Ölkədə qeyri-neft sektorunun, o cümlədən kənd təsərrüfatının inkişafının sürətləndirilməsi üçün Prezident İlham Əliyevin imzaladığı çoxsaylı sərəncamlar bölgələrdə emal sənayesinin təşəkkül tapmasını təmin etmiş, insanların məşğulluğunun təminatı istiqamətində irəliləyişlərə nail olunmasına təkan vermişdir. Belə rayonlardan biri də Ağstafadır.
Əvvəlki illərdə olduğu kimi, cari ildə də Ağstafada bütün sahələr üzrə yüksək göstəricilər əldə edilmişdir. Keçən ilin müvafiq dövrü ilə müqayisədə rayon üzrə kənd təsərrüfatı məhsullarının istehsalı 7,7 faiz artmışdır. Artım həmçinin əhaliyə göstərilən pullu xidmətlərdə, pərakəndə əmtəə dövriyyəsində qeydə alınmışdır. Rayon üzrə orta aylıq nominal əməkhaqqı isə 2,1 faiz artaraq 421,3 manata çatmışdır. Digər mühüm fakt: həyata keçirilən tədbirlər nəticəsində rayonda 685 yeni iş yeri açılmışdır ki, bunun da 65,2 faizi daimidir. Bundan başqa, ötən dövr ərzində özünüməşğulluq layihəsinə qoşulmaq üçün müraciət edənlərdən 162 nəfəri təlimlərə cəlb olunmuşdur.
Ağstafanın da iqtisadiyyatının əsasını kənd təsərrüfatı təşkil edir. Cari ilin ötən dövründə rayon üzrə bu sahədə böyük uğurlar əldə edilmişdir. Hazırda gələn ilin məhsulu üçün bünövrə qoyan fermerlər qısa vaxt ərzində 9750 hektarda payızlıq şum qaldırmış, 1520 hektarda arpa, 8250 hektarda buğda səpini aparmışlar. Fermerlərin güzəştli şərtlərlə gübrə, eləcə də suvarma suyu ilə təminatında elə bir ciddi problem yoxdur. Yeri gəlmişkən, qeyd edək ki, indiyədək “Ağstafaçay” Hidroqovşağı İstismarı İdarəsi tərəfindən 23 hidrotexniki qurğu, 12 hidropost və 21 kilometr beton kanallar təmir olunmuşdur.
Ağstafada arıçılığın inkişafı üçün geniş imkanlar var. Bu imkanlardan maksimum istifadə etməyə çalışan arıçılar keçən il hər arı ailəsindən 10 kiloqram bal götürmüşlər. Cari il isə onlar həmin rəqəmi 14 kiloqrama çatdırmışlar. Ümumilikdə keçən il rayon üzrə 70 ton bal istehsal edilmişdisə, bu il təknələrdən 80 ton məhsul götürülmüşdür. Bu sahəyə aid başqa fakt ondan ibarətdir ki, hazırda rayonda 358 arıçı elektron kənd təsərrüfatı informasiya sistemində qeydiyyatdan keçmişdir. Bəyan edilmiş arı pətəklərinin sayına uyğun olaraq hesablanmış subsidiya Aqrar Kredit və İnkişaf Agentliyi tərəfindən arıçıların fermer kartlarına köçürülmüşdür.
Rayon taxılçılarının da göstəriciləri yüksək olmuşdur. Belə ki, cari il 10288 hektarda taxıl yetişdirən fermerlər hər hektardan 36,4 sentner buğda, 28,1 sentner arpa biçmişlər.
Məlum olduğu kimi, ölkədə qeyri-neft sektorunun inkişafı ilə bağlı həyata keçirilən tədbirlər çərçivəsində iqtisadi cəhətdən səmərəli olan istehsal sahələrinin dirçəldilməsi prioritet vəzifə kimi qarşıya qoyulmuşdur. Baramaçılıq da həmin sahələrdəndir. Ağstafalılar cari il 80 qutu barama qurdu götürmüşlər ki, bu da keçən ilkindən 15 qutu çoxdur. Kümçülər götürdükləri barama qurduna yüksək səviyyədə qulluq göstərərək 5 min kiloqramdan çox məhsul təhvil vermişlər.
Cari ilin ötən dövrü ərzində rayonda abadlıq və yenidənqurma işləri də davam etdirilmişdir. Ağstafa şəhəri abadlaşdırılmış, o cümlədən küçə və meydanlar yenidən qurulmuş, çoxmənzilli yaşayış binaları təmir olunmuşdur. Bu cür işlər qəsəbə və kəndlərdə də aparılmışdır. Bundan başqa, kənd və qəsəbə nümayəndəlikləri tərəfindən 66,2 kilometr uzunluğunda suvarma arxı təmizlənmiş, 40,1 kilometr yola çınqıl tökülmüş, 117 elektrik dayağı yenisi ilə əvəz edilmiş, 19 su keçidi salınmış, 33 elektrik transformatoru və 82 subartezian quyusu təmir olunmuş, 2,6 kilometr içməli su xətti dəyişdirilmişdir.
Ötən dövr ərzində rayonun yol infrastrukturu da yaxşılaşdırılmışdır. Respublika əhəmiyyətli Ağstafa-Poylu-Gürcüstan Respublikası ilə dövlət sərhədi avtomobil yolunda olan su keçid borularının giriş-çıxışları təmizlənmiş, yol örtüyündə əmələ gələn çatlar aradan qaldırılmış, asfalt beton örtükdə əmələ gələn çalalar təmir edilmiş, qırılmış siqnal dirəkləri yenisi ilə dəyişdirilmiş, lazım olan yerlərə yol nişanları quraşdırılmışdır. Yerli əhəmiyyətli Düzqışlaq-Kolayır, Mollacəfərli-Kolxəlfəli, Tatlı-Köçəsgər, Vurğun-Köhnəqışlaq və Ağstafa-Aşağı Kəsəmən-Zəlimxan avtomobil yollarında isə çiyinlər təmir edilmişdir.
Təhsil infrastrukturunun daha da müasirləşdirilməsi istiqamətində son illər Ağstafa rayonunda ciddi işlər görülmüşdür. “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nda Ağstafa rayonu üzrə 5 yeni məktəb binasının tikintisi, 4 məktəbdə isə əsaslı təmir işlərinin aparılması nəzərdə tutulmuşdur. Artıq Sadıqlı kənd tam orta məktəbinin 360 yerlik yeni binası istifadəyə verilmişdir. Heydər Əliyev Fondu tərəfindən Həsənsu kənd tam orta məktəbi üçün inşa olunan 420 şagirdlik yeni məktəb binasında isə son tamamlama işləri görülür.
Artıq 2021-ci ilin başa çatmasına az vaxt qalır. İndi hər kəs yola saldığımız bu ildə gördüyü işlərə, qazandığı uğurlara nəzər salır və növbəti il üçün görəcəyi işləri götür-qoy edir. Belə bir vaxtda ağstafalıların da deməyə sözləri çoxdur. Çünki onlar əvvəlki illər kimi, cari ili də yüksək nailiyyətlərlə yola salırlar.
Sabir ƏLİYEV,
“Azərbaycan”
jpg_1765800994.jpg)
jpg_1765800788.jpg)
