"İslam Əməkdaşlıq Təşkilatı (İƏT) ilə Azərbaycanın əlaqələri çox geniş və əhatəlidir. Bu günlərdə Bakıda İƏT-ə üzv olan ölkələrin əmək nazirlərinin V konfransı keçirilir. Ölkələr arasında əmək, məşğulluq, əmək münasibətlərinin tənzimlənməsi, eyni zamanda, əməyin təhlükəsizliyi kimi istiqamətlərdə müxtəlif məsələlər müzakirə olunur və ən yaxşı təcrübələr bölüşülür. Bu nöqteyi-nəzərdən xüsusilə İslam Əməkdaşlıq Təşkilatının alt qurumu olan İslam Ölkələrinin Statistik, İqtisadi və Sosial Araşdırmalar və Təlim Mərkəzinin (SESRIC) rolu danılmazdır. Həm statistik data, həm də iqtisadi-sosial məsələlərə dair araşdırmalar baxımından SESRIC bizim ölkələr üçün tövsiyələri hazırlayır, ən yaxşı təcrübələri bölüşür. SESRIC ilə imzalanan Anlaşma Memorandumu Əmək və Əhalinin Sosial Müdafiəsi Nazirliyi və onun qurumları ilə SESRIC arasında bir əməkdaşlıq platforması yaratmaq üçündür. Memorandum Əmək və Əhalinin Sosial Müdafiəsi Nazirliyi və onun alt qurumları ilə birgə əməkdaşlıq layihəsinin hazırlanması baxımından önəmlidir".

AZƏRTAC xəbər verir ki, bunu əmək və əhalinin sosial müdafiəsi naziri Sahil Babayev Əmək və Əhalinin Sosial Müdafiəsi Nazirliyində SESRIC-in Baş direktoru Zehra Zümrüd Selçukun başçılıq etdiyi nümayəndə heyəti ilə görüş zamanı deyib.

Azərbaycanın sosial müdafiə sahəsində müxtəlif yeniliklərinin və əldə etdiyi uğurların olduğunu deyən nazir bildirib: "Bir tərəfdən Birinci vitse-prezident Mehriban xanım Əliyevanın təşəbbüsü olaraq DOST mərkəzlərinin yaradılması, həmin mərkəzlərdə 159 xidmətin göstərilməsi, 140-dan çox xidmətin elektronlaşdırılması Azərbaycanın əldə etdiyi nailiyyətlərdəndir. Digər tərəfdən isə vətəndaşlara göstərilən xidmətin həcmi, Prezidentin müvafiq fərman və sərəncamları ilə qısa müddət ərzində minimum əməkhaqqı və pensiyaların, orta median əməkhaqqı və pensiyaların ciddi şəkildə artırılması, ölkədə böyük bir sosial islahat paketinin icrası bizim əldə etdiyimiz uğurlardır. Təsadüfi deyil ki, son iki ildə Əmək və Əhalinin Sosial Müdafiəsi Nazirliyinin xidmətləri və qurumları 36 beynəlxalq mükafatla təltif olunublar. Biz bu təcrübəmizi İslam ölkələri ilə geniş şəkildə bölüşəcəyik. Hazırda həmin ölkələrdən Özbəkistanla çox ciddi əməkdaşlığımız davam edir. Özbəkistanda həm xidmətlərin elektronlaşdırılması, həm də vahid pəncərənin yaradılması istiqamətində ekspert dəstəyimizi göstəririk. Paralel olaraq Moldova, Serbiya və Rumıniyada da analoji işlər həyata keçirilir. Bu işlərin daha çox İslam ölkəsini əhatə etməsi, əhatə dairəsinin daha da genişləndiriməsi üçün SESRIC platforması bizə dəstək olacaq. Həmin platformadan istifadə edərək əldə etdiyimiz nailiyyətləri digər İslam ölkələri ilə bölüşəcək və onlarla qarşılıqlı faydalı əməkdaşlıq edəcəyik".