Azərbaycan Prezidenti İlham Əliyevin 2025-ci il oktyabrın 21-də Qazaxıstan Respublikasının paytaxtı Astanada verdiyi bəyanatlar və Azərbaycan–Qazaxıstan Ali Dövlətlərarası Şurasının ikinci iclasındakı çıxışı qardaşlıq, strateji tərəfdaşlıq və qarşılıqlı etimadın ən yüksək təzahürüdür.
Bu fikirləri Milli Məclisin deputatı, Azərbaycan-Qazaxıstan parlamentlərarası əlaqələr üzrə işçi qrupunun üzvü Fatma Yıldırım deyib. Deputat bildirib ki, bu çıxış həm regionun gələcəyi, həm də Türk dünyasının birliyi baxımından mühüm siyasi və geosiyasi mesajlarla zəngindir: «Cənab Prezident İlham Əliyevin fikirləri bir daha göstərdi ki, Azərbaycan–Qazaxıstan münasibətləri təkcə dövlətlərarası əməkdaşlıq deyil, həm də ortaq tarixi, mədəni və mənəvi köklərə söykənən qardaşlıq münasibətləridir. Bu münasibətlərdə hər iki ölkə bir-birinə etibarlı tərəfdaş, sınaqlardan keçmiş dost və Türk dünyasının birliyinə töhfə verən aparıcı dövlətlər kimi çıxış edir. Dövlət başçımızın vurğuladığı kimi, Prezident Kasım-Jomart Tokayevin müdrik rəhbərliyi altında Qazaxıstanın sosial-iqtisadi inkişafı, modernləşmə və süni intellekt kimi yeni texnologiyaların tətbiqi sahəsində atdığı addımlar bütün region üçün örnəkdir. Bu, təkcə Qazaxıstanın inkişafının deyil, həm də Mərkəzi Asiyanın sabit və dayanıqlı gələcəyinin təminatıdır. Azərbaycan bu inkişafı qardaş sevinci ilə izləyir və dəstəkləyir».
Millət vəkilinin sözlərinə görə, bugün Azərbaycan və Qazaxıstan beynəlxalq müstəvidə bir-birinə daim dəstək verən, vahid mövqedən çıxış edən iki dövlət kimi möhkəm təməl üzərində dayanır: «Türk Dövlətləri Təşkilatı, BMT, İslam Əməkdaşlıq Təşkilatı və digər beynəlxalq platformalarda bu həmrəylik daim özünü göstərir. Qazaxıstanın Ermənistan-Azərbaycan münaqişəsi dövründə Azərbaycanın haqlı mövqeyini dəstəkləməsi, işğal illərində və ondan sonra göstərdiyi həmrəylik bu qardaş münasibətlərinin dərinliyini nümayiş etdirir. Cənab Prezident Cənubi Qafqazda sülhün və əməkdaşlığın artıq real mərhələyə qədəm qoyduğunu Astanada bir daha dünyaya bəyan etdi. Vaşinqtonda sülh sazişinin paraflanmasından sonra Azərbaycanın Ermənistana qarşı tranzit məhdudiyyətlərini aradan qaldırması, ilk tranzit yükün Qazaxıstandan Ermənistana taxıl daşınması olması sülhün artıq praktik müstəviyə keçdiyinin parlaq göstəricisidir. Bu hadisə həm də göstərir ki, Azərbaycan sülhsevər siyasət yürüdür və regionda bütün dövlətlərin sabitliyi və rifahı naminə konstruktiv addımlar atır».
Fatma Yıldırım qeyd edib ki, Qazaxıstanın azad olunmuş ərazilərin bərpasında, Füzulidə inşa edilən Kurmanqazı adına Uşaq Yaradıcılıq Mərkəzi ilə simvolik dəstəyi hər bir azərbaycanlı üçün dərin mənəvi əhəmiyyət daşıyır. Bu mərkəz yalnız bir təhsil ocağı deyil, Azərbaycan və Qazaxıstan qardaşlığının rəmzidir. Qarabağın dirçəlişində bu cür qardaş dəstəyi “Böyük Qayıdış” proqramının uğuruna töhfə verir. Cənab Prezidentin çıxışında vurğulandığı kimi, Zəngəzur dəhlizi və Orta Dəhliz təkcə Azərbaycan və Qazaxıstan üçün deyil, bütün Avrasiya regionu üçün yeni imkanlar açır. Zəngəzur dəhlizinin 2028-ci ilə qədər tam istismara verilməsi planlaşdırılır və bu, Asiyadan Avropaya uzanan ticarət və logistika xəritəsini köklü şəkildə dəyişəcək. Bu layihələr sayəsində Azərbaycan və Qazaxıstan regionda enerji, logistika və kommunikasiya körpüləri quraraq Avrasiyanın iqtisadi inteqrasiyasına rəhbərlik edən dövlətlərə çevrilməkdədir. Bu gün Cənubi Qafqaz və Mərkəzi Asiya vahid geostrateji məkan kimi bir-birinə bağlanır. Türk Dövlətləri Təşkilatı çərçivəsində formalaşan yeni əməkdaşlıq mühiti xalqlarımızı daha da yaxınlaşdırır.
Deputat bildirib ki, Azərbaycan gələn il həm İslam Əməkdaşlıq Təşkilatının Sammitinə, həm də Asiyada Qarşılıqlı Fəaliyyət və Etimad Tədbirləri Müşavirəsinin Sammitinə ev sahibliyi etməklə qlobal dialoq və əməkdaşlıq mərkəzi kimi çıxış edəcək. «Cənab Prezident İlham Əliyevin Astanadakı çıxışı bir daha təsdiq etdi ki, Azərbaycan–Qazaxıstan münasibətləri strateji müttəfiqlik səviyyəsini çoxdan aşıb və yeni mərhələyə, geosiyasi əməkdaşlıq, iqtisadi inteqrasiya və ortaq dəyərlər mərhələsinə qədəm qoyub. Bu münasibətlər Türk dünyasının gücünün, Avrasiyanın gələcəyinin və regionda sabitliyin mühüm dayağıdır. Qazaxıstanın uğuru Azərbaycan üçün sevinc, Azərbaycanın uğuru isə Qazaxıstan üçün qürurdur. Qardaşlıq, etimad və ortaq məqsədlər üzərində qurulan bu münasibətlər uzun illər xalqlarımıza sülh, rifah və tərəqqi bəxş edəcək» - deyə Fatma Yıldırım vurğulayıb.
Rəşad CƏFƏRLİ,
«Azərbaycan»
