Xəbər verildiyi kimi, Prezident İlham Əliyev mayın 23-də ATƏT-in Parlament Assambleyasının sədri xanım Marqareta Sederfelti qəbul edərkən beynəlxalq münasibətlərin Qafqaz üçün əhəmiyyətli məqamlarına toxunmuş, Milli Məclisin və ATƏT Parlament Assambleyasının birgə təşkilatçılığı ilə keçirilən beynəlxalq konfransın əhəmiyyətini vurğulamış, nümayəndə heyətinin işğaldan azad edilmiş torpaqlarımıza səfərinin, orada aparılan işlərlə yerində tanış olmalarının önəmini diqqətə çatdırmışdır.
Biz bu görüşü təsadüfən xatırlatmadıq. Bu gün Azərbaycanın işğaldan azad edilmiş ərazilərində aparılan quruculuq işləri, yeniliklərin və innovasiyaların tətbiqi sülh nəzərriyyəsinin inkişafı baxımından bütün dünya üçün son dərəcə əhəmiyyətlidir. 
44 günlük Vətən müharibəsində düşmən üzərində zəfər çalan Azərbaycan Ermənistanın sülhə sarı ətalətlə və pis aktyor qiyafəsində komik ləngərləməsinə rəğmən, sülh müqaviləsinin imzalanması üçün fəal təşəbbüslər göstərir, böyük çətinliklərin və ciddi təsirlərin bahasına Ermənistanı sülhə sövq edir. Azərbaycan Prezidenti ATƏT-nin Parlament Assambleyasının sədri xanım Marqareta Sederfelt ilə görüşündə ən vacib məsələlərdən birini də belə incələmişdir ki, Azərbaycan, Gürcüstan və Ermənistanın eyni platformada bir araya gətirilməsi və inteqrasiya olunmuş Cənubi Qafqaz modelinin yaradılması təşəbbüsü məhz ölkəmiz tərəfindən irəli sürülmüşdür. 
Məlumdur ki, bu gün Azərbaycan bütün qüvvəsini iqtisadi islahatların dərinləşməsinə, iqtisadiyyatın güclənməsinə yönəltmişdir. Bu baxımdan xanım Marqareta Sederfeltin Milli Məclisin və ATƏT Parlament Assambleyasının birgə təşkilatçılığı ilə "Yaşıl iqtisadiyyat, nəqliyyat əlaqələndirilməsi və dayanıqlı inkişaf vasitəsilə təhlükəsizlik və sabitliyin təşviqində milli parlamentlərin rolu" mövzusunda Bakıda keçirilən beynəlxalq konfransın xüsusi  əhəmiyyət kəsb etdiyini vurğulaması təsadüfi deyil. Xanım Marqareta Sederfelt bu tədbirdə ATƏT-ə üzv ölkələrin çox sayda parlament nümayəndə heyətlərinin təmsil olunduğunu bildirmiş və gündəlikdə duran vacib məsələlərin müzakirəsi üçün yaxşı imkan yarandığını diqqətə çatdırmışdır. 
ATƏT Parlament Assambleyasının sədrinin və nümayəndə heyətinin Zəngilan rayonuna səfəri, işğaldan azad olunmuş ərazilərdə aparılan quruculuq işləri ilə yerində tanış olması isə qonaqlara dünyaya özünü ən "qədim" və ən "müdrik" xalq kimi sırımağa vərdişli olan ermənilərin 30 illik işğal dövründə hansı rəzilliklərə imza atdıqlarını öz gözləri ilə görməyə imkan yaratmışdır. Təzada baxın: qonaqlar eyni zamanda Zəngilan şəhərində həyata keçirilən yenidənqurma işləri, eləcə də "ağıllı kənd" konsepsiyası əsasında yenidən salınmış Ağalı kəndi ilə tanış olmuşlar. Daha sonra Prezidentin Zəngilan rayonu üzrə xüsusi nümayəndəsi Vahid Hacıyev qonaqlar üçün təqdimat mərasimi keçirmişdir. Ardınca ATƏT rəsmiləri dəmir yolu infrastrukturuna, "Azərişıq" ASC-nin "yaşıl enerji" obyektlərinə baş çəkmişlər. Bu tədbir müharibənin girdablarında sürünən Ermənistanla qüdrətli və sülhsevər Azərbaycan arasında fərqləri görməyə imkan yaratmışdır. 
Məlumat üçün bildirək ki, ATƏT PA-nın nümayəndələrinin iştirakı ilə mayın 22-də Bakıda keçirilən "Yaşıl iqtisadiyyat, nəqliyyat əlaqələndirilməsi və dayanıqlı inkişaf vasitəsilə təhlükəsizlik və sabitliyin təşviqində milli parlamentlərin rolu" mövzusunda konfrans hazırda cəmiyyətlərin üzləşdiyi böyük iqtisadi və ekoloji təhlükəsizlik problemlərinin faydalı həlli üçün yolların müəyyən olunmasına xidmət edirdi. Konfransda "yaşıl iqtisadiyyat"ın qlobal və yerli səviyyədə sosial-iqtisadi tərəqqiyə təsiri mövzusuna toxunulmuş, ekoloji təhlükəsizliyin təmin olunması və ətraf mühitin çirklənməsinin minimuma endirilməsi üçün mütərəqqi üsulların tətbiqinin vacibliyi vurğulanmışdır. Bu tədbir bir daha göstərmişdir ki, Azərbaycan bölgəmiz üçün davamlı, ədalətli və təhlükəsiz gələcəyin təmin edilməsinə çalışır. 

Bahadur İMANQULİYEV,
"Azərbaycan"