Starteji Obyektlərin Mühafizəsi Dövlət Agentliyinin (SOMDA) rəhbərliyi və şəxsi heyəti 12 dekabr - anım günü münasibətilə Ümummilli Lider Heydər Əliyevin məzarını ziyarət edib.
Strateji Obyektlərin Mühafizəsi Dövlət Agentliyinin Mətbuat Xidmətindən verilən məlumata görə Strateji Obyektlərin Mühafizəsi Dövlət Agentliyinin rəisi, general-mayor Sərdar Səfərovun rəhbərliyi ilə Agentliyin əməkdaşları müstəqil və müasir Azərbaycanın qurucusu, xalqımızın xilaskarı Ulu Öndər Heydər Əliyevin məzarının önünə əklil və gül dəstələri qoyub, əziz xatirəsini böyük ehtiramla anıblar.
Görkəmli oftalmoloq-alim, akademik Zərifə Əliyeva, tanınmış dövlət xadimi Əziz Əliyev və professor Tamerlan Əliyevin də xatirələri yad edilib, məzarları üzərinə gül dəstələri düzülüb.
Sonra anım tədbiri Agentliyin konfrans zalında davam edib. Tədbirdə Azərbaycan Respublikasının Dövlət Himni səsləndirilib, Ümummilli Lider Heydər Əliyevin və torpaqlarımızın bütövlüyü uğrunda canlarını fəda edənlərin əziz xatirəsi bir dəqiqəlik sükutla yad edilib.
Tədbiri giriş sözü ilə açan Agentliyin rəisi, general-mayor Sərdar Səfərov Ulu Öndər Heydər Əliyevin Azərbaycana rəhbərlik etdiyi dövrün ölkəmizdə həyatın bütün sahələrində inkişaf, quruculuq dövrü kimi tarixə düşdüyünü qeyd edib, onun zəngin rəhbərlik təcrübəsinin müstəqilliyimizin ilk illərində qarşıya çıxan problemlərin həllində mühüm rol oynadığını diqqətə çatdırıb.
Ulu Öndərin qısa zaman kəsiyində sabitliyi, əmin-amanlığı bərqərar etdikdən sonra iqtisadi dirçəlişimizin əsasını qoyan “Əsrin müqaviləsi” ilə Azərbaycanı dünyada söz sahibi etdiyini, etibarlı tərəfdaş kimi tanıtdığını deyən natiq, ölkəmizi parçalamaqdan, bölünməkdən qorumağın vahid bir ideologiya əsasında mümkünlüyünü böyük uzaqgörənliklə müəyyənləşdirən Ümummilli Liderin azərbaycançılıq ideologiyası ilə xalqımızı bir bayraq altında birləşdirdiyini vurğulayıb.
Qeyd olunub ki, Ümummilli Liderin ən böyük arzusu Vətən torpaqlarının işğaldan azad olunması idi. Ulu Öndər ideyalarından güc alan xalqımız Müzəffər Ali Baş Komandan İlham Əliyevin ətrafında daha sıx birləşərək, beş il öncə XXI əsrin hərb tarixinə əbədi həkk olan qələbəyə imza atdı. 2023-cü ildə keçirilən antiterror tədbirləri ilə Azərbaycan suverenliyini tam bərpa etdi, Xankəndidə üçrəngli bayrağımız dalğalandı, Ulu Öndərin vəsiyyəti yerinə yetirildi.
Tədbirdə iştirak edən digər çıxışçılar ərazi bütövlüyünə, suverenliyinə qovuşan ölkəmizin Ulu Öndərin siyasi varisi Prezident İlham Əliyevin rəhbərliyi ilə daha böyük uğurlar əldə edəcəyinə inamlarını ifadə edib, gələcək nəsillərin müstəqil, müasir Azərbaycanın qurucusu Heydər Əliyevin adı ilə daim fəxr edəcəklərini vurğulayıblar.
Sonda Ümummilli Lider Heydər Əliyevə həsr olunmuş sənədli film nümayiş olunub.
“Azərbaycan”
jpg_1769674036.jpg)
