Ölkəmizin sürətli inkişafında vətənpərvər, fəal və məqsədyönlü gənclərimizin rolu danılmazdır. Müstəqillik dövrünün imkanlarından bəhrələnən Azərbaycan gənci yalnız texnologiya və təhsil sahəsində deyil, həm də milli-mənəvi dəyərlərə sədaqət və dövlətçilik ənənələrinə bağlılığı ilə seçilir. Doğma Vətənin tarixi yaddaşına sahib çıxmaq, milli kimliyi qorumaq və onu gələcək nəsillərə ötürmək bu gün gəncliyin üzərinə düşən ən vacib vəzifələrdəndir.
Tarixi yaddaşa sədaqət, bu günə ehtiram
Bir xalqın ən böyük səadəti dövlətinin müstəqil olmasıdır. Bu mənada Azərbaycan gəncləri çox xoşbəxtdirlər. Prezident İlham Əliyevin vurğuladığı kimi, bu gün Azərbaycan gəncləri müstəqillik dövrünün vətəndaşıdırlar: "Bu, böyük xoşbəxtlikdir. Bu gün hər bir vətənpərvər azərbaycanlı haqlı olaraq fəxr edir ki, o, müstəqil Azərbaycan Respublikasının vətəndaşıdır. Ölkəmizin hərtərəfli inkişafında gənclərimizin çox böyük rolu vardır. Gənclər müxtəlif sahələrdə çox uğurla fəaliyyət göstərirlər, ölkəmizin ümumi inkişafına böyük töhfə verirlər".
Dövlət başçısı İlham Əliyevin imzaladığı sərəncamla Azərbaycan Respublikasında 2025-ci il "Konstitusiya və Suverenlik İli" elan olunub. Bu qərar müstəqilliyin əhəmiyyətinin gənclər arasında daha dərindən aşılanmasında, dövlətçilik ideallarının möhkəmləndirilməsində böyük tol oynayır. Sərəncamda bildirilir ki, müstəqil və suveren dövlətə sahib olmaq, milli-mənəvi dəyərlərə, həmrəylik, humanizm, ədalət və qanunun aliliyi prinsiplərinə əsaslanan inkişaf etmiş cəmiyyət qurmaq yüz illərboyu Azərbaycan xalqının ən böyük arzusu olmuşdur: "Tarixin müxtəlif mərhələlərində kənar müdaxilələrə, məhrumiyyətlərə baxmayaraq, xalqımız milli kimliyini, mübarizə ruhunu qoruyub saxlamış, öz ideallarına həmişə sadiq qalmış və XX əsrin sonlarında dövlət müstəqilliyini bərpa etmişdir".
Lakin həmin illərdə Azərbaycan xalqının dövlət müstəqilliyinə nail olmaq uğrunda mübarizəsini istəməyən, suverenliyinə qarşı çıxan qüvvələr Qarabağı münaqişə ocağına çevirdilər. Keçmiş Sovet İttifaqı rəhbərləri erməni quldurlarının Azərbaycanın Qarabağ və Şərqi Zəngəzur ərazilərini işğal etmələrinə şərait yaratdılar. Otuz ilə yaxın həmin torpaqlar Ermənistanın əsarətində qaldı.
Azərbaycan xalqı Qarabağın və Şərqi Zəngəzurun işğalına son qoyulacağı günlərin arzusu və ümidi ilə yaşadı. O günlər gəldi. 2020-ci il sentyabrın 27-də Ermənistan silahlı qüvvələrinin növbəti təxribatı nəticəsində Vətən müharibəsi başladı. Azərbaycan gəncləri bu xalqın qəhrəmanlıq, vətənpərvərlik ruhunu yenidən bütün dünyaya nümayiş etdirdilər. Minlərlə gənc könüllü olaraq cəbhəyə yollandı.
44 günlük Vətən müharibəsi göstərdi ki, Azərbaycan gənci xalqının haqq savaşında hünər göstərməyə, vətən torpaqlarını yağılardan xilas etmək üçün canından belə keçməyə hər an hazırdır. Onlar Qarabağ və Şərqi Zəngəzuru işğalçı Ermənistanın silahlı qüvvələrindən azad etmək üçün şiddətli döyüşlərdə ruh yüksəkliyi ilə iştirak etdilər. Vətənin azadlığı uğrunda mərdliklə döyüşdülər. Göstərdikləri fədakarlıqlarla bu günün və gələcəyin gənclərinə nümunə oldular.
2020-ci ilin noyabrında Prezident İlham Əliyev Azərbaycan xalqını Zəfər xəbəri ilə müjdələdi. Bu böyük Zəfər Azərbaycan gənclərinə qalib xalqın nümayəndəsi kimi qürurla yaşamağın sevincini bəxş etdi, gələcəyə daha inamla baxmağı aşıladı.
Güclü, sarsılmaz Azərbaycanın bu günü və sabahı
Vətənpərvərlik yalnız döyüş meydanında qazanılan qalibiyyətlə deyil, eyni zamanda elm, təhsil, mədəniyyət və innovasiya sahələrində də özünü göstərir. Müasir Azərbaycan gəncliyi ölkənin elmi-texniki potensialının güclənməsində mühüm rol oynayır. Eyni zamanda gənc rəssamların sərgiləri, musiqi festivalları, ədəbiyyat günləri, teatr layihələri milli mədəniyyətin qorunması və dünyaya tanıdılması baxımından dəyərli təşəbbüslərdir.
Bu gün yüzlərlə gənc beynəlxalq arenalarda ölkəmizi təmsil edir, dünya olimpiadalarında, elmi konfranslarda Azərbaycan adını ucaldır. Onların fəaliyyəti yalnız şəxsi nailiyyət deyil, ölkənin imicinə, beynəlxalq nüfuzuna layiqli töhfələrdir.
Son illər gənclər arasında vətənpərvərlik ideyalarının təşviqi məqsədilə həyata keçirilən dövlət proqramları, layihələr böyük nəticələr verir.
Eyni zamanda geniş vüsət alan könüllülük hərəkatı gənclər arasında həm sosial məsuliyyəti gücləndirir, həm də humanizm dəyərlərini önə çıxarır. "ASAN Könüllüləri", "DOST Könüllüləri", müxtəlif ictimai birliklər və universitetlərin təşəbbüsləri minlərlə gənci bir araya gətirir. Bu tədbirlərdə iştirak edən gənclər cəmiyyətə töhfə verməyin, insanlara yardım etməyin bir vəzifə deyil, mənəvi borc olduğunu dərk edirlər.
Azərbaycan mədəniyyəti yüz illərin süzgəcindən keçərək formalaşmış zəngin irsə malikdir. Bu irsin gənclər arasında təbliği, folklor nümunələrinin öyrənilməsi, milli musiqi və ədəbiyyata marağın artırılması istiqamətində həyata keçirilən tədbirlər gənclərin milli özünüdərkini möhkəmləndirir. Tarixi abidələrin qorunması, mədəni layihələrdə iştirak, eləcə də milli sənətkarlıq nümunələrinin yaşadılması gənclərimizin vətənpərvərlik missiyasının təzahürüdür.
Vətənpərvər gənclik daha da güclü, sarsılmaz Azərbaycanın uğurlu gələcəyi deməkdir. Bu sağlam, müasir olduğu qədər də tarixi keçmişinə, milli dəyərlərinə sıx bağlı olan nəsil öz bilik və bacarığı ilə ölkənin inkişafına töhfə verir, müstəqilliyimizin möhkəmlənməsinə xidmət edir və dövlətimizin nurlu sabahları naminə çalışır.
Zöhrə FƏRƏCOVA,
"Azərbaycan"
