Biz hamımız iqlim böhranının dünya üçün yaratdığı təhdidi çox yaxşı bilirik. Biz həm də bilirik ki, qlobal emissiyalara ən az qatqısı olmağına baxmayaraq, bu çətinliklərin ön cəbhəsində Afrika ölkələri dayanacaq. Biz hamımız buradayıq, çünki Afrikanın iqlimə davamlı və firavan gələcəyi ilə bağlı ortaq baxışa sahibik. Qitə sıfır emissiyalı keçid prosesində qlobal liderə çevrilmək potensialına malikdir.
AZƏRTAC xəbər verir ki, bunu İkinci Afrika İqlim Sammiti (ACW) çərçivəsində çıxış edən Azərbaycan Respublikası Prezidentinin iqlim məsələləri üzrə nümayəndəsi, COP29-un Sədri Muxtar Babayev deyib. M.Babayev Afrikanın iqlim böhranı ilə mübarizədə üzləşdiyi çətinliklərə diqqət çəkib.
M.Babayev Efiopiya Hökumətinə və Afrika İttifaqına sammitə ev sahibliyinə görə təşəkkür edib, iqlim böhranının qlobal miqyasda ciddi təhdid olduğunu, bu təhdidlərin ön cəbhəsində isə ən az emissiya payına malik Afrika ölkələrinin dayandığını vurğulayıb.
Muxtar Babayev Afrikanın gənc və iddialı əhalisinin, bərpa olunan enerji üçün böyük imkanlarının, zəngin mineral resurslarının və təbiət sərvətlərinin bu potensialı dəstəklədiyini bildirib. Bununla belə, hazırda bu imkanların tam dəyərləndirilmədiyini qeyd edən COP29 Prezidenti nümunə olaraq vurğulayıb ki, Afrika qlobal günəş enerjisi potensialının 40 faizinə sahib olsa da, quraşdırılmış gücünün yalnız 1 faizi istifadə olunur.
Azərbaycanın yeni tərəfdaşlıqları və investisiya imkanlarını araşdırmaq məqsədilə sammitdə iştirak etdiyini bildirən Muxtar Babayev “Mission 300” təşəbbüsünün əhəmiyyətini xüsusi qeyd edib. O, COP29 Sədrliyinin yanvarda Tanzaniyanın Dar-üs-Salam şəhərində keçirilən “Mission 300” Afrika Enerji Sammitində iştirak etdiyini və təşəbbüsə dəstək verdiyini xatırladıb.
“Bu cür proqramlar yalnız o halda uğur qazanacaq ki, inkişaf etməkdə olan ölkələr üçün real icra mexanizmləri tətbiq edilsin. COP29-da biz bu istiqamətdə tarixi addımlar atdıq. İnkişaf etmiş ölkələr 2035-ci ilə qədər hər il 300 milyon dollar iqlim maliyyəsi ayırmağa söz verdilər. Eyni zamanda, inkişaf etməkdə olan ölkələr üçün illik 1,3 trilyon dollar maliyyənin səfərbər olunması məqsədilə yeni hədəf qəbul etdik”, – deyə M.Babayev bildirib.
Muxtar Babayev əlavə edib ki, Bakıda həmçinin illik 1 trilyon dollar dəyərində ola biləcək yüksək etibarlı karbon bazarlarının qaydaları müəyyənləşdirilib: “İndi əsas məsələ verilən öhdəliklərin yerinə yetirilməsidir. COP29 Sədrliyi hər bir vədin icrasını diqqətdə saxlayacaq, qlobal maliyyə sisteminin insanlar və planet üçün daha yaxşı işləməsi naminə tərəfdaşlarla əməkdaşlığı davam etdirəcək”.
jpg_1763916860.jpg)
jpg_1763620972.jpg)
