Seul məhkəməsi hazırda istintaq təcridxanasında saxlanılan ölkə Prezidenti Yun Sok Yolun həbsdə qalmasına qərar verib.
AZƏRTAC xəbər verir ki, qərara əsasən ölkədə qısamüddətli hərbi vəziyyətin tətbiqindən sonra qiyam təşkili şübhəsi ilə başlanılan təhqiqat çərçivəsində 2 gün əvvəl saxlanılan Prezident Yun Sok Yol azı 8 gün həbsdə qalacaq. Məhkəmə hesab edib ki, Prezident Yun Sok Yolun sərbəst buraxılması dəlillərin məhvinə səbəb ola bilər.
Seul məhkəməsinin qərarına əsasən rəsmən dustaq elan edilən Yun Sok Yol barmaq izi və fotoşəkil də daxil olmaqla qeydiyyat prosedurundan keçəcək.
Prezident Yun Sok Yolun həbsdə saxlanılması ilə bağlı məhkəmə iclası yerli vaxtla saat 14:00-da başlayıb və 5 saat davam edib. Prezident Yun Sok Yol məhkəmə iclasında iştirak edərək, həbsinin qanunsuz olduğunu əsaslandırmağa çalışıb. İclasdan sonra onu 2 gündür saxlanıldığı Seul istintaq təcridxanasına aparıblar. Korrupsiyaya Qarşı Mübarizə İdarəsinin müstəntiqləri yanvarın 26-dək prezidenti dindirəcəklər. Ondan sonra iş prokurorluğa veriləcək.
Yanvarın 15-də saxlanılan Prezident ötən müddətdə müstəntiqlərə ifadə verməkdən imtina edib. İstintaq qrupu ölkədə hərbi vəziyyət elanı ilə əlaqədar 200 səhifəlik suallar hazırlayıb. Bura qəfil hərbi vəziyyətin elan edilməsinin səbəblərinə, hərbçilərin mərkəzi seçki komissiyasının binasına girməsi üçün əmr verilməsinə, parlamentin işinin pozulmasına dair suallar daxildir. İxtisasca hüquqşünas olan, uzun illər prokurorluq orqanlarında çalışmış Yun Sok Yol həbsini və istintaqı qanunsuz hesab edir.
Qeyd edək ki, Cənubi Koreya Prezidenti Yun Sok Yol dekabrın 3-də elan etdiyi hərbi vəziyyətlə əlaqədar qiyama cəhd və vəzifə səlahiyyətlərindən sui-istifadə şübhəsi ilə başlanmış istintaq çərçivəsində yanvarın 15-də saxlanılıb. Yun Sok Yol prezidentliyi dövründə həbs olunan ilk şəxs kimi Cənubi Koreya tarixinə düşüb. Düzdür, Yun Sok Yol haqqında parlamentin impiçment qərarı var və o, hazırda səlahiyyətlərini icra etməsə də, Konstitusiya Məhkəməsi hələ impiçmentə dair yekun qərar verməyib. Qanunvericiliyə əsasən, Konstitusiya Məhkəməsi 180 gün ərzində parlamentin impiçment qərarına baxaraq ya təsdiqləməli, ya da rədd etməlidir. Artıq yanvarın 14-də Konstitusiya Məhkəməsi impiçment məsələsi ilə əlaqədar prosesə başlayıb.
