Venesuela müdafiə qabiliyyətini əhəmiyyətli dərəcədə artıracaq və 2026-cı il məqsədlərinin bir hissəsi olaraq yeni strateji müdafiə planları təqdim edəcək.
Prezident Nikolas Maduro bu açıqlamanı dövlət televiziya kanalı VTV-də yayımlanan yüksək vəzifəli hökumət rəsmiləri ilə görüşündə verib.
Venesuela lideri ölkənin artıq 2026-cı il vizyonu ilə yaşadığını və əsas məqsədin "dinc və firavan bir vətən" qurmaq olduğunu vurğulayıb. "2026-cı il artıq başlayıb, bu gün faktiki olaraq 2026-cı ildir. 2026-cı ildə ölkənin müdafiəsini əhəmiyyətli dərəcədə gücləndirəcəyik və bu sahədə yeni strategiyalar elan edəcəyik. Allaha bizə verdiyi gücə, yaxşı ideyalara və cəsur xalqımıza görə şükür edirəm. Xalqın, ordunun və polisin mükəmməl birliyi sayəsində Venesuela müstəqilliyini qoruyub saxlayır və sülh içində yaşayır", - deyə Nikolas Maduro bildirib.
Prezident xüsusilə qeyd edib ki, ABŞ-nin Karib dənizindəki hərbi fəaliyyəti Venesuela üçün birbaşa təhlükə yaradır və buna görə də gələn ildə müdafiə sektoruna investisiyalar əhəmiyyətli dərəcədə artırılacaq.
"2026 Planı" çərçivəsində təhlükəsizlik və müdafiə sistemlərini gücləndirməyi, hökumət kommunikasiya siyasətini təkmilləşdirməyi, ictimai təşkilatları inkişaf etdirməyi və xalqın ehtiyaclarına yönəlmiş idarəetmə strukturlarını gücləndirməyi planlaşdırır.
Venesuelanın müdafiə naziri general Vladimir Padrino Lopez mövcud xarici təhdidlərin ölkəyə yeni strateji yanaşmalar hazırlamağa və tətbiq etməyə imkan verdiyini bildirib. O, xalq milisinin davam edən dinamik yenidən qurulması barədə məlumat verib.
Nazirin sözlərinə görə, Venesuela silahlı qüvvələri hər gün daha da hazırlıqlı olur və ölkəyə qarşı mümkün olan hər hansı bir hücuma "ən sərt və ən qətiyyətli cavab" verməyə tam hazırdır.
Rizvan CƏFƏROV,
“Azərbaycan”
19 (1)jpg_1771885865.jpg)
