18 Mart 2023 01:50
407
İQTİSADİYYAT
A- A+

Savad fermeri həm də ziyandan qoruyur

 

Azərbaycanda həyata keçirilən genişmiqyaslı layihələr demək olar ki,  ölkə iqtisadiyyatının bütün sahələrini əhatə edir. Təbii ki, bu sırada aqrar sektorda da var. Həmin layihələr hesabına kənd təsərrüfatına aid müasir dünya təcrübəsi öyrənilir, yüksək texnologiyalar tətbiq olunur və bunun sayəsində fermerlərimiz ciddi nailiyyətlərə imza atırlar. 
Kənd Təsərrüfatı Nazirliyi yanında yaradılmış Fermerlər Şurası bu yeniliklərin təbliğində fəal rol oynayır. Tərkibi 6 aydan bir rotasiya qaydasında yenilənən şurada ölkənin 15 bölgəsindən taxılçılıq, pambıqçılıq, tütünçülük, meyvəçilik, heyvandarlıq, arıçılıq, toxumçuluq və digər sahələr üzrə fəaliyyət göstərən qabaqcıl fermerlər təmsil olunurlar. Ölkənin aparıcı fermerlərinin belə bir formatda birləşməsi həm qabaqcıl təcrübənin sürətlə yayılmasına, həm də gündəmə çıxan problemlərin zamanında həllinə imkan yaradır. 
Fermerlər Şurasının bir neçə gün əvvəl keçirilən toplantısında da kənd təsərrüfatının müxtəlif sahələrinin inkişafı ilə bağlı fikir mübadiləsi aparılmış, bir sıra aktual məsələlər müzakirə edilmişdir. Tədbirdə fermerlər məhsuldarlığın yüksəldilməsi üçün aqrotexniki tədbirlərin ardıcıllığından, torpaq sahələrinin dincə qoyulmasından, aqrokimyəvi analizlərin aparılmasının zəruriliyindən  danışmışlar. Müzakirə olunan mövzuların sırasında mineral gübrə, dərman və pestisidlərdən düzgün istifadə, zərərvericilərə qarşı mübarizə tədbirləri də diqqət mərkəzində olmuşdur. 
Qeyd edilmişdir ki, məhsuldarlıq yalnız yeni texnologiyaların tətbiqindən  yox, həm də istehsalçılar arasında maarifləndirmə tədbirlərinin davam etdirilməsindən, qabaqcıl təcrübənin yayılma sürətindən asılıdır. Aparılan müzakirələrdə fermerlərin özləri də etiraf edirlər ki, yüksək məhsulun əldə edilməsi üçün mineral gübrələrdən düzgün istifadə etmək, toxum və texnikadan elmi qaydada faydalanmaq vacib rol oynayır. Əkin sahələrində bitkinin qida ehtiyacları bilinməyəndə, əkin düzgün becərilməyəndə, gübrələr kor-koranə veriləndə ildən-ilə həm torpağın münbitliyi, həm də məhsuldarlıq aşağı düşür. 
Qubadan fermer Kərim Həsənov deyir ki, 7 hektar dəmyə torpaqda neçə ildir arpa əkir. Özü də bilir ki, torpaq zəifdir, amma pul xərcləməyə də əli gəlmir: "Artıq 7 ildir ki, hektardan güclə bir ton arpa biçirəm. Biz kəndlilər arpanı əkirik, sonra da ruzini Allahdan gözləyirik. Amma fasiləsiz əkilən torpaq gücdən düşür, tələb edir ki, onun qayğısına qalaq. Mütəxəssislər çağırmışam, analiz ediblər ki, torpaq çox zəifdir, qulluğa, gübrəyə ehtiyacı var. Gərək çoxdan məsləhətləşəydim". 
Göründüyü kimi, Azərbaycanda fermerlər bağlara, əkin sahələrinə qulluq edilməsində aqranomlara getdikcə daha çox müraciət etməyə, aqrotexniki qaydalar çərçivəsində işləməyə meyillidirlər. Artıq bilirlər ki, əkin sahələrində torpaqlar analiz ediləndə tələb olunan qida maddələrinin miqdarı düzgün təyin edilir. Bundan başqa, torpaq mühitinin reaksiyasını, duzluluğunu da öyrənmək olur. Fermerlər belə geniş analizlərin nəticələrinə uyğun nə əkib-becərəcəklərini, necə dərman verəcəklərini asanlıqla dəqiqləşdirə bilirlər. Üstəlik, torpağın aqrokimyəvi analizi aparıldıqda ona qulluq etmək də asandır. 

Bahadur İMANQULİYEV, 
"Azərbaycan"

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video