Azərbaycan Prezidenti İlham Əliyevin yerli televiziyalara müsahibəsi zamanı ana dilimizlə bağlı söylədiyi fikirləri Gürcüstan azərbaycanlısı kimi çox böyük məmnuniyyətlə qarşıladım. Çünki həqiqətən də dilimizin məhz bu cür yanaşmaya ciddi ehtiyacı var idi.
Bu sözləri AZƏRTAC-a müsahibəsində Gürcüstan Azərbaycanlıları Konqresinin (GAK) sədri Hüseyin Yusifov deyib.
Onun sözlərinə görə, dilə münasibət əslində dövlətin özünə münasibətidir və bu münasibət artıq Azərbaycan Prezidenti tərəfindən çox açıq və qətiyyətli şəkildə ortaya qoyuldu: “Qəlbində ana dilinə hörmət və sevgi olan Gürcüstan azərbaycanlıları bunu alqışlayırlar”.
H.Yusifov hesab edir ki, hər bir soydaşımız yaşadığı ölkənin dövlət dilini bilməlidir: “Bu, mübahisəsizdir. Amma ana dilimiz də yaşamalıdır. Ana dilini yaşatmağın yolu həm də ədəbiyyatdan keçir. Bunun üçün müasir milli ədəbiyyatımız qurulmalı, inkişaf etdirilməlidir. Ədəbiyyat ana dilimizin, xüsusən də, ədəbi dilin inkişafında mühüm rol oynayır".
GAK sədri bildirib ki, bu gün Azərbaycanda dövlət səviyyəsində ədəbiyyatla bağlı müxtəlif layihələrin həyata keçirilməsi, xüsusi mükafatların təsis olunması olduqca sevindirici və mühüm hadisədir: “Bu, çox böyük və strateji bir addımdır. Çünki ədəbiyyat yaşadıqca, dil də yaşayır. Ədəbiyyatı olmayan dil tədricən zəifləyir, inkişafdan qalır, yabanı sözlər, ifadələr və anlayışlar dilimizə daxil olur və dilin mahiyyətini itirir”.
H.Yusifovun sözlərinə görə, dil inkişaf etməli, yaşamalıdır: “Tarixdə ölmüş, bir də yaşayan dillər var. Bizim dilimiz yaşayan dillərdəndir. Dilə göstərilən diqqət onun daha da inkişaf etməsinə xidmət edir. Bu yanaşma dilimizin gələcəyi üçün mühüm bir təminatdır. Ana dilimiz yaşamalıdır və bu istiqamətdə dövlətin mövqeyi açıq şəkildə ortaya qoyulub".
GAK sədri hesab edir ki, bu baxımdan Prezident İlham Əliyevin çıxışı Azərbaycan dilinə münasibətdə çox vacib və vaxtında verilmiş mesajdır: "Prezidentin çıxışında qeyd etdiyi kimi, xaricdə bəzi dövlət başçıları da deyirlər ki, Azərbaycan dili olduqca zəngin, mədəni, işləklik baxımından güclü, qulağa və ürəyə yatımlı bir dildir. Azərbaycan dili, sadəcə, ünsiyyət vasitəsi deyil, yüksək mədəniyyət daşıyıcısıdır. Bunun da tarixi kökləri, əsasları var. Azərbaycan dili tarixən diplomatiya dili olub və bu gün də qorunmalı, inkişaf etdirilməlidir, bu mövqe təkcə ölkə daxilində deyil, xaricdə yaşayan soydaşlar üçün də mühüm mesaj və siqnaldır".
H.Yusifov bildirib ki, Azərbaycan dili köklü tarixə malik dildir: “Yaxın Şərqdə və Avropada diplomatiya dili olub. Bu gün bu həqiqətlərin dövlət başçısı səviyyəsində səsləndirilməsi, xüsusilə Gürcüstanda yaşayan soydaşlarımız üçün də ciddi siqnaldır”.
O, rəhbərlik etdiyi qafqaztürk.com portalında Azərbaycan dilinin qorunması və inkişafı istiqamətində görülən işlərdən də danışıb: “Biz portal üçün xəbər və reportajları hazırlayarkən ana dilinin qorunmasına xüsusi diqqət yetiririk. Bəzən media məkanında Azərbaycan dilinin qaydalarının pozulduğunu görürük. Belə hallarda açıq şəkildə kimisə ittiham etmirik, kimsəni gözdən salmırıq. Hardasa səhv gördükdə, özəl şəkildə müraciət edib bildiririk. Çünki məqsəd qışqırmaq, kimisə təhqir etmək deyil, səhvləri düzəltmək, dilin dəyərlərini inkişaf etdirmək və qorumaqdır”.
H.Yusifov əlavə edib ki, Gürcüstanda fəaliyyət göstərən yerli Azərbaycandilli portalların işi təqdirəlayiqdir: “Onların fəaliyyəti həm xalqımızın maariflənməsinə, həm də ana dilimizin yaşamasına xidmət edir”.
O, eyni zamanda, portalda çalışan tanınmış dilçi İbrahim Xəlilin fəaliyyətini də xüsusi qeyd edib: “O, Azərbaycan dilini və ədəbiyyatını mükəmməl bilən ziyalıdır. Əsas fəaliyyəti məhz dilin saflığının qorunmasına xidmət edir”.
Hüseyn Yusifov media məkanında dilə yanaşmanın məsuliyyət tələb etdiyini də vurğulayıb: “Dilə münasibət ciddi olmalıdır. Yazılarda dil qüsurlarına yol verilməməlidir. Mətnlər qulağa xoş gəlməli, oxucu tərəfindən rahat qəbul olunmalıdır. Oxucu yazını oxuyanda anlamalıdır ki, qarşısındakı mətn Azərbaycan ədəbi dilində yazılıb. Dialekt və şivələr xalqın mədəni irsinin bir hissəsidir, lakin ədəbiyyat və media dili fərqlidir. Məsələn, Borçalı bölgəsinin özünəməxsus ləhcəsi var və bu, mədəni zənginliyimizdir. Amma ədəbiyyat dili ləhcə dili deyil. Mətnlər mütləq Azərbaycan ədəbi dili əsasında yazılmalıdır”.
Onun sözlərinə görə, rəhbərlik etdiyi media platformasında əsas məqsəd oxucuya nümunəvi dil təqdim etməkdir: “Biz çalışırıq ki, yazılarımızı oxuyan hər kəs desin: "Bax, Azərbaycan ədəbi dili məhz budur".
jpg_1767989126.jpg)
