Parlament “Azərbaycan Respublikasında mənzil fondunun özəlləşdirilməsi haqqında”, “Valyuta tənzimi haqqında”, “Xidməti və mülki silah haqqında”, “Əmtəə nişanları və coğrafi göstəricilər haqqında”, “Notariat haqqında”, “İcra məmurları haqqında”, “İcra haqqında”, “Lotereyalar haqında”, “Daşınmaz əmlakın dövlət reyestri haqqında” və “Media haqqında” qanunlarda dəyişiklik edilməsi barədə qanun layihəsini birinci oxunuşda təsdiqləyib.
AZƏRTAC xəbər verir ki, qanun layihəsi parlamentin dekabrın 13-də keçirilən plenar iclasının gündəliyinə daxil edilib.
“Azərbaycan Respublikasında mənzil fondunun özəlləşdirilməsi haqqında” Qanuna edilən dəyişikliklərdən biri, daşınmaz əmlakın dövlət reyestrindən çıxarışların, artıq kağız formasında təqdim edilmək əvəzinə, Elektron Hökumət portalı vasitəsilə təqdim olunması və ya müvafiq qaydada əldə edilməsi tələbinin daxil edilməsi ilə əlaqədardır. “Valyuta tənzimi haqqında” qanuna edilən dəyişikliklərdə, Elektron Hökumət İnformasiya Sistemi vasitəsilə müvafiq dövlət orqanlarından (qurumlarından) sənədlərin əldə edilməsi mümkün olduqda, həmin sənədlərin və ya məlumatların müraciət edən şəxsdən tələb edilməməsi nəzərdə tutulur. “Xidməti və mülki silah haqqında” qanunda da bir dəyişiklik edilib. Belə ki, bu qanunun müvafiq maddələrinə əsasən, müəyyən sənədlər, vətəndaşın razılığı ilə sorğu əsasında müvafiq dövlət orqanlarından tələb olunacaq və ya vətəndaş tərəfindən təmin ediləcək. “Əmtəə nişanları və coğrafi göstəricilər haqqında” qanuna edilən dəyişikliklərdə isə iddiaçının məlumatlarının, adətən fiziki şəxs olduqda soyad, ad, atasının adı və fərdi identifikasiya nömrəsinin daxil edilməsi dəqiqləşdirilib. “Notariat haqqında” qanunda “Elektron Hökumət” portalı ifadəsi, “Elektron Hökumət İnformasiya Sistemi” ilə əvəz edilib. “İcra məmurları haqqında” və “İcra haqqında” qanunlarda da bənzər dəyişikliklər edilib, “Elektron Hökumət” portalının adı “Elektron Hökumət İnformasiya Sistemi” ilə əvəz olunub. “Lotereyalar haqqında” qanuna edilən dəyişiklikdə, vergi ödəyicisinin eyniləşdirmə nömrəsinin daxil edilməsi ilə bağlı yeni tələblər müəyyən edilib. “Daşınmaz əmlakın dövlət reyestri haqqında” Qanunda da “Elektron Hökumət portalı” ifadəsi “Elektron Hökumət İnformasiya Sistemi” ilə dəyişdirilib. “Media haqqında” qanuna edilən dəyişikliklərdə, sənədlərin Elektron Hökumət İnformasiya Sistemi vasitəsilə müvafiq dövlət orqanlarından (qurumlarından) əldə edilməsi mümkün olduqda, həmin sənədlərin ərizəçidən tələb edilməməsi, əks halda isə onların təqdim edilməsi ilə bağlı konkret qaydalar müəyyənləşdirilib. Bu dəyişikliklər, sənədlərin elektron şəkildə təqdim olunmasını, idarəetmə proseslərinin daha səmərəli və şəffaf həyata keçirilməsini hədəfləyir. Bu islahatlar, həmçinin vətəndaşların dövlət orqanları ilə olan əlaqələrini daha rahat və sürətli hala gətirmək məqsədini daşıyır.
Qanun layihəsi səsverməyə çıxarılaraq birinci oxunuşda qəbul edilib.
jpg_1762961542.jpg)
