Fransa üç böhranla üz-üzədir

Fransada yeni hökumətin qurulmasının uzanması ölkədə maliyyə və sosial böhran riskləri yaradır. Bunu ölkənin keçmiş prezidenti Nikola Sarkozi "Figaro"ya müsahibəsində deyib. Onun sözlərinə görə, Fransa 45 gündür hökumətsiz qaldığından hakimiyyət vəziyyətin ciddiliyini dərk etməlidir. 
Sarkozi hesab edir ki, ölkə hazırda eyni vaxtda baş verə biləcək üç böhranla üz-üzədir. Məsələn, Fransada maliyyə böhranı yarana bilər.
Eks-prezident bildirib ki, "Fransanın borcunu, kəsirini və həddindən artıq xərclərini nəzərə alsaq, fikrimcə, büdcəsiz, hökumətsiz və ya maliyyə naziri olmadan qalmaq müdriklik deyil... Yaranmış vəziyyətdə həmçinin sosial böhran gözlənilir və bu da fransız ənənəsidir".
Sarkozi parlamentin buraxılmasının Parisi siyasi böhrana sürüklədiyini deyib: "Bütün bunlar belə qənaətə gəlməyə imkan verir ki, ölkə həqiqətən uçurumun kənarındadır".
Yada salaq ki, iyulun sonunda Fransanın solçu "Yeni Xalq Cəbhəsi" blokunun parlament seçkilərində qalib gələrək baş nazir postuna vahid namizəd - Lüsi Kaste ilə bağlı razılığa gəldiyi barədə məlumat yayılmışdı. Bununla belə, Fransanın bəzi mətbu orqanları dövlət başçısı Emmanuel Makronun  "10 dəqiqə ərzində onun namizədliyini rədd etdiyini" yazıb. 
Bu arada, BFMTV-nin sifarişi ilə keçirilmiş sorğunun nəticələrinə görə, fransızların təxminən yarısı "Yenilməyən Fransa" (LFİ) partiyasının Milli Assambleyada Prezident Emmanuel Makronun istefası ilə bağlı təklifinin tərəfdarı olduqlarını bildirib.
Respondentlərin 49 faizi təklifin tərəfdarı, 50 faizi isə əleyhinə olduğunu bildirib. Yeni Xalq Cəbhəsinə (NFP) səs verən fransalıların 64 faizi, Milli Birlik (RN) və onun müttəfiqlərinin seçicilərinin yarısı bu impiçment prosedurunun lehinə olduqlarını deyiblər. Sağçı və solçuların 74 faizi isə hesab edir ki, sözügedən təklif Prezidentin istefasına səbəb olmayacaq.
Parlament seçkilərindən yeddi həftədən çox vaxt keçməsinə baxmayaraq, yeni hökumətin formalaşmamasına gəlincə, respondentlərin 63 faizi hesab edir ki, bunun üçün ilk növbədə Makron və onun komandası məsuliyyət daşıyır. Respondentlərin 27 faizi isə Yeni Xalq Cəbhəsinin (NFP) məsuliyyət daşıdığını bildirib.
Növbəti hökumət başçısına gəlincə, fransızların 41 faizi istefa verən baş nazir Qabriel Attalın yenidən təyin olunmasını istəyir. İkinci yerdə Milli Birlik (RN) partiyasının sədri Jordan Bardella (38 faiz), 3-cü yerdə isə keçmiş baş nazir Bernard Kaznöv (28 faiz) gəlir.
Xatırladaq ki, avqustun 26-da Prezident Emmanuel Makron partiya liderləri və parlamentdəki fraksiyaların rəhbərləri ilə məsləhətləşmələrdən sonra NFP tərəfindən dəstəklənən hökumətin qurulmasını istisna edib. Makronu vəzifə səlahiyyətlərindən sui-istifadədə təqsirləndirən "Yenilməyən Fransa" partiyası onu istefaya məcbur etmək üçün Konstitusiyanın 68-ci maddəsi ilə (vəzifə səlahiyyətlərini icra edə bilməmək) hədələyir.
Qeyd edək ki, həmin maddə səlahiyyətlərin icrası ilə açıq şəkildə bir araya sığmayan pozuntular baş verdikdə, prezidentin səlahiyyətlərinə vaxtından əvvəl xitam verilməsini nəzərdə tutur. 

Rizvan CƏFƏROV,
"Azərbaycan"