Diasporla İş üzrə Dövlət Komitəsinin sədri Fuad Muradov Qars şəhərində Azərbaycan icmasının nümayəndələri, o cümlədən Qafqaz Universitetində dərs deyən soydaşlarımızla görüşüb.
AZƏRTAC xəbər verir ki, Qafqaz Universitetində Heydər Əliyev adına Təhsil Mərkəzində keçirilən görüşdə Türkiyə ilə Azərbaycan arasında əməkdaşlığın təşviqi, regionun tarixi irsinin qorunması, dezinformasiyanın yayılmasının qarşısının alınması, kitabxanaların və universitetlərin fondlarının Azərbaycan haqqında nəşrlərlə zənginləşdirilməsi istiqamətində yeni layihələrin həyata keçirilməsi ilə bağlı təşəbbüs və təkliflər dinlənilib.
F.Muradov Azərbaycan təşkilatlarını doğma ölkələrinin maraqları naminə səylərini birləşdirməyə çağırıb. “Diaspor təşkilatlarının inkişafı və uğurları Azərbaycanın milli maraqları naminə birlik və birləşmə ilə qırılmaz şəkildə bağlıdır. Doğma ölkənin maraqları hər zaman ayrı-ayrı strukturların şəxsi təşəbbüsləri və prioritetlərindən üstün olmalıdır”, - deyə dövlət komitəsinin rəhbəri vurğulayıb.
O, Azərbaycan dövlətinin diaspor strukturlarının gücləndirilməsində maraqlı olduğunu və xaricdəki soydaşların dəstəklənməsi üçün əlindən gələni etdiyini vurğulayıb.
Nümunə kimi F.Muradov dövlət komitəsinin xətti ilə hər il Azərbaycanla bağlı 10 minə qədər kitab və dərs vəsaitinin xaricə göndərilməsini göstərib.
Dövlət komitəsinin rəhbəri Azərbaycan diaspor təşkilatlarını narahat edən məsələlərlə yaxından tanış olmaq üçün Türkiyəyə yeni səfərlər planlaşdırdığını bildirərək, görüş zamanı səslənən bütün təşəbbüslərin nəzərə alınmasını tapşırıb.
Görüşdə Qafqaz Universitetinin rektoru Hüsnü Kapu və ölkəmizin Qarsdakı baş konsulu Zamin Əliyev iştirak ediblər.
