Cari ilin yanvar ayında Azərbaycan Respublikasının hüquqi və fiziki şəxsləri dünyanın 136 ölkəsindəki tərəfdaşları ilə ticarət əməliyyatları həyata keçirib.

Dövlət Statistika Komitəsindən AZƏRTAC-a bildirilib ki, 73 ölkəyə məhsul ixrac olunub, 132 ölkədən idxal edilib. Gömrük orqanlarında qeydiyyatı aparılıb. Lakin gömrük rəsmiləşdirilməsi tam başa çatdırılmamış ixrac olunan xam neft və təbii qazın statistik qiymətləndirilmiş dəyəri nəzərə alınmaqla 2023-cü ilin yanvar ayında xarici ticarət dövriyyəsi 4 milyard 591,4 milyon ABŞ dolları, o cümlədən ixracın dəyəri 3 milyard 178,7 milyon dollar, idxalın dəyəri 1 milyard 412,7 milyon dollar təşkil edib. Nəticədə 1 milyard 766 milyon dollarlıq müsbət ticarət saldosu yaranıb.

Qeyd edilib ki, 2022-ci ilin yanvar ayı ilə müqayisədə xarici ticarət dövriyyəsi faktiki qiymətlərlə 15,6 faiz, real ifadədə 3,9 faiz, o cümlədən idxal 18,7 faiz artıb, ixrac isə 1 faiz azalıb.

Dövlət Gömrük Komitəsindən daxil olan məlumatlara əsasən xarici ticarət dövriyyəsinin 91,7 faizi İtaliya, Türkiyə, Rusiya, İsrail, Çin, Fransa, Almaniya, Hindistan, Vyetnam, Çexiya, Gürcüstan, Türkmənistan, Rumıniya, Avstriya, İrlandiya, Yunanıstan, Qazaxıstan, ABŞ, İran, Ukrayna və Koreya ilə aparılıb. Ölkəyə idxal olunmuş məhsulların ümumi dəyərinin 19 faizi Rusiyanın, 13,1 faizi Fransanın, hər biri 12,9 faiz olmaqla Çin və Türkiyənin, 4,6 faizi Almaniyanın, 4,4 faizi Türkmənistanın, 3,4 faizi İtaliyanın, 3,0 faizi ABŞ-nin, 2,9 faizi Qazaxıstanın, 2,7 faizi İranın, 1,8 faizi Koreyanın, 1,6 faizi Ukraynanın, 1,5 faizi Hindistanın, hər biri 1,4 faiz olmaqla Belarus və Yaponiyanın, 1,3 faizi Birləşmiş Krallığın, 0,9 faizi Polşanın, 0,8 faizi İndoneziyanın, 0,7 faizi Niderlandın, 9,7 faizi isə digər ölkələrin payına düşüb.