Azərbaycan texnoloji inkişaf istiqamətində fəal addımlar atır.
Bu yarışmanın iştirakçılarından riyaziyyat, mühəndislik və məntiq sahəsində yüksək biliklər, eyni zamanda, komanda işi, yaradıcı düşüncə və innovativ həlləri sürətlə inkişaf etdirmək bacarığı tələb olunur. Biz inanırıq ki, təhsilə investisiya qoymaq və biznes təşəbbüslərini dəstəkləmək ölkənin davamlı inkişafı və rifahının təmin olunmasının ən təsirli yollarındandır.
AZƏRTAC xəbər verir ki, bu fikirləri ADA Universitetinin rektoru Hafiz Paşayev sentyabrın 1-də Bakıda keçirilən Beynəlxalq Universitetlərarası Proqramlaşdırma Müsabiqəsinin (ICPC) Dünya Finalının açılışında deyib.
“İnnovativ IT ekosisteminin inkişafı ölkəmizin qlobal biznes mühitində mövqeyini və rolunu daha da möhkəmləndirəcək.
ICPC Dünya Finalına ev sahibliyi etmək bu yolda atılmış mühüm addımdır. Əminik ki, bu tədbir ölkəmizdə IT sahəsinin inkişafında bir dönüş nöqtəsinə çevriləcək və Azərbaycanın beynəlxalq arenada diqqət mərkəzinə düşməsinə töhfə verəcək.
ADA Universiteti üçün bu nüfuzlu yarışmanı — 70 ölkədən yüzlərlə gənc proqramlaşdırıcını bir araya gətirən bu mötəbər tədbiri — qəbul etmək böyük şərəfdir. Bu möhtəşəm tədbirin təşkilat komandasına, sponsorlara və könüllülərə xüsusi təşəkkürümü bildirirəm.
Xüsusi təşəkkürə layiq olan qurumlardan biri Azərbaycan Mərkəzi Bankı, həmçinin Beynəlxalq Universitetlərarası Proqramlaşdırma Müsabiqəsi Fondu və onun prezidenti Bill Pauçerdir. O, bu layihəni mənə təqdim etdi və tədbirin miqyası ilə bizi heyran etdi. Onun gənclərin təhsilinə olan şəxsi həvəsini, səmimi yanaşmasını hiss edə bildim. Azərbaycan çoxsaylı beynəlxalq tədbirlərə ev sahibliyi edir, lakin ICPC dünyada özəl əhəmiyyətə malikdir, çünki bu yarışma dünyanın ən nüfuzlu universitetlərindən olan tələbələri bir araya gətirir. Siz artıq qalibsiniz, çünki finaldasınız. Ümid edirəm ki, yarışla yanaşı, ölkəmizi kəşf etmək və gördüyünüz işləri təqdim etmək imkanını da əldə edəcəksiniz. Təşkilatçılardan xahiş edirəm ki, sizə kifayət qədər vaxt ayırsınlar.
Qonaqpərvərlik və texnoloji inkişaf diyarı olan Azərbaycana bir daha xoş gəlmisiniz!” - deyə Hafiz Paşayev qeyd edib.
