Məlum olduğu kimi, dövlət başçısı "Azərbaycan Respublikası Rəqabət Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında" qanunu imzalamışdır. Qanun iyulun 1-dən qüvvəyə minir.
Məlumdur ki, rəqabət olmayan yerdə tələb-təklifin formalaşdırdığı bazar iqtisadiyyatından söhbət gedə bilməz. Normal liberal iqtisadiyyat üçün inhisarçılığın, rəqabətə zidd davranışların, haqsız rəqabətin qarşısının alınması, tənzimləmə prosesinin bazar iqtisadiyyatına uyğun qurulması mexanizmlərini özündə ehtiva edən şərait olmalıdır. Bu baxımdan sözügedən məcəllənin qəbul olunmasının ölkə iqtisadiyyatının daha sürətli inkişafını təmin edəcəyi şübhəsizdir. Ən azından o səbəbdən ki, sənəddə inhisarçılığın, rəqabətə zidd davranışların, haqsız rəqabətin qarşısının alınması və tənzimləmə prosesinin bazar iqtisadiyyatına uyğun qurulması mexanizmləri ehtiva edilmişdir.
Əslində, Azərbaycanda sağlam rəqabətin mövcud olması ilə bağlı son illər ardıcıl addımlar atılmışdır. Bu məsələ üzərində hələ 2004-cü ildən iş gedirdi. Əvvəllər belə yanlış təsəvvür yaranmışdı ki, Rəqabət Məcəlləsi qəbul edilən kimi ölkədə ədalətli rəqabət tam təmin olunacaq. Təbii ki, bu cür yanaşma düzgün deyildi. Çünki bunun üçün ilk növbədə zəruru şərait formalaşdırılmalı, parlamentdə alt qanunlar qəbul edilməli, yaxud təkmilləşdirilməli idi. Və iddia edə bilərik ki, belə də oldu. Ölkədə iqtisadiyyatın dinamik inkişafı, biznes mühitində əlverişli şərait və azad sahibkarlığa geniş meydan verilməsi üçün qəbul edilən "Antiinhisar fəaliyyəti haqqında", "Haqsız rəqabət haqqında", "Təbii inhisarlar haqqında" qanunlar və digər normativ hüquqi aktlar sonda "Rəqabət Məcəlləsi haqqında" qanunun dövlət başçısı tərəfindən imzalanması ilə nəticələndi.
Sözsüz ki, məcəllənin qəbul edilməsi ilə iqtisadi tənzimlənmədə səmərəlilik daha da yüksələcək. Məcəllənin işləməsi ilə bazarda formalaşacaq rəqabət mühiti və azad rəqabət şəraiti bazar iştirakçılarının sayını artıracaq, üstəlik, yerli təsərrüfat subyektlərinin daxili və xarici bazarlarda rəqabət qabiliyyəti artacaq. Sənəd eyni zamanda istehlak bazarında qiymətlərin optimallaşdırılmasını təmin edəcək. Başqa sözlə desək, bəzi hallarda müşahidə etdiyimiz subyektiv bahalaşmanın qarşısını alacaq ki, bu da birbaşa vətəndaşların sosial rifahının artmasına səbəb olacaq.
Rəqabət Məcəlləsi həm də inhisarçılığa qarşı mübarizə, kiçik və orta sahibkarlığın daha yaxından dəstəklənməsi baxımından əhəmiyyətlidir. Yeni iş yerlərinin açılmasına təkan verəcək, məhsulların və ximətlərin çeşidliliyi üçün seçim imkanı yaradacaq məcəllə, ekspertlərin fikrincə, istehsalın və təklifin artması hesabına qiymətlərin ucuzlaşmasına da gətirib çıxaracaq.
Milli Məclisin deputatı, iqtisadçı-ekspert Vüqar Bayramov deyir ki, uzun müddət idi Rəqabət Məcəlləsinin qəbulu müzakirə olunurdu: "Çünki bu, iqtisadiyyatın sağlamlaşdırılması baxımından kifayət qədər vacib qanunlardan biridir. Bu gün bütün inkişaf etmiş ölkələrdə sözügedən istiqamətdə qanunvericilik var. Avropa İttifaqında ən vacib qanunlardan biri rəqabət ilə bağlı qanundur. Ona görə də Rəqabət Məcəlləsinin təsdiqi Azərbaycanın iqtisadiyyatında rəqabətin daha yaxından dəstəklənməsində, bazarın liberallaşmasında, bazara çıxış imkanlarının artırılmasında və inhisara qarşı mübarizənin gücləndirilməsində xüsusi paya malik olacaq". Vüqar Bayramov onu da əlavə edib ki, Rəqabət Məcəlləsinin təsdiqi Azərbaycan iqtisadiyyatında yeni səhifənin açılması kimi xarakterizə edilir və bu, yeni dövrdə islahatların daha da dərinləşəcəyindən xəbər verir.
Züleyxa ƏLİYEVA,
"Azərbaycan"
