Bu gün gənclərin sağlam böyüməsinə, yaxşı təhsil almasına, dünyagörüşünün artırılmasına və idarəetmə qurumlarında fəaliyyətinə dövlətin dəstəyi yüksək səviyyədədir.
Bu gün gənclərimiz - idmandan tutmuş Vətən müharibəsinə qədər həyatın bütün sahələrində qazandıqları uğurlara, nailiyyətlərə və tarixi qələbələrə görə qürur, iftixar mənbəyinə çevriliblər. Elə bu günlərdə Fransada keçirilən XXXIII Paris Yay Olimpiya Oyunlarında Azərbaycan gəncliyinin nümayəndələri - cüdoçularımız Hidayət Heydərov və Zelim Kotsoyev parlaq qələbələri ilə Vətənə Azərbaycan boyda sevinc yaşatmışlar.
44 günlük Vətən müharibəsində isə Azərbaycan gəncləri böyük şücaət göstərdilər. Torpaqlarımızın işğaldan azad olunması, ərazi bütövlüyümüzün bərpası ilə nəticələnən Vətən müharibəsi Azərbaycan xalqının milli həmrəyliyinin, monolit birliyinin təntənəsi oldu. Gənclərimiz Vətən müharibəsindən şərəflə çıxdılar, dövlət başçısının etimadını layiqincə doğrultdular. Onların hamısı döyüşlərdə qəhrəmancasına iştirak etdilər. Bütün dünyaya Azərbaycan gəncinin nəyə qadir olduğunu bir daha göstərdilər. Hər biri öz cəsurluğu, igidliyi ilə vətənpərvərlik salnaməsi yazdı, qələbə dolu döyüş yolu ilə dillərdə dastana döndü. Şəhidlərimizin xatirəsi hər zaman böyük ehtiramla anılır. Bütövlükdə, bu müharibədə gənclərimiz tarix yazdı.
Bu məqamda xalqımızın Ümummilli Lideri Heydər Əliyevin böyük uzaqgörənliklə dediyi sözləri xatırlamamaq mümkün deyil: "Siz Azərbaycanın bu günü və gələcəyisiniz. Sizin üzərinizə böyük vəzifə düşür, bu vəzifələr gələcəkdə daha da böyük olacaqdır, siz müstəqil Azərbaycanın XXI əsrdə yaradanlarısınız, quranlarısınız, inkişaf etdirənlərisiniz. Biz müstəqil Azərbaycanın taleyini gələcəkdə sizə etibar edəcəyik, sizə tapşıracağıq".
Ulu Öndərin tövsiyələrini özlərinin həyat amalına çevirən Azərbaycan gəncləri onlara göstərilən etimadı doğrultmağa çalışırlar. Onlar ölkədə dövlətçiliyin, müstəqilliyin daha da möhkəmləndirilməsində, intellektual səviyyəli potensial kadr hazırlığında, dövləti idarəetmə qurumlarında aparıcı qüvvəyə çevrilmişlər.
Hazırda bu ilin noyabr ayında Bakıda keçiriləcək BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) ciddi hazırlıq görülür. Azərbaycan gəncləri qlobal əhəmiyyətli COP29-un təşkilində də mühüm rol oynayacaqlarını qarşıya məqsəd qoymuşlar. Odur ki, bir sıra ali məktəblərdə COP29-la bağlı "yaşıl könüllülər" layihələrinə start verilib, bu adla müxtəlif qruplar yaradılır, proqramlar icra olunur. Ölkəmizdə gənclərdən ibarət könüllülər ordusu mövcuddur. Onlar ölkəmizdə keçirilən qlobal tədbirlərdə dəfələrlə iştirak ediblər. Həm ali məktəblərdə formalaşdırılmış, həm də müxtəlif sahələri təmsil edən tələbə-gənclər könüllü olaraq bu sahədə böyük təcrübə qazanıblar. Ekspertlər hesab edirlər ki, ali məktəb tələbələri COP29 tədbirində könüllü kimi öz töhfələrini verəcəklər. Çünki elə bir ali məktəb yoxdur ki, orada COP29 öncəsi işlər aparılmasın və tələbələr bu prosesə səfərbər olunmasın. İnam var ki, Azərbaycan könüllüləri onlara olan etimadı COP29-da yüksək səviyyədə doğruldacaqlar. Artıq bir çox ali təhsil müəssisələrində tələbələrə COP29-la bağlı müvafiq məlumatlar verilir. Digər tərəfdən, bu beynəlxalq tədbirlə əlaqədar bilgiləri onlar həm kütləvi informasiya vasitələrindən, həm də ali məktəblərdə tədris edilən dərslər zamanı öyrənirlər. Həmçinin müəyyən seminarlar təşkil edilir.
Bu gün gənclər siyasəti mahiyyət və keyfiyyətcə yeni mərhələsini yaşayır. Prezident İlham Əliyev Ulu Öndərin gənclər siyasətini də uğurla davam etdirir. Gənclərin mənəvi inkişafı, vətənpərvərlik tərbiyəsi, xarici ölkələrdə təhsili, sosial müdafiəyə ehtiyacı olanların problemlərinin həlli istiqamətində görülən işlər, gənclər təşkilatlarının formalaşması, inkişafı üçün yaradılan şərait bu sahəyə böyük diqqətin nəticəsidir. Dövlətin gənclərlə bağlı siyasətinin uğurla həyata keçirilməsində bu mühüm addımın böyük rolu vardır.
Dövlət başçısının gənclərin potensialından ölkənin mənafeyi naminə tam və düzgün istifadə olunması, onların faydalı məşğulluğunun, dövlət idarəçiliyi sistemində iştirakının təmin edilməsi məqsədilə ölkəmizdə 2015-2025-ci illəri əhatə edən Azərbaycan gənclərinin İnkişaf Strategiyası uğurla icra olunmaqdadır. Gəncliyimiz azad düşünür, demokratik cəmiyyətdə yaşayır, məhdudiyyətsiz olaraq fəaliyyət göstərir. Bütövlükdə, ölkə rəhbərliyinin həyata keçirdiyi məqsədyönlü və ardıcıl siyasət nəticəsində gənclər demokratikləşmə prosesində, mədəniyyət, incəsənət, elm və idman sahəsində inamla irəliləyir, zəngin mədəni irsimizin qorunub saxlanması və inkişaf etdirilməsi yolunda mühüm addımlar atırlar.
Prezident İlham Əliyev qloballaşma əsrində dünya elminə, təhsilinə inteqrasiyanı vacib sayaraq azərbaycanlı gənclərin xaricdə təhsil almasına ciddi əhəmiyyət verir. Burada məqsəd, yeni düşüncəli, milli ruhlu, vətənpərvər gənclik formalaşdırmaq, dövlət idarəçiliyini yüksəkixtisaslı kadrlarla təmin etməkdir. Dövlət başçısının fərman və sərəncamlarına əsasən, ölkəmizdə gənc nəslin problemlərinin həlli, onların cəmiyyət həyatında layiqli iştirakının təmin olunması, milli-mənəvi dəyərlərə bağlılığının möhkəmləndirilməsi üçün də zəruri tədbirlər həyata keçirilir.
Prezident İlham Əliyev demişdir: "Mənim gənclərə xüsusi münasibətim var, mənim ürəyim sizinlədir. Siz bütün işlərdə mənə arxalana bilərsiniz. Mən də sizə arxalanıram". Bu yüksək etimada və etibara cavab olaraq Azərbaycanın parlaq gələcəyinin təminatçısı olan gənclər bütöv və müstəqil Azərbaycan naminə səylə çalışır, öz siyasətində onlara arxalanan dövlət başçısının etimadını həmişə yüksək səviyyədə doğrultmağa çalışırlar.
Rəhman SALMANLI,
"Azərbaycan"
