1992-ci il noyabrın 21-də Naxçıvanda keçirilən təsis konfransı ilə rəsmi fəaliyyətinə başlayan Yeni Azərbaycan Partiyasının (YAP) siyasi meydana daxil olması Azərbaycanın müstəqillik tarixinin mühüm hadisəsidir. YAP-ın yaranması xalqımızın həm milli birliyini möhkəmləndirmək, həm də müstəqil dövlətimizin siyasi sabitliyini qorumaq baxımından tarixi əhəmiyyət kəsb etdi.
Ötən əsrin 90-cı illərinin əvvəllərində ölkəmiz ağır siyasi və iqtisadi böhranla üzləşmişdi. Qeyri-stabil şərait və təhlükəli proseslər gedən mürəkkəb vəziyyətdə Azərbaycanın gələcəyini düşünən ziyalılar ölkəni böhrandan çıxara biləcək yeni siyasi təşkilat yaratmaq təşəbbüsü ilə çıxış etdilər.
"91-lər"in Ulu Öndər Heydər Əliyevə ünvanladığı müraciət bu təşəbbüsün əsasını qoydu. Həmin müraciətdə Heydər Əliyevdən yeni yaradılacaq partiyaya rəhbərlik etməsi xahiş olundu və bununla da xalqın iradəsi və ümummilli arzuları siyasi platformada öz əksini tapdı. Ulu Öndər Heydər Əliyev bu müraciətə cavab olaraq bildirdi ki, müstəqil Azərbaycan dövlətinin gələcək həyatının və fəaliyyətinin əsasını təşkil edən demokratiya və siyasi plüralizm şəraitində Yeni Azərbaycan Partiyasının yaradılması obyektiv zərurətdən doğur və belə bir partiya ölkənin siyasi-ictimai həyatında fəal iştirak edərək yeni, müstəqil Azərbaycan dövlətinin möhkəmləndirilməsində və inkişafında tarixi rol oynaya bilər.
Beləliklə, 21 noyabr 1992-ci ildə keçirilən təsis konfransında Ulu Öndər Heydər Əliyev yekdilliklə partiyanın sədri seçilmiş, Siyasi Şura, İdarə Heyəti və sədrin müavinləri təsdiqlənmişdir. Həmin gün Azərbaycanın siyasi tarixində müstəqil və güclü siyasi təşkilatın yaranması kimi yadda qalmışdır. YAP qısa müddətdə milli həmrəyliyi təmin edən, xalqın etimadını qazanan və müstəqil dövlətimizin siyasi dirçəlişində həlledici rol oynayan aparıcı siyasi qüvvəyə çevrilmişdir. Ulu Öndər Heydər Əliyevin rəhbərliyi ilə partiya yalnız siyasi fəaliyyət göstərən təşkilat kimi deyil, həm də ölkədə sosial stabilliyi təmin edən, dövlət idarəçiliyi mədəniyyətini təşviq edən və cəmiyyətimizin aparıcı dayağına çevrilmişdir.
2005-ci ildə Prezident İlham Əliyevin partiyanın Sədri seçilməsi Yeni Azərbaycan Partiyasını yeni inkişaf mərhələsinə çıxarmış, 2021-ci ildə həyata keçirilmiş institusional modernləşmə və islahatlar, yeni Nizamnamənin təsdiqi, İdarə Heyətinin və Veteranlar Şurasının formalaşdırılması partiyanın idarəetmə modelini daha çevik, səmərəli və strateji hədəflərə uyğun hala gətirmişdir. Eyni zamanda Mehriban xanım Əliyevanın partiya Sədrinin birinci müavini vəzifəsinə təyinatı partiya fəaliyyətində qadınların roluna verilən yüksək dəyərin bariz nümunəsinə çevrilmişdir.
Yeni Azərbaycan Partiyası dövlətin uzunmüddətli inkişaf strategiyasının müəllifi kimi çıxış edir və onun fəaliyyəti həm milli, həm də beynəlxalq kontekstdə strateji hədəflərin reallaşdırılmasına yönəlmişdir. Partiya sosial ədalətin təmin olunmasında, iqtisadiyyatın davamlı inkişafında, işğaldan azad edilmiş ərazilərin sürətli bərpasında, inklüziv cəmiyyətin formalaşdırılmasında, insan kapitalının gücləndirilməsində, demokratik ənənələrin möhkəmləndirilməsində, multikultural və tolerant cəmiyyətin təşviqində, eləcə də konstruktiv əməkdaşlıq və siyasi dialoqun inkişafında yaxından iştirak edir və bütün sahələrdə dövlət siyasətinin strateji hədəflərini həyata keçirir.
44 günlük Vətən müharibəsində əldə edilən tarixi Zəfər Azərbaycanın ərazi bütövlüyünü təmin etmiş, Qarabağ və Şərqi Zəngəzurda genişmiqyaslı bərpa və quruculuq işlərinin başlanmasına zəmin yaratmış, eyni zamanda Yeni Azərbaycan Partiyasının dövlətçilik ənənəsindəki unikal rolunu bir daha təsdiqləmişdir. Azərbaycanın beynəlxalq nüfuzu daha da artmış, qlobal arenada ölkəmiz etibarlı və təsirli tərəfdaş kimi mövqeyini gücləndirmiş, xüsusilə türk dövlətləri ilə əlaqələrin inkişafı və regional əməkdaşlığın dərinləşdirilməsi ölkəmizin həm regionda, həm də qlobal miqyasda rolunu daha da artırmışdır.
33 illik fəaliyyəti göstərir ki, Yeni Azərbaycan Partiyası yalnız dünənin və bu günün deyil, həm də gələcəyin partiyasıdır. Qarşıda duran vəzifələr işğaldan azad edilmiş ərazilərin sürətli bərpasını, dayanıqlı və rəqabətqabiliyyətli iqtisadi modelin qurulmasını, sosial təminatın gücləndirilməsini və vətəndaş rifahının yüksəldilməsini əhatə edir və bu istiqamətlərdə partiyanın siyasi iradəsi, üzvlərinin fəal iştirakı və dövlət siyasətinə sadiqliyi həlledici rol oynayacaqdır.
Prezident İlham Əliyevin rəhbərliyi altında Yeni Azərbaycan Partiyası dövlətçiliyin möhkəmləndirilməsində, milli birliyin qorunmasında və cəmiyyətimizin dinamik inkişafında aparıcı siyasi qüvvə olaraq rolunu davam etdirəcək, qarşıya qoyulan strateji hədəflərin ardıcıl həyata keçirilməsinə nail olacaq və bu missiyada partiyanın üzvlərinin fəal iştirakı, xalqın etimadı və dövlətin davamlı siyasətinə sadiqliyi hər zaman əsas təminat kimi çıxış edəcəkdir.
Əminik ki, Ulu Öndər Heydər Əliyevin müəyyən etdiyi siyasi kursa və möhtərəm Prezident İlham Əliyevin rəhbərliyi altında qarşıya qoyulan strateji hədəflərə sarsılmaz inamımız Azərbaycanın yeni nailiyyətlərinin əsasını təşkil edəcəkdir.
Mahir SÜLEYMANLI,
Milli Məclisin deputatı
jpg_1775127571.jpg)
