İnformasiya dövründə beynəlxalq medianın rolunun sürətlə artması yaşadığımız dövrün təkzibedilməz reallığıdır. Azərbaycan bu reallığı nəinki dərindən dərk etdiyini, habelə və dövlət maraqları naminə ondan faydalanmaq bacarığını illərdir ki, uğurla nümayiş etdirir. Ölkəmizdə gözəl ənənə halını almış Qlobal Media Forumu deyilənlərin ən bariz nümunələrindəndir. Forumların daha böyük mənasını beynəlxalq icmanın və mətbuatın Prezident İlham Əliyevin müdrik siyasətçi baxışlarını və tövsiyələrini dünyaya yaymaq istəyindən ibarət olduğunu sübut etməyə elə də ehtiyac yoxdur. Forum iştirakçılarının sayı, coğrafiyası və statusları etibarlı dəlil rolunu, düşünürəm ki, uğurla yerinə yetirir.
Azərbaycana artmaqda olan beynəlxalq maraq
Azərbaycanın böyük beynəlxalq dialoq mərkəzinə çevrilməsi, çoxsaylı dünya səviyyəli möhtəşəm tədbirlərə evsahibliyi etməsi, eləcə də Qlobal Media Forumu kimi diqqətəlayiq ənənənin əsasını qoyması ölkəmizin artmaqda olan rolunun və nüfuzunun birbaşa nəticəsidir. SSRİ-nin süqutundan sonra ağır iqtisadi, siyasi və sosial mirasla üz-üzə qalan gənc Azərbaycan dövləti Ümummilli Lider Heydər Əliyevin müdrik siyasəti və qətiyyəti sayəsində ən qısa zamanda iqtisadi-siyasi sabitliyi təmin etməyə, Ermənistanın ölkəmizə qarşı başladığı müharibəni dayandırmağa, iqtisadi tənəzzülün qarşısını almağa, nəinki Azərbaycanın və regionun, hətta bütün dünyanın enerji xəritəsini dəyişdirməyə əsas yaradan Əsrin Neft Müqaviləsini imzalamağa nail oldu. Artıq 30 ildən çoxdur ki, Azərbaycan Respublikası beynəlxalq icmanı bir-birindən əzəmətli uğur və nailiyyətləri ilə təəccübləndirməkdədir. Ən ümumi şəkildə bu uğurların sadəcə sadalanması ölkəmizin keçdiyi yolun əzəməti haqqında aydın təəssürat yaradır: iqtisadiyyatın sıçrayışla yüksəlməsi və Azərbaycanın iqtisadi modeli adlanan fenomenin meydana gəlməsi, ölkəmizin ən uğurlu dövlət statusuna sahib olması, ard-arda baş verən diplomatik nailiyyətlər, ölkəmizin müasirləşməsi və simasının sürətlə yenilənməsi, yeni və perspektivli beynəlxalq enerji aktoruna çevrilməsi, 30 ilə yaxın müddət ərzində davam edən erməni işğalına son qoyulması... Qarabağın və Şərqi Zəngəzurun azad edilməsindən sonra sadalanan bu tarixi nailiyyətlərə yeni möhtəşəm layihə əlavə olunmaqdadır. Böyük qayıdış adlandırılan bu layihə əsasında işğal dövründə bütünlükdə yerlə yeksan edilmiş ərazilərdə həyat tamamilə yenidən qurulur, regionun yeni möcüzəsi yaradılır.
Dünya, əslində, Azərbaycan Respublikasının timsalında qətiyyətlin, mübarizliyin, qalib gəlmək bacarığının, eyni zamanda quruculuğun, müasirliyin yeni nümunəsinin şahidi olmaqdadır. Lakin düşünürəm ki, ölkəmizin bütün dünyaya fəxrlə nümayiş etdirdiyi digər və daha əhəmiyyətli amil İlham Əliyev fenomeni, onun rəhbər və siyasətçi təcrübəsidir. Xalqımız cənab İlham Əliyevin bir ölkənin prezidenti çərçivəsini aşaraq geniş beynəlxalq hörmət və ehtiram daşıyıcısına çevrilən nüfuzlu dövlət xadimi və siyasətçi qismində tanınmasına məmnunluqla şahidlik etməkdədir.
Ümummilli Lider Heydər Əliyevin və onun layiqli varisi Prezident İlham Əliyevin sayəsində Azərbaycan bir sıra əzəmətli nailiyyətlər qazanıb ki, onların hər biri, əslində, böyük dəyəri olan milli sərvətlər sayılmağa layiqdir. Bir həqiqət də ondan ibarətdir ki. ölkəmizin qürur duyduğu milli sərvətlər sırasında onun beynəlxalq nüfuzu, Prezident İlham Əliyevə olan dərin hörmət və ehtiram xüsusi yer tutur. Bu mənada ölkəmizdə keçirilən bütün beynəlxalq tədbirlərin, o cümlədən IV Media Forumunun başlıca cazibə qüvvəsinin Prezident İlham Əliyevdən ibarət olması qətiyyətlə qeyd oluna bilər və qeyd olunmalıdır.
Azərbaycan təcrübəsinin öyrənilməsi və təbliği
Böyük nailiyyətlər qazanmış ölkələrin təcrübəsinin öyrənilməsi qədim tarixə malik ənənə sayılır. Qürurverici haldır ki, müasir dövrdə təcrübəsi öyrənilən və təbliğ edilən dövlətlər arasında Azərbaycanın adı getdikcə daha tez-tez çəkilməkdədir. Müşahidə edilən odur ki, ölkəmizin çoxşaxəliliyi ilə seçilən uğurları hər bir konkret dövlət üçün faydalı ola bilir və buna görə də Azərbaycanın cazibədarlığı artıq sanki beynəlxalq brendə çevrilib.
Yaşadığımız dövr bir sıra uzun sürən qanlı münaqişələr və müharibələrlə müşayiət olunur. Bu kontekstdə 2020-ci ildə qazandığımız əzəmətli Qələbənin və 2023-cü ildə separatizm yuvasının birdəfəlik ləğv edilməsinin tarixi əhəmiyyəti yalnız dünya hərb tarixinin "qızıl fondu"na daxil olması ilə yekunlaşmır. Vətən müharibəsi nəinki Qarabağ və Şərqi Zəngəzuru işğaldan azad etdi, Azərbaycanın tam ərazi suverenliyini bərpa etdi, habelə böyük beynəlxalq siyasi hadisəyə çevrildi. Söhbət müasir münaqişələri uğurla, qısa vaxtda aradan qaldırmaq bacarığının və nümunəsinin dünya birliyinə təqdim edilməsindən gedir. Beynəlxalq ekspertlərlə yanaşı, münaqişə ağrılarını yaşamağa məhkum olmuş ölkələrin rəhbərlərinin Azərbaycan təcrübəsinə dərin marağını anlamaq o qədər də çətin deyil. Ədalət naminə vurğulanmalıdır ki, ölkəmiz qazandığı zəngin təcrübəni həvəslə bölüşür və bununla da dünyada sülhün və anlaşmanın bərqərar olmasına mühüm töhfə verir.
Onu da ayrıca qeyd etməkdə fayda var ki, Azərbaycanın bölüşdüyü təcrübə tək Qələbə nümunəsi ilə yekunlaşmır. Sıçrayışlı iqtisadi yüksəliş, müasirləşmə, innovativ inkişaf yolları, ənənəvi enerji ilə yanaşı, bərpaolunan enerji növlərinin istifadə edilməsi kimi problemin uğurla uzlaşdırılması və sair Azərbaycan təcrübəsinin zənginliyindən xəbər verən reallıqlardır.
30 il işğala məruz qalan Azərbaycanın möhtəşəm qələbəsindən dərhal sonra regionda sülh və əməkdaşlıq çağırışlarının onun xarici siyasət gündəliyinin əsas qayəsinə çevrilməsi ölkəmizin beynəlxalq təcrübəsinin cazibədarlığını xüsusilə artırır. Uzun sürən münaqişə və müharibə dövrünü yaşayan ölkələrin əməkdaşlıq gündəliyini bərpa etməsinə onilliklər lazım olduğu halda Azərbaycanın ən qısa vaxtda əməkdaşlıq çağırışlarına sadiq qalması özlüyündə beynəlxalq həyatın unikal hadisəsidir. Təbii ki, Prezident İlham Əliyev siyasətinin ən parlaq xüsusiyyətləri sırasında yer tutan sadalanan məqamlar çoxları üçün faydalı və cəlbedici olduğundan onların Şuşa Qlobal Media Forumunda xüsusi diqqət mərkəzində olması tamamilə təbii və anlaşılandır.
Diqqətçəkən digər Azərbaycan təcrübəsi sırasında regionda beynəlxalq kommunikasiya layihələri qeyd oluna bilər. Ölkəmizin qeyri-adi coğrafi imkanlarının qüdrətli geopolitik amilə çevrilməsi İlham Əliyevin diplomatik konsepsiyasının ayrıca tərkib hissəsini təşkil edir, ciddi iqtisadi dividendlər vəd edir və buna görə də öz növbəsində xüsusi cazibə amilinə çevrilir.
Beləliklə, Azərbaycan və onun tarixi əhəmiyyət kəsb edən təcrübəsi ilə yanaşı, Prezident İlham Əliyevin aydın müşahidə olunan zəngin təcrübəsi beynəlxalq medianın diqqətindən kənarda qalmır. Tanınmış jurnalistlərin, ekspertlərin, qlobal media nəhənglərinin aparıcı nümayəndələrinin yolunun tez-tez Azərbaycana düşməsi ölkəmizə və onun zəngin təcrübəsinə qlobal marağın ibrətamiz nümunəsidir. Bu, eyni zamanda yenidən qurulan Qarabağ və Şərqi Zəngəzurun timsalında Azərbaycanın imkan və bacarıqlarının, Prezident İlham Əliyevin idarəçilik baxışlarının genişliyinin parlaq nümayişidir.
Prezident İlham Əliyevin sülh tövsiyələri
Azərbaycan dünyada uğurlu keçidin diqqətəlayiq məkanlarından biridir desək, düşünürəm ki, səhvə yol vermərik. İqtisadiyyatda və sosial sferada tətbiq olunan müasir innovativ yanaşmalar, "yaşıl keçid", digər çoxsaylı yeniliklər sözügedən reallıqlardan xəbər verir. Cəmi bir neçə il bundan əvvələ aid olan müharibə ritorikasından sülh və əməkdaşlıq gündəliyinə keçid, bir yandan ölkəmizin beynəlxalq cazibədarlığını əhəmiyyətli dərəcədə artırıb, digər yandan isə Azərbaycana və ölkəmizin təcrübəsinə marağı inanılmaz dərəcədə gücləndirib. Tanınmış beynəlxalq informasiya kanallarının günlərdir davam edən Şuşa Qlobal Forumundan materiallar paylaşması bu marağın aydın ifadəsidir.
Forumda ən çox yaddaqalan məqamlar sırasında iştirakçıların Prezident İlham Əliyevin müxtəlif sahələrlə əlaqədar tövsiyələrini xahiş etməsi xüsusilə vurğulanmağa layiqdir. Əvvəla, beynəlxalq media nəhənglərinin Azərbaycan Prezidentinin ayrı-ayrı məsələlərlə əlaqədar tövsiyələrini öyrənməyə çalışması olduqca diqqətəlayiq haldır. Digər tərəfdən isə inanırıq ki, bu tövsiyələr müxtəlif ölkələrdə qarşıya çıxan problemlərin aradan qaldırılmasında stimulverici rol oynaya biləcək, çünki səsləndirilən tövsiyələr müdrik Prezidentin qazandığı təcrübə kimi ciddi əsasa istinad edir.
Diqqəti çəkən məqam həm də ondan ibarətdir ki, Prezident öz tövsiyələri ilə qarşımızda təcrübəli dövlət xadimi olmaqla yanaşı, eyni zamanda dərin insani keyfiyyətlərə malik olan lider kimi dayanır. O, zorən müharibəyə cəlb edilən ölkələrə qətiyyət nümayiş etdirməyi arzulamaqla yanaşı, münaqişənin dayandırılması istəyini özünün insani mövqeyi olaraq təqdim edir və bu baxımdan fundamental humanist dəyərlər carçısı mahiyyətini ortaya qoyur.
Düşünürəm ki, artıq ənənə halını almış Qlobal Media Forumu təkcə Azərbaycanın uğurlarının dünyaya təqdimatı baxımından mühüm əhəmiyyət kəsb etdirmir. Onun daha geniş beynəlxalq missiya daşıyıcısı olması gündəliyinin zənginliyindən, müasir qlobal proseslərə həssaslığından, Prezident İlham Əliyevin çoxşaxəli baxışını dolğun və ilk mənbə əsasında şərh etmək imkanına malik olmasından qaynaqlanır. ABŞ Prezidenti Donald Trampın Prezident İlham Əliyevin forumda çıxışını öz sosial şəbəkə səhifəsində paylaşması həm foruma, həm də dövlətimizin başçısının baxışlarına və qiymətləndirilməsinə ən yüksək beynəlxalq reaksiya hesab oluna bilər. Azərbaycanın, onun uğurlarının və Prezidentinin fəaliyyətinin müasir dünyanın diqqət mərkəzində olması müasir tariximizin ruhlandırıcı reallığına çevrilib. Ölkəmizin böyük və etibarlı gələcəyə doğru qətiyyətli addımları bu reallıqlar zəminində daha inamlı görünür. Təqdirəlayiqdir ki, "Azərbaycan dünyaya günəş kimi doğacaq" deyən Ümummilli Lider Heydər Əliyevin müdrikliyi və uzaqgörənliyi onun 1969-cu il iyul ayının 14-də Azərbaycanın rəhbəri seçilməsinin ildönümü ərəfəsində Şuşa Qlobal Media Forumunun timsalında bir daha təsdiqini tapır.
Əli ƏHMƏDOV,
Yeni Azərbaycan Partiyası Sədrinin müavini
