Paşinyan güc strukturlarını mükafatlandıracaq
Hayastanda narazılıq və qarşıdurmanın artması, müxalifətlə hakimiyyət arasında ziddiyyətlərin daha da kəskinləşməsi müşahidə olunur. Keçmiş hərbi xunta təmsilçilərinin İrəvanda keçirdiyi etiraz aksiyaları bir neçə gündür ki, davam edir. Hər ötən gün isə aksiyalar istər iştirakçıların sayı, istərsə də miqyası baxımından genişlənir. Hətta vəziyyət o həddə çatıb ki, Paşinyan hökumət binasına gedən zaman etirazçılar binanı ələ keçirmək planları qurmağa başlayıblar.
Müxalifət tərəfdarları şəhərin bir çox körpü və yollarını betonqarışdıran maşınlarla bağlayıblar. Əraziyə çoxsaylı polis qüvvələri cəlb olunub. Etirazçılar "Nikolsuz Hayastan" şüarı səsləndirirlər. Polislə etirazçılar arasında toqquşma baş verir.
"Hraparak" nəşri yazıb ki, hakim Vətəndaş Müqaviləsi Partiyası nümayişlərin bir neçə günə yatırılacağına şübhə etmir, çünki Nikol Paşinyan daxili işlər naziri Vahe Qazaryana ən sərt vasitələrlə ictimai üsyanları yatırtmaq üçün ciddi göstəriş verib. Müəllif vurğulayıb ki, dünən də, ötən günlərdə də insanlar polisin vəhşiliklərinin şahidi olublar: "Bir neçə gündür ki, hakimiyyətin təhriki ilə Rusiya səfirliyi yaxınlığında aksiyaların keçirilməsi də hökumət mətbuatında dayanmadan işıqlandırılır".
O da qeyd olunur ki, polislərin, xüsusən də qırmızı-qara beretlilərin dinc etirazçılara qarşı göstərdiyi qeyri-insani, heyvani vəhşiliyi görməmək mümkün deyil. Polisin nümayəndələri İrəvanda revanşistlərə qarşı qeyri-insani davranırlar: "Silahsız, dinc etiraz və itaətsizlik aksiyası keçirən erməni xalqına, qadın və qızlara, gənclərə, qocalara qarşı belə vəhşiliyi heç cür əsaslandırmaq olmaz. Yəqin ki, Nikol Paşinyan polislərə ikiqat və ya üçqat bonus vəd edib. Başqa səbəblər də mümkündür".
Vurğulanır ki, müxalifətin başlatdığı etiraz aksiyaları bir aya kimi davam edərsə, bu, Paşinyan üçün ciddi problemlər yarada bilər. Diqqət ona yönəlir ki, məhz baş nazirin son 5 il ərzində hakimiyyəti təkcə Qarabağ müharibəsindəki məğlubiyyətlə bitmir, o, Hayastan üçün həm iqtisadi, həm enerji, həm də nəqliyyat baxımından təhdid vəziyyəti yaradıb. Digər tərəfdən, Hayastandan əhalinin köç prosesi yeni mərhələyə daxil olub. Qeyd edilir ki, vaxtilə Hayastandan əhali ədədi silsilə ilə baş götürüb qaçırdısa, indi artıq həndəsi silsilə ilə ölkəni tərk edirlər.
Bütün bunlara baxmayaraq, görünən odur ki, yaranmış vəziyyətdə Paşinyan hakimiyyətdə yerini daha da möhkəmlətmək üçün bütün addımları atır. Əslində, bu da ölkənin tənəzzülünü sürətləndirir. Bu, Hayastanın durumunu daha da ağırlaşdıracaq. Elə ictimaiyyət də məhz bundan narazıdır. Belə vəziyyətdə ölkədə hakimiyyətlə xalq arasında uçurumun daha da dərinləşməsi gözlənilir. Beləliklə, Hayastan növbəti vətəndaş qarşıdurmasına sürüklənir.
Elçin CƏFƏROV,
"Azərbaycan"
jpeg_1766065291.jpeg)
jpeg_1766054270.jpeg)
