Bir neçə ölkədə onun oxşarı yaradılır

1949-cu ildə Azərbaycanın xəritəsinə yeni bir şəhərin adı yazıldı. Elə bir şəhərin ki, buraya nəinki respublikanın, hətta keçmiş ittifaqın hər tərəfindən qurub-yaradan insanlar axışdı. Sumqayıt həmin insanların zəhməti ilə böyüdü, şan-şöhrət tapdı. 
Sumqayıtın başqa bir adı da var - gənclik şəhəri. Yəqin ki, qurucularının çoxunun cavanlar olduğu üçün veriblər bu adı. Gənclik şəhəri yaşa dolsa da, onun bu statusu dəyişmir, baxmayaraq ki, boy atdığından, sağa-sola doğru genişləndiyindən və artıq az qala paytaxtımızla qol-boyun olduğundan ona çox ad yaraşır. 
Vaxtilə boz çöldə, çox hissəsi bataqlıq olan bir ərazidə ilk binaları tikilən, ilk müəssisələri işə salınan Sumqayıt bu gün müstəqil Azərbaycanın ən böyük və ən abad şəhərlərindən biridir. Ölkəmizin inkişaf salnaməsində bu şəhərin sanballı payı var. Ümumiyyətlə, Cənubi Qafqazın iri sənaye şəhərlərindən olan Sumqayıtın hədəfləri gələcəyə hesablanıb. Şəhərdə müxtəlif təyinatlı sosial-iqtisadi layihələr gerçəkləşdirilir və həmin layihələrin çoxu iri sərmayələrlə ərsəyə gəlir. Belə layihələrdən biri də Sumqayıt bulvarıdır. 
Xəzər sahilində belə bir bulvarın salınması ölkəmizdə həyata keçirilən sosial layihələrin bariz nümunəsidir. Bu kompleks Sumqayıt sakinlərinə böyük zövq-səfa bəxş etməklə yanaşı, şəhərə turist axınını da artırıb. Hazırda bulvar yaxınlığında hündürmərtəbəli binaların tikintisi aparılır. Eyni zamanda hotel və istirahət mərkəzlərinin inşası başa çatmaq üzrədir. Bu ilin sonuna onların təhvil veriləcəyi nəzərdə tutulur.
Xatırladaq ki, Sumqayıt bulvarının açılışı 2016-cı il sentyabrın 27-də Prezident İlham Əliyevin iştirakı ilə olub. Dövlətimizin başçısı bu gözəl məkanı bir "möcüzə" adlandırıb. Doğrudan da, Sumqayıt bulvarı onu görənlərə bir möcüzə təsiri bağışlayır. Qumlu sahildə müasir üslubda salınan bulvar dəniz səviyyəsindən 2,5 metr yüksəklikdədir. Buradakı istinad divarlarının uzunluğu 4,8 kilometr, hündürlüyü 1,5 metrdir. Bulvarda 60 hektar ərazidə yaşıllıq zolağı salınıb, 200 mindən çox ağac və dekorativ kol, 2 milyondan artıq gül və çiçək əkilib. Vaxtaşırı keçirilən ağacəkmə kampaniyalarında yeni zolaqlar salınır. Təkcə bu ilin əvvəlindən bəri "Yaşıl dünya naminə həmrəylik ili" çərçivəsində bulvarda 20 mindən artıq zeytun ağacı, on minlərlə təbii gül kolları əkilib. Bulvarın ərazisində müxtəlif yerlərdə 50 kölgəlik yaradılıb, oturacaqlar qoyulub. Həmin ərazilərdə quraşdırılan 5 rəngli fontan öz gözəllikləri ilə şəhərin sakinlərini və qonaqlarını valeh edir. 
Hazırda Sumqayıt bulvarının genişləndirilməsini nəzərdə tutan yeni layihə üzərində iş aparılır. Bu isə o deməkdir ki, yaxın gələcəkdə bulvarda yeni salınan obyektlərin, istirahət ocaqlarının şahidi olacağıq.
Bulvara səyahətə çıxanların maraqla qarşıladıqları obyektlərdən biri də buradakı Bayraq muzeyidir. Günəşli havalarda əməkdaşlar türkün müzəffər bayraqlarını açıq havaya çıxarır. Bayraqlar musiqi sədaları altında bulvarın daxilində gəzdirilir. Muzey əməkdaşları bəzi yerlərdə dayanır və bayraqlar barədə geniş məlumat verirlər. 
Xarici turistlərə Sumqayıtın simvolu olan göyərçin eksponat təqdim edilir. Onlar üçün şagirdlərin ifasında ölkəmiz, ordumuz, qəhrəmanlar haqqında şeirlər səsləndirilir. 
Bayraq muzeyi ilə üzbəüz yerləşən Muğam mərkəzinin kollektivi də turistlərə xüsusi proqram təqdim edir. Bulvarın bir neçə yerində quraşdırılmış səsgücləndiricilərlə ətrafa yayılan xalq musiqisi, Sumqayıtın musiqi ustalarının vaxtaşırı təşkil olunan konsertləri bulvara gələnlərin əhvalına xoş ovqat qatır. Xarici ölkələrdən şəhərə təşrif buyuran turistlər isə mikrofon önündə Sumqayıtla bağlı təəsüratlarını bölüşür və bundan çox məmnun olduqlarını bildirirlər. Bu, heç bir fotoya sığmayan, sosial şəbəkədə heç bir paylaşımla ifadə edilə bilməyən canlı təəssüratdır.
Bulvarda həyata keçirilən layihələrdən biri də sərgilərlə bağlıdır. Xüsusən kitab sərgilərini qeyd etmək istərdik. Xarici qonaqlar Azərbaycanın, eləcə də dünyanın tanınmış yazıçılarının kitablarını həvəslə alırlar. Turist üçün öz xalqının yazıçısının əsərini Azərbaycan dilində görmək maraqlı olur. Daha bir sərgi mətbəxlə bağlıdır. Hər həftənin şənbə günü bu sərgiyə mətbəximizin ləziz nemətləri çıxarılır. Yaşıllıqlar qoynunda ləzzətli təamlarımızı dadmağı avropalılar çox sevir.
Turistlərin sayına gəlincə, təxmini hesablamaya görə, ötən müddətdə bulvarı milyondan çox insan ziyarət edib. Rusiya, Belarus, Almaniya, Cənubi Koreya, Yaponiya, ərəb ölkələrindən və digər yerlərdən gələn turistlər buradan xoş təəssüratla qayıdırlar. 
Bulvarın işıqlandırılması da yüksək səviyyədədir. Ərazinin hər tərəfi "ağıllı fanar"larla işıqlandırılır. 3, 6 və 9 metrlik işıq dirəkləri qəlboxşayan mənzərə yaradır. Üstəlik uşaqların istirahəti də yaddan çıxmayıb. İki yerdə quraşdırılan oyun manejləri uşaqların sevimli məkanıdır. Açıq səma altında quraşdırılan səhnə isə bayram tədbirlərinin məkanıdır. Yeni il, Novruz, Ramazan və digər bayramlar burada geniş insan kütləsinin iştirakı ilə keçirilir. Respublikanın mədəniyyət xadimlərinin konsert proqramları xüsusi maraqla qarşılanır. 
Sumqayıt bulvarı həm də yeni iş yerləri deməkdir. İndi burada 240 nəfər daimi işlə təmin edilib. Mühafizə sistemi 9 post üzrə şaxələnib. Ərazi növbəli şəkildə 24 saat ərzində mühafizə olunur. 
Sumqayıt bulvarı dünyada keçirilən beynəlxalq müsabiqələrdə, konfranslarda layiqincə təmsil edilir. 2017-ci ildə keçirilən beynəlxalq sərgidə birinci mükafata layiq görülüb. Həmin sərgidə onlarca Avropa ölkəsinin nümayəndələrinə məsləhət görülüb ki, müasirliyi və yenilikçiliyi öyrənmək istəyənlər Sumqayıta yollansınlar. Elə buna görədir ki, hazırda bir neçə ölkədə Sumqayıt bulvarının oxşarını yaratmaq qərara alınıb. 

Akif ƏLİYEV,
"Azərbaycan"