Marko Rubio: Ukraynanın suverenliyi və müstəqilliyi qorunmalıdır
ABŞ və Rusiya Vaşinqtonun Ukraynadakı müharibənin həlli planını müzakirə ediblər. Rusiya Prezidenti Vladimir Putin və ABŞ-nin xüsusi elçisi Stiv Uitkoff arasında görüş təxminən beş saat davam edib. Kremlin bildirdiyinə görə, hələlik kompromis əldə edilməyib.
Məlum olduğu kimi, Rusiya və ABŞ Kremldə Ukraynadakı müharibənin sülh yolu ilə həlli ilə bağlı danışıqlar aparıblar. Rusiya xəbər agentliklərinin məlumatına görə, görüş təxminən beş saat davam edib və dekabrın 3-də Moskva vaxtı ilə təxminən saat 00:30-da başa çatıb.
Rusiyanı danışıqlarda Prezidenti Vladimir Putin, onun köməkçisi Yuri Uşakov və prezidentin xüsusi nümayəndəsi Kiril Dmitriyev təmsil ediblər. ABŞ tərəfi Moskvadakı danışıqlarda xüsusi elçi Stiven Uitkoff və Prezident Donald Trampın kürəkəni Cared Kuşner ilə təmsil olunub.
Rusiya Prezidentinin köməkçisi Yuri Uşakov danışıqlardan sonra jurnalistlərə bildirib ki, Kremldəki görüşdə Ukraynadakı müharibəyə son qoymaq üçün bir neçə variant müzakirə olunub. Onun dediyinə görə, Moskva ABŞ-nin ilkin "sülh planı"ndan əlavə daha dörd sənəd alıb.
Y. Uşakov qeyd edib ki, Vladimir Putin Vaşinqtondan "bir sıra təkliflərə qarşı tənqidi və hətta mənfi münasibətini" gizlətməyib və əlavə edib ki, görüşdə "konkret ərazi məsələləri" müzakirə olunub.
Kreml saytı prezident köməkçisinin sözlərinə istinadən yazır: "Hələlik kompromis tapılmayıb. Lakin bəzi təkliflər az-çox məqbul görünür. Lakin onlar müzakirə olunmalıdır. Bizə təklif olunan bəzi ifadələr qəbuledilməzdir. Yəni, iş davam edəcək".
Buna baxmayaraq, Y. Uşakov nümayəndə heyətlərinin görüşünü çox "faydalı, konstruktiv və məzmunlu" adlandırıb. Jurnalistlərin bu danışıqlardan sonra sülhün daha da yaxınlaşıb-yaxşılaşmadığı barədə sualına o, belə cavab verib: " İrəli getmədiyimiz dəqiqdir. Amma həm Vaşinqtonda, həm də Moskvada görüləsi çox iş var".
Rusiya və ABŞ danışıqların mahiyyətini açıqlamamaq barədə razılığa gəliblər. Y. Uşakovun sözlərinə görə, söhbət "tamamilə qapalı və gizli" olub və tərəflər danışıqların mahiyyətini açıqlamayacaqlar. ABŞ nümayəndələri Rusiya prezidenti ilə görüşlərinin nəticələrini şəxsən Donald Trampa bildirəcəklər və bundan sonra əlavə müzakirələr üçün Moskva ilə telefonla əlaqə saxlayacaqlar.
Ukrayna Prezidenti Volodimir Zelenski Kremldəki görüşlə eyni vaxtda Telegram-da yazıb ki, müharibənin bitməsi şərtləri ilə bağlı sadə qərarlar gözləmir. O bildirib ki, Kiyev Rusiyadakı danışıqlardan sonra Amerika nümayəndə heyətindən siqnallar gözləyir. "ABŞ nümayəndə heyəti görüşlərdən dərhal sonra birbaşa bizə hesabat vermək istəyir. Növbəti addımlar bu siqnallardan asılıdır", - deyə Zelenski bildirib və Prezident Donald Tramp da daxil olmaqla, ABŞ nümayəndələri ilə tezliklə görüşün keçirilməsini istisna etməyib.
Moskva danışıqlarından sonra ABŞ dövlət katibi Marko Rubio Fox News telekanalına verdiyi müsahibədə Ukraynadakı müharibəyə son qoymaq üçün ABŞ və Rusiya arasında danışıqlarda irəliləyiş müşahidə olunduğunu söyləyib. "Bizim çalışdığımız və düşünürəm ki, müəyyən irəliləyişlər əldə edirik – gələcək üçün təhlükəsizlik zəmanətləri verəcək, ölkələrinin bir daha işğal olunmaması üçün ukraynalıların nəyə razılaşa biləcəklərini müəyyən etməkdir; bu, onlara yalnız iqtisadiyyatlarını bərpa etməyə deyil, həm də çiçəklənməyə, böyüyən bir iqtisadiyyata çevrilməyə imkan verəcək", - dövlət katibi deyib.
ABŞ diplomatiyasının başçısı hesab edir ki, "nəzəri olaraq, hər şey düzgün edilsə, Ukraynanın ÜDM-i 10 il ərzində Rusiyanınkından daha çox ola bilər". Onun sözlərinə görə, Ukrayna və Rusiya hazırda "sözün əsl mənasında Donetsk bölgəsinin 30-50 kilometri uğrunda mübarizə aparırlar" və başlıca məsələ Ukraynanın uzunmüddətli suverenliyini və müstəqilliyini qorumaqdır ki, o, marionet dövlətə çevrilməsin, əksinə, həqiqətən müstəqil və suveren qalsın".
" Biz müharibəni Ukraynanın gələcəyini qoruyan və hər iki tərəfin razılaşa biləcəyi şəkildə bitirməyin mümkün olub-olmadığını anlamağa çalışırıq", - deyə ABŞ dövlət katibi əlavə edib.
Rizvan CƏFƏROV,
“Azərbaycan”
jpg_1773317662.jpg)
