Uzun illərdən sonra öz yurduna qayıdan Horovlu sakinləri bu günləri həm sevinc, həm də qürurla qarşılayır. Kəndə yenidən həyat qayıdıb, inşa olunan yeni evlər, bərpa olunan kəhrizlər, qurulan məktəb və bağça insanların illərdir həsrətlə gözlədiyi doğmalığı yenidən canlandırıb.
AZƏRTAC-ın bölgə müxbiri Horovlu sakinlərinin sevinc hisslərini qələmə alıb.
Horovlu sakini Yamil Cəfərov da bu gün doğma kəndə qədəm qoyan sakinlərdəndir. “Kənddən çıxanda 12 yaşım var idi. Uşaqlıq xatirələrim yarım qalmışdı, amma indi övladlarımla birlikdə qayıtmışam. Horovlu kəndinin xoşbəxt günləri yenidən başlayıb. Horovlu bizi çox gözəl qarşıladı, kəndə daxil olanda bir anlıq bütün xatirələrim canlandı. Düşünürəm ki, bizim yarım qalan uşaqlığımızı övladlarımız yaşayacaq. Onlar da ata-baba yurdlarına qürur hissi ilə gəliblər. Doğma torpağımıza qovuşacağımız günə hər zaman inamla yanaşdıq və bu gün o inam gerçəyə çevrildi. Kəndimizdə çox gözəl şərait yaradılıb, hətta kəhrizlərimiz belə bərpa olunub. Ali Baş Komandanın rəhbərliyi ilə qalib Azərbaycan Ordusu, sözün əsl mənasında, tarix yazdı və otuzillik həsrətə son qoyuldu. Allah şəhidlərimizə rəhmət etsin, qazilərimizə şəfa versin”.
Çiçək İsmayılova da uşaq vaxtı çıxdığı kəndə öz övladları ilə qayıdıb. “Otuz ildən çox idi ki, biz doğma kəndimizdən məcburi köçkün düşmüşdük. Amma bir an belə inamımı itirmədim və kəndimizə qayıdacağım günü səbirsizliklə gözləyirdim. Bu gün ən böyük arzum gerçəkləşdi, Horovluya qayıtdıq. Kəndimiz çox gözəlləşib, övladlarımla birlikdə gəldik, onlara illərlə kəndimiz barədə danışmışdım. İndi isə burada hər şey daha da abadlaşıb, yeni evlər tikilib, məktəb və bağça inşa olunub, kəhrizlərimiz bərpa edilib. Bu torpaqlar bizim üçün artıq daha da müqəddəsdir, çünki qəhrəman oğullarımız öz canları bahasına yurdumuzu azad ediblər. Müzəffər Ali Baş Komandan İlham Əliyev başda olmaqla Azərbaycan Ordusuna təşəkkür edirik. Allah şəhidlərimizə rəhmət etsin, qazilərimizə şəfa versin”.
Qeyd edək ki, bu mərhələdə Horovlu kəndinə 18 ailə olmaqla 66 nəfər köçürülüb. Bununla da Horovlu kəndində 150 ailə olmaqla 607 nəfərin məskunlaşması təmin olunub.
jpg_1764943359.jpg)
