ABŞ-nin sülh səyləri davam edir, lakin hələ nəticə verməyib
Rusiya Prezidenti Vladimir Putin xəbərdarlıq edib ki, Kiyev Şərqi Donbası təslim etməsə, qoşunlar onu güclə ələ keçirəcək:"Bütün məsələlər bir şeyə bağlıdır: ya biz bu əraziləri güclə geri alacağıq, ya da Ukrayna qoşunları sonda çıxacaq", - deyə V. Putin Hindistana dövlət səfəri zamanı “India Today” qəzetinə verdiyi müsahibədə bildirib.
Rusiya artıq Donbasın əksər hissəsinə - Kremlin ilhaq etdiyi Donetsk və Luqansk bölgələrinə nəzarət edir.
V. Putinin şərhləri Amerika diplomatiyasının təşəbbüsü ilə keçirilən bir sıra görüşlərdən sonra səslənib. Lakin Donald Trampın səyləri bir daha hər iki tərəfdən qarşılıqlı qəbuledilməz tələblərlə qarşılaşıb.
Kreml bildirib ki, ABŞ ilə Ukrayna ilə bağlı danışıqlar "konstruktiv" olub, lakin heç bir kompromis tapılmayıb.
Öz növbəsində Avropa V. Putini ABŞ ilə danışıqlardan sonra Ukraynada sülhə “saxta maraq” göstərməkdə günahlandırır.
Məlum olduğu kimi, çərşənbə axşamı Rusiya Prezidenti Donald Trampın xüsusi elçisi Stiv Uitkoff və ABŞ prezidentinin kürəkəni Cared Kuşner ilə beşsaatlıq danışıqlar aparıb. V. Putin onları "zəruri və faydalı", eyni zamanda "çətin iş" adlandırıb və Vaşinqtonun bəzi təkliflərini qəbuledilməz hesab edib:
"Demək olar ki, hər bir məqamı nəzərdən keçirməli olduq, buna görə də bu qədər vaxt apardı. Bu, çox konkret və əsaslı bir söhbət idi. Bəzən deyirdik ki, "Bəli, bunu müzakirə edə bilərik, amma buna razı ola bilmərik".
Donald Tramp öz növbəsində S. Uitkoff və C. Kuşnerdə "Vladimir Putinin razılaşmaq istədiyinə dair güclü təəssürat" yarandığını söyləyib.
Lakin V. Putinin özü, müharibənin başlanğıcından bəri ilk səfəri olan Hindistanda, hər hansı bir kompromisi açıq şəkildə qəbul etmək və ya rədd etmək əlaməti göstərməyib. O, Rusiyanın nəyi qəbul edə və ya rədd edə biləcəyi ilə bağlı detalları açıqlamaqdan imtina edərək, sadəcə ABŞ-nin ilk 28 maddəlik sülh təklifinin 27-yə endirildiyini və dörd paketə bölündüyünü bildirib.
Bu fonda, ABŞ-ın rəhbərlik etdiyi danışıqlar prosesindən kənarda qalmış hiss edən Avropa liderləri V. Putini Trampın sülh təşəbbüsünə geyri-səmimi maraq göstərməkdə günahlandırıblar.
Rizvan CƏFƏROV,
“Azərbaycan”
jpg_1764942561.jpg)
