Şimal dəhlizi və Trans-Xəzər Beynəlxalq Nəqliyyat Marşrutu (TITR) Asiyadan Avropaya dəmir yolu ilə yükdaşımalarda əsas istiqamətlər olaraq qalır.
AZƏRTAC xəbər verir ki, bu barədə Bakıda keçirilən “Qara və Xəzər Logistika Forumu - 2025: Dəhlizlər, yüklər, infrastruktur” (“Black and Caspian Freight Forum – 2025”) konfransında çıxışı zamanı “DB Cargo Eurasia GmbH” şirkətinin Qazaxıstan və Mərkəzi Asiyada Logistika şöbəsinin rəhbəri, “DB Engineering & Consulting GmbH” filialının direktor müavini Altınbek Akılbekov bildirib.
O qeyd edib ki, Şimal marşrutu yüklərin əsas hissəsinin daşınmasını davam etdirir, lakin dəyişən bazar reallıqları kontekstində Trans-Xəzər dəhlizi daha fəal inkişaf edir. “Biz həm üstünlükləri, həm də mövcud maneələri görürük, onlar marşrutun təkmilləşdirilməsi üçün, xüsusən də tək konteynerlər göndərilərkən aradan qaldırılmalıdır”, -deyə ekspert vurğulayıb.
Akılbekov əlavə edib ki, Orta Dəhliz son vaxtlar yüksək səmərəlilik nümayiş etdirib. Bununla belə, fərdi konteynerlər göndərilərkən çətinliklər, o cümlədən sanksiyalar səbəbindən marşrutun dəyişdirilməsi zərurəti ilə bağlı problemlər yaranır. Məsələn, əvvəlcə Şimal marşrutu ilə göndərilən yüklər təkrar olaraq Trans-Xəzər dəhlizinə yönləndirilə bilər ki, bu da çatdırılma müddətini artırır.
Ekspert daha sonra deyib: “Konstantsa limanına gedən marşrutda bəzi hallarda tək konteynerin çatdırılması standart 17-20 gün əvəzinə 35-50 gün çəkə bilər. Bu, dəqiq son tarixləri planlaşdıran yükgöndərənlər və alıcılar üçün çətinliklər yaradır”.
Akılbekovun sözlərinə görə, bu gün bazar iştirakçılarının əsas marağı çatdırılma müddətlərinin azaldılmasına yönəlib: “Mütəmadi konteyner marşrutları ilə müddətlər dəmir yolu administrasiyaları tərəfindən tənzimlənir və yüksək etibarlılıq nümayiş etdirir. Azərbaycan və Qazaxıstan dəmir yollarının, eləcə də Bakıdakı liman infrastrukturunun yaxşı əlaqələndirilmiş işi sayəsində Şimal və Orta dəhlizlərdə logistika məsələləri səmərəli şəkildə həll olunur”, - deyə ekspert sözlərini yekunlaşdırıb.
jpg_1765800994.jpg)
jpg_1765800788.jpg)
