ABŞ-ın paytaxtı Vaşinqtonda ABŞ-Azərbaycan Ticarət Palatasının (USACC) təşkilatçılığı ilə Regional Maliyyə Konfransı keçirilib.
AZƏRTAC-ın məlumatına görə, konfransda Azərbaycan, Gürcüstan, Türkiyə və ABŞ-ın maliyyə sektorları arasında əməkdaşlığın inkişaf etdirilməsinə yönəlmiş müzakirələr təşkil olunub. Tədbirdə mərkəzi bankların təmsilçiləri, maliyyə institutlarının nümayəndələri və maliyyə sektorunda fəaliyyət göstərən ekspertlər iştirak ediblər.
ABŞ-ın İxrac-İdxal Bankının (EXIM) Qlobal Biznesin İnkişafı üzrə vitse-prezidenti Bencamin Todun moderatorluğu ilə keçirilən müzakirələrdə çıxış edən Azərbaycan Mərkəzi Bankı sədrinin birinci müavini Əliyar Məmmədyarov bildirib ki, Azərbaycan, Türkiyə və Gürcüstanın maliyyə sektorları arasında əməkdaşlıq daha da güclənməkdədir. Onun sözlərinə görə, regional tərəfdaşlıq, eləcə də ABŞ-ın maliyyə sektoru ilə qurulan strateji əlaqələr xüsusi əhəmiyyətə malikdir və bu münasibətlər sərhədlərarası ticarət, investisiya və ödənişlərin təşviqi baxımından mühüm əhəmiyyət kəsb edir. Mərkəzi Bank rəsmisi əlavə edib ki, beynəlxalq təcrübədən faydalanmaqla tənzimləmə çərçivəsinin daha da təkmilləşdirilməsi ölkədə, eləcə də regionda maliyyə sabitliyinin təmin olunmasına töhfə verəcək. O bildirib ki, mövcud effektiv dialoq, əməkdaşlıq, təcrübə mübadiləsi regionda daha dayanıqlı və davamlı maliyyə sisteminin qurulmasında xüsusi əhəmiyyətə malikdir.
Gürcüstan Mərkəzi Bankı sədrinin birinci müavini, İdarə Heyətinin üzvü Yekatrine Mikabadze region ölkələri arasında maliyyə əməkdaşlığına böyük əhəmiyyət verdiklərini bildirib. Onun sözlərinə görə, Gürcüstan və qonşu ölkələr unikal mövqeyinə görə Avropa ilə Asiya arasında təbii körpü rolunu oynayır. O bildirib ki, region ticarət, logistika, maliyyə, infrastruktur, enerji üçün körpü rolunu inkişaf etdirə bilər, regionda iqtisadiyyat artımı davam etdikcə, daha yaxşı əlaqə və maliyyə xidmətlərinə ehtiyac da artır. Onun sözlərinə görə, transsərhəd ödəniş sistemlərinin inkişafı ölkələr arasında ucuz, asan və təhlükəsiz əməliyyatlar aparmağa imkan verəcək. O, həmçinin Türkiyə və Azərbaycanla kapital bazarlarının, maliyyə xidmətlərinin, rəqəmsal xidmətlərin dərinləşdirilməsi üzərində iş apardıqlarını vurğulayıb.
Türkiyə Mərkəzi Bankının icraçı direktoru Hüzeyfe Torun bildirib ki, maliyyə sahəsində regional və qlobal əlaqələr ölkələrin davamlı böyüməsinə töhfə verir. O bildirib ki, Türkiyə-Gürcüstan, Türkiyə-Azərbaycan ticarət əlaqələri son 10-20 ildə əhəmiyyətli dərəcədə inkişaf edib və Türkiyə-Azərbaycan ticarət həcmi on il ərzində təxminən 40 faiz, Türkiyə-Gürcüstan ticarət həcmi isə il ərzində təxminən 80 faiz artıb. O bildirib ki, münasibətləri qorumaq diqqət tələb edir, bu baxımdan diqqət maliyyə inteqrasiyasına yönəldilməli və uzunmüddətli münasibətlər üçün birgə infrastruktur sərmayələri davam etdirilməlidir.
Tərəflər həmçinin təmsil etdikləri qurumların fəaliyyət istiqamətləri, regional əməkdaşlığı inkişaf etdirmək imkanları və ABŞ maliyyə institutları ilə əlaqələr barədə sualları cavablandırıblar.
