"Aprel ayında Brüsseldə ABŞ, Avropa İttifaqı və Ermənistan arasında hərbi paktın imzalanmasından sonra Ermənistan sülh müqaviləsinin bağlanması istiqamətində davam edən prosesləri tamamilə darmadağın etdi. Əvvəlcə Böyük Britaniyada Prezident İlham Əliyevlə görüşdən imtina edən Paşinyan sonrakı dövrdə Ermənistan ordusunun Azərbaycan istiqamətində kifayət qədər aqressiv davranışlarına şərait yaratdı". 
Bu sözləri "Azərbaycan" qəzetinə açıqlamasında hərbi ekspert Ədalət Verdiyev deyib. O qeyd edib ki, Azərbaycan mövqeləri üzərində dəfələrlə PUA uçuşlarını həyata keçirmək cəhdləri, Naxçıvan və Şərqi Zəngəzur istiqamətində atəşkəsin intensiv pozulması həm ABŞ ilə Ermənistan arasında imzalanan sənədlərin, həm də keçirilən birgə hərbi təlimlərin məntiqi nəticəsidir. Hazırda Ermənistan həm ABŞ, həm Fransa, həm də Hindistan tərəfindən intensiv şəkidə silahlandırılır. "Otuzillik işğalçılıq siyasəti yürüdən bir dövlətin üzərinə götürdüyü öhdəlikləri yerinə yetirmək əvəzinə silahlanması və Azərbaycan sərhədləri yaxınlığında yeni hərbi infrastruktur yaratmaq cəhdləri Ermənistanın Azərbaycanla sülh sazişi imzalamaq niyyəti olmadığını göstərir. Digər tərəfdən, Ermənistan sülh sazişi üçün zəruri olan Konstitusiyaya dəyişikliyi növbəti üç il üçün təxirə salmaqla, indiyə qədər 4 il, bundan sonra da azı 3 il olmaqla, ümumilikdə 2027-ci ilə qədər Azərbaycanla sülh sazişi imzalamaq istəmir", - deyə ekspert bildirib. 
Ə.Verdiyev vurğulayıb ki, Ermənistanın eskalasiya yaratmaq istəyi onun milli və dövlət maraqlarına tamamilə zidd addım olacaq. Ermənistan tərəfindən açılan atəş nəticəsində bir Azərbaycan əsgəri yaralanarsa, bu qarşı tərəf üçün dərin peşmanlıq yaşadacaq.

Əsmər QALİBQIZI,
"Azərbaycan"