İnsan dünyaya göz açanda ilk dəfə ətrafında hansı sənəti görürsə, müşahidə edirsə, ona da maraq göstərir. Sonra həmin sənətin heyranına çevrilir, gələcək üçün onu özünə peşə seçir.
Atalar əbəs yerə deməyib ki, ot kökü üstə bitər. Bu gün həyatının arzularla dolub-daşan günlərini, anlarını yaşayan Mənsurə Məmmədova 2005-ci ilin iyulunda Bakıda, rejissorlar ailəsində anadan olub. Gözünü dünyaya incəsənət ailəsində açdığına görə də kiçik yaşlarından bu sahəyə böyük maraq göstərib. İncəsənət vurğunu olan Mənsurə 2011-ci ildə Osman Mirzəyev adına 189-190 nömrəli tam orta məktəbdə oxumağa başlayıb, gələcəyə gedən təhsil yollarında ilk addımlarını atıb. İncəsənətə olan böyük maraq və sevgi Mənsurəni hələ kiçik yaşlarında - 2012-ci ildə Əhməd Bakıxanov adına 6 nömrəli musiqi məktəbinə gətirib. Sınaqlardan uğurla keçərək bu təhsil ocağının Simli alətlər şöbəsinin skripka ifaçılığı ixtisasına qəbul olub. Sanki musiqi dünyası qollarını geniş açaraq onu qoynuna alıb. Balaca Mənsurə arxada qalan illər ərzində musiqinin sirlərinə dərindən yiyələnib, 2019-cu ildə musiqi təhsilini qırmızı diplomla bitirib.
2022-ci ildə orta təhsilini əla qiymətlərlə başa vuraraq Azərbaycan Dövlət Mədəniyyət və İncəsənət Universitetinin Audiovizual sənətlər fakültəsinin rejissorluq ixtisasına qəbul olub. İllərdən bəri ürəyinə kök atmış arzusuna çatıb. Həmin gün onun sevinci yerə-göyə sığmırdı. Bilirdi ki, qəbul olduğu bu təhsil ocağı onun üçün incəsənət aləminə açılan geniş bir qapıdır. Mənsurə ilk günlərdən başlayaraq ixtisasının sirlərinə dərindən yiyələnib. Peşəsinin sirlərinə yiyələndikcə rejissorluq sənətinə olan marağı və sevgisi daha da artıb. Mənsurə hazırda rejissor sənətinin incəliklərini müəllimi Şərif Qurbanəliyevdən öyrənməkdə davam edir.
Hazırda üçüncü kursda oxuyan gələcəyin rejissoru ilə söhbət edərkən öyrəndik ki, onun babası Kərim Kərimov da rejissor olub. Uzun müddət Azərbaycan Televiziyasında çalışıb. Uzun illər onlarca verilişə rejissorluq edib. Mənsurə onu xoş sözlərlə xatırlayır: "Babamın sənət yolunu davam etdirməyimdən qürur duyuram. Sənət aləmində görkəmli rejissorlarımız çox olub. Onların bir zamanlar çəkdikləri filmlərə bu gün biz böyük maraqla, həvəslə baxırıq. Bu rejissorların hər birinin keçdiyi yol bizim üçün bir yaradıcılıq məktəbidir. Amma mən babam Kərim Kərimova bənzəmək istəyərdim. Həm insani, həm də sənət baxımından".
Söhbət zamanı onu da öyrəndik ki, Mənsurə Məmmədovanın yalnız babası deyil, atası Elnur Məmmədov da, anası Könül Kərimova da rejissordur. Hər ikisi hazırda Akademik Milli Dram Teatrında çalışır. Deməli, Mənsurənin bu sənətə gəlməsində təkcə babasının deyil, valideynlərinin də güclü təsiri olub. Necə deyərlər, ot kökü üstə bitib.
Söhbət zamanı Mənsurə ötən illər ərzində gördüyü yaradıcılıq işlərindən də söz açdı. Dedi ki, indiyədək bir neçə audiovizual işlər görüb. Mikayıl Müşfiqin xatirəsinə həsr olunmuş "Məni gözəl xatırla" filmi, Ramiz Rövşənin eyniadlı şeiri əsasında, babası Kərim Kərimovun xatirəsinə həsr etdiyi "Kino" filmi, "Xəyalların ardınca" sosial çarxı, "120.2.4" qısametrajlı bədii filmi, "Hədiyyə" sosial çarxı, "3-cü zəng" - Akademik Milli Dram Teatrı haqqında televiziya verilişi, "Su həyatdır" reportaj filmləri Mənsurənin sənət yollarında atdığı ilk addımlardır. Təhsilini uğurla davam etdirən, rejissorluq sənətinin sirlərinə dərindən yiyələnən Mənsurə Məmmədovanın çəkdiyi qısametrajlı filmlər, sosial çarxlar bir neçə festivalda yüksək qiymətləndirilib. Ssenari müəlliflərindən biri olduğu "Qismət" sosial çarxı I Cinemo Mobil Film Festivalında birinci yerə layiq görülüb. II Beynəlxalq Cinemo Mobil Film Festivalında isə "Hədiyyə" sosial çarxı "TikTok nominasiyası" üzrə ən yaxşı iş seçilib.
Hazırda Mənsurə Məmmədova yaradıcılıq işlərini davam etdirir. O, "Zontik Film" prodakşınının qurucularından və "Metro Film Media"nın rejissoru və ssenaristlərindən biridir. Quruluşçu rejissoru Orxan Ali olan "Dar küçələr" serialında isə ikinci rejissordur.
Gənc qız dünya rejissorlarının çəkdiyi filmləri maraqla izləyir, öyrənir və təcrübəsini artırır. Söhbətimiz zamanı dedi ki, dünyanın inkişaf etmiş ölkələrində çəkilmiş filmləri sevərək izləyir: "İzlədiyim filmlərdən üçü yaddaşımda və yaradıcılığımda dərin iz salıb. Bunlardan birincisi, Florian Zellerin "Ata", ikincisi, Quentin Tarantinonun "Billini öldürmək", üçüncü isə Æonatan Demmenin "Quzuların səssizliyi" filmləridir".
Yaradıcılıq işlərindən, fəaliyyətindən aydın görünən odur ki, babasının sənət yoluna uğurla davam etdirməyə çalışan Mənsurə Məmmədovanın gənc rejissor kimi məqsədi Azərbaycan televiziyası və kinosunun inkişafına yeni töhfələr verməkdir. Onun üçün rejissorluq qəlbən, zehnən hiss olunmadan insanı maqnit kimi özünə çəkən sənətdir. Bu sənəti sevmədən, onun yolunda ömrünü şam kimi əritmədən, əziyyətlərinə qatlaşmadan müsbət nəticələr qazana bilməzsən. Mənsurə seçdiyi bu sənəti sevir, ilk addımlarını atdığı müqəddəs yollarda qarşılaşdığı çətinlikləri dəf edə-edə, addım-addım məqsəd və amallarına çatır, uğurlar əldə edir.
Vahid MƏHƏRRƏMOV,
"Azərbaycan"
jpg_1752840499.jpg)
