Azərbaycan Milli Elmlər Akademiyasının (AMEA) 80 illik yubileyinin dövlət səviyyəsində keçirilməsi və tədbirdə Azərbaycan Prezidenti İlham Əliyevin şəxsən iştirakı Akademiyanın dövlətimiz, xalqımız üçün necə böyük əhəmiyyət kəsb etməsinin əyani ifadəsidir. Dövlətimizin başçısı tədbirdə dərin məzmunlu çıxış edərək Azərbaycan elmi ilə bağlı fikirlərini bölüşüb.
Bu fikirləri AZƏRTAC-a açıqlamasında Milli Məclisin deputatı Samir Vəliyev söyləyib.
Deputat bildirib ki, Prezident İlham Əliyev çıxışında AMEA-nın keçdiyi yoldan bəhs edərək indiyədək görülən işləri dəyərləndirib.
Prezident İlham Əliyev, eyni zamanda, elm ictimaiyyəti qarşısında dayanan vəzifələr barədə tövsiyələrini verib: "Bu tövsiyələr elmi ictimaiyyətin gələcək fəaliyyətinə istiqamət verəcək”.
Dövlətimiz başçısının çıxışında vacib məqamlardan biri azərbaycanlıların tarixi, dədə-baba yurdlarına qayıtmasıdır. Prezident İlham Əliyev vurğulayıb ki, azərbaycanlıların hazırkı Ermənistana qayıdışı erməni xalqı və dövlətinə heç bir təhlükə yaratmır. Çünki azərbaycanlılar yaşadıqları ölkələrin inkişafına töhfə verən və heç bir problem yaratmayan vətəndaşlardır.
Qərbi azərbaycanlıların geri qayıdışı regionda davamlı sülh və etimadın bərqərar olması üçün mühüm amildir. Azərbaycanlılar yalnız öz doğma yurdlarına dönmək istəyirlər. Azərbaycan xalqı heç vaxt separatizm, etnik təmizləmə və ya revanşizm siyasəti ilə tanınmayıb. Dövlətçilik fəlsəfəmiz multikulturalizm, tolerantlıq və qonşuluq prinsipləri üzərində qurulub. Bu səbəbdən Azərbaycan dövləti Qərbi azərbaycanlıların qayıdışını sülh çərçivəsində və beynəlxalq hüquq normalarına uyğun həyata keçirməyi hədəfləyir. Ermənistan dövləti isə bunu qorxu yox, qarşılıqlı etimadın bərpası üçün imkan kimi dəyərləndirməlidir.
Çünki bir xalqın tarixi hüququ tanınmadan, əzəli yurduna qayıtmasına şərait yaradılmadan bölgədə real sülhdən danışmaq mümkün deyil. Dövlətimizin başçısının dediyi kimi, "azərbaycanlılar heç vaxt separatizm xəstəliyinə düçar olmamışlar".
Onun sözlərinə görə, “Qayıdış prosesi həm də elmi, mədəni və ictimai mübarizədir. Tarixi saxtalaşdırmalara qarşı elmi faktlarla cavab verilməli, arxiv sənədləri, xəritələr, etnoqrafik məlumatlar üzə çıxarılmalıdır”, - deyən Samir Vəliyev əlavə edib ki, Azərbaycan tarixinin düzgün yazılması, onun təbliği və gənc nəslə çatdırılması strateji məsələdir. Gənclər bilməlidirlər ki, bugünkü müstəqil Azərbaycanın gücü, bütövlüyü və suverenliyi əsrlərlə aparılan mübarizənin nəticəsidir. Bu istiqamətdə daha çox elmi əsərlərə, sənədli filmlərə, kitabçalara və sərgilərə ehtiyac var. Hər bir məktəbdə, universitetdə, kitabxanada Qərbi Azərbaycan tarixi ayrıca öyrədilməlidir. Gənclər anlamalıdırlar ki, qayıdış ideyası təkcə fiziki deyil – həm də mənəvi və milli dirçəlişin simvoludur. Doğrudur, bu yöndə elmi əsərlər, kitablar yazılır. Amma Prezident İlham Əliyevin dediyi kimi, bütün bunlar daha çox olmalıdır. Ona görə də, elmi ictimaiyyət dövlət başçısının bu mövzu ilə bağlı tövsiyələrini öz fəaliyyətlərində prioritet kimi qəbul etməlidir.
“Azərbaycanlıların indiki Ermənistana, yəni öz dədə-baba yurdlarına qayıdışı revanş yox, tarixi ədalətin bərpasıdır. Qərbi azərbaycanlıların öz doğma yurdlarına dönməsi regionda real və davamlı sülhün əsas şərtlərindən biridir. Ermənistan xalqı və dövləti bundan ona görə qorxmamalıdır ki, bu qayıdış sülh, birgəyaşayış və ədalət ideyasına əsaslanır”, -deyə deputat vurğulayıb.
