2025-ci ildə ABŞ-də ümumi enerji istehsalı yeni rekord səviyyəyə yüksəlib.
AZƏRTAC xəbər verir ki, bu barədə ABŞ-nin Enerji İnformasiya Administrasiyasının (EIA) məlumatında deyilir.
Bildirilir ki, keçən il ABŞ-də ümumi enerji istehsalı 107 kvadrilyon Britaniya istilik vahidi olub və 2024-cü ildə qeydə alınan əvvəlki rekord göstəricidən 3,4 faiz çoxdur. Ümumi hasilatdakı rekord təbii qaz, xam neft, təbii qaz emal mayeləri və bərpaolunan enerji mənbələrində artan istehsal sayəsində mümkün olub. ABŞ ardıcıl 4-cü ildir ümumi enerji istehsalında rekord qırır.
Məlumata görə, ötən il quruda təbii qaz istehsalı 2024-cü illə müqayisədə 4 faizdən çox artaraq rekord səviyyəyə - 39 trilyon kubfuta yüksəlib. Təbii qaz 2011-ci ildən bəri ABŞ-nin daxili enerji istehsalının ən böyük mənbəyi olub və bu ölkə 2011-ci ildən bəri dünyanın ən böyük təbii qaz istehsalçısıdır.
Birləşmiş Ştatların xam neft hasilatı isə ötən il gündəlik orta hesabla 13,6 milyon barel təşkil edib, 2024-cü ildəki rekordla müqayisədə 3 faiz və ya sutkada 350 min barel artıb. Xam neft daxili enerji istehsalının 26 faizini təşkil edib və ABŞ dünyanın ən böyük xam neft istehsalçısı olaraq qalıb.
Hesabat ilində təbii qaz emal mayeləri 2024-cü ildəki rekordla müqayisədə 7 faiz artaraq 4 trilyon kubfut olub və daxili enerji istehsalının 9 faizini təşkil edib. Ölkədə təbii qaz istehsalı və emalı 2005-ci ildən bəri hər il artır. Keçən il bərpaolunan enerji istehsalı isə 2024-cü ildəki göstərici ilə müqayisədə 3 faiz artaraq yeni rekorda çatıb ki, bu da ardıcıl 5-ci ildir artım deməkdir. Günəş və külək enerjisi yeni generatorların işə düşməsi ilə enerji istehsalında rekordlar qırıb. 2025-ci ildə geotermal, hidroelektrik, odun və tullantı enerjisi istehsalı sabit qalıb, kömür isə daxili enerji istehsalının 10 faizini təşkil edib.
