Ermənistanda hakimiyyətdaxili savaş güclənir
Ermənistanda sosial-iqtisadi vəziyyətin davamlı şəkildə ağırlaşması fonunda müşahidə olunan proseslərdən biri də ölkədə siyasi böhranın getdikcə dərinləşməsidir.
Gözlənilən 2026-cı il seçkiləri ərəfəsində ölkədə hökumət daxilində qızğın mübarizə gedir. Belə ki, parlamentin spikeri Alen Simonyan, Təhlükəsizlik Şurasının katibi Armen Qriqoryan və bəziləri özlərini Ermənistanın hazırkı baş naziri Nikol Paşinyanın kürsüsündə görməyə başlayıblar.
"İravunk" qəzeti yazıb ki, hökumət dairələrində gəzən söz-söhbətlərə görə, Ermənistanın baş naziri Nikol Paşinyan Münhendən (Almaniya) tutqun əhvali-ruhiyyədə qayıdıb. Bildirilib ki, baş nazir Münhen Təhlükəsizlik Konfransının rəsmi açılış mərasimində iştirak edib, bu çərçivədə bir sıra ikitərəfli görüşlər keçirib: "Bu görüşlər, xüsusən də Münhendəki ümumi ab-hava onu göstərdi ki, Qərbdən ona əvvəlki dəstək yoxdur. Parçalanmış Avropa gözünü qırpmadan Nikolu "ikinci Zelenski"yə çevirəcək, onu taleyin ümidinə buraxacaq. Paşinyana yaxın olan Qərb dairələri dolayısı ilə ona xarici, xüsusən də kadr siyasətinə ciddi şəkildə yenidən baxmalı olduğuna dair xəbərdarlıq ediblər. Məsələn, Paşinyan artıq Böyük Britaniyanın Mİ-6 kəşfiyyat orqanının kadrlarından, ilk növbədə Təhlükəsizlik Şurasının katibi Armen Qriqoryandan yaxa qurtarmaqla amerikalıların xoşuna gəlməyə çalışmalıdır. Amma o, qurumun onun qarşısına hansı kompromatları qoya biləcəyini anlayaraq tələsmir".
Bəzi dairələrin iddialarına görə isə Qərb Paşinyan üçün sürprizə imza ata bilər. Yerli mediada yazılır ki, hakim partiya xarici işlər naziri Ararat Mirzoyandan dərin məyusdur, halbuki komandada bəziləri Paşinyanın varisi olaraq onu görürdülər. Qeyd edilib ki, Ararat Mirzoyanın atdığı bir çox addım hakim komanda üzvlərini məyus edib. Məlumatlara görə, Ararat Mirzoyan bütün addımlarını Paşinyanla razılaşdırır, hətta dar dairədə fikir ayrılığını gizlətmir və bir çox mübahisəli məsələdə ona müqavimət göstərməyə belə cəhd etmir. Mənbələr bildiriblər ki, Mirzoyan Konstitusiyanın dəyişdirilməsinə, Müstəqillik Bəyannaməsinə istinadın aradan qaldırılmasına qarşı olsa da, öz etirazını dilə gətirmir.
"4rd.am" nəşri qeyd edib ki, ötən il keçirdiyi mətbuat konfranslarından birində Ararat Mirzoyan Konstitusiyanın sülh prosesinin dayanmasına səbəb olub-olmaması ilə bağlı suala cavab verərkən Konstitusiyanın Azərbaycanın tələbi ilə dəyişdirilməsinə qarşı çıxıb. Lakin daxili müzakirələrdə o, "lider"in əleyhinə danışmaqdan qorxur, susur.
Bildirilib ki, yaxın günlərdə "Mülki müqavilə" fraksiyası qapalı iclas formatında xarici işlər nazirindən hesabat alacaq. Müşahidələrə görə, partiyada baş verənlər, əslində, Ermənistanda hakimiyyətdə olan şəxslərin dəyişdirilməsi prosesinin başlandığını göstərir.
Ölkədə gedən proseslər onu göstərir ki, Ermənistanın Rusiyadan qopması və Fransanın faktiki müstəmləkəsinə çevrilməsi siyasəti həyata keçirilir. Qərb isə etiraz əhvali-ruhiyyəsinin hökumət binalarına hücuma çevrilməsindən yayınmaq üçün Paşinyanı əvəz etmək prosesinə üstünlük verir.
Yazılanlardan və danışılanlardan belə bəlli olur ki, indi hakim elitada baş nazir olmaq uğrunda Mirzoyan və Təhlükəsizlik Şurasının katibi Armen Qriqoryan arasında qızğın mübarizə gedir.
Elçin CƏFƏROV,
"Azərbaycan"
jpg_1766048684.jpg)
