanın rolunu və nüfuzunu daha da artırmışdır. Xüsusən Prezident İlham Əliyevin Ali Baş Komandan kimi rəhbərliyi altında əldə edilən möhtəşəm Zəfər tariximizin ən parlaq səhifələrindən biri olmuş, Azərbaycan xalqının milli ruhunu, özünə inamını və dövlətçiliyimizin sarsılmazlığını bütün dünyaya nümayiş etdirmişdir. Zəfərdən sonra azad edilmiş ərazilərdə başlanan genişmiqyaslı quruculuq və bərpa işləri ölkəmizin gücünü və imkanlarını göstərir.
Məruzəçi onu da qeyd etmişdir ki, ölkə iqtisadiyyatının inkişafı istiqamətində atılan addımlar Qazax rayonunda da bəhrəsini vermişdir. Rayonun abadlıq-quruculuq işləri geniş vüsət almış, yeni iş yerləri açılmışdır.
Hesabat yığıncağında Qazax-Tovuz Regional Məşğulluq filialının müdiri Elçin Nəsibov, Qazax Dövlət Aqrar İnkişaf Mərkəzinin direktoru Elxan Vəkilov çıxış edərək rəhbərlik etdikləri qurumların 2025-ci ildə gördükləri işlər və qarşıda duran vəzifələr barədə məlumat vermişlər.
Vətən müharibəsi şəhidi, ölümündən sonra 3-cü dərəcəli "Vətənə xidmətə görə" ordeni, "Vətən uğrunda", "Şuşanın azad olunmasına görə", "Döyüşdə fərqlənməyə görə" medalları ilə təltif olunmuş gizir Amid Məmmədovun atası Müqabil Məmmədov çıxış edərək dövlət başçısı İlham Əliyevin, eləcə də Birinci vitse-prezident Mehriban xanım Əliyevanın şəhid ailələrinə göstərdikləri diqqət və qayğıdan danışmışdır. Vətən müharibəsi iştirakçısı polkovnik-leytenant İsgəndər Mustafayev də çıxışında şəhid ailələrinə, qazilərə, onların ailələrinə göstərilən qayğıya görə razılığını ifadə etmişdir.
Yığıncaq rayonun ictimai-siyasi həyatında fəal iştirak edən bir qrup şəxsə Qazax Rayon İcra Hakimiyyəti başçısının fəxri fərmanlarının təqdim olunması və Azərbaycan Respublikasının Prezidenti İlham Əliyevə iştirakçılar adından müraciətin qəbul edilməsi ilə yekunlaşmışdır.
19 (1)jpg_1771885865.jpg)
