"Vətən müharibəsindən sonra Paşinyan hesab etdi ki, Ermənistana yeni təminat verən qüvvə lazımdır. Ona görə də regiondan qovulan Minsk qrupunun üzvləri - Fransa və ABŞ-ni fərqli ampluada regiona qaytarmaq qərarı verdi".
Bu sözləri "Azərbaycan" qəzetinə Milli Məclisin deputatı Pərvanə Vəliyeva deyib. O bildirib ki, bu dəfə həmin ölkələr müxtəlif missiyalarla yalnız Ermənistan ərazisində möhkəmlənməyə başlayıblar. Elə buna görə də Ermənistanla yanvarın 20-də istefaya gedəcək Cozef Baydenin səlahiyyət müddəti başa çatan administrasiyası ilə strateji tərəfdaşlıq sazişi imzalanıb. İmzalanma A.Mirzoyan və Blinkenin iştirakı ilə Vaşinqtonda baş tutub. "2024-cü ilin aprelində ABŞ-nin Bayden administrasiyasının təşəbbüsü ilə Brüsseldə Aİ və Ermənistan arasında görüş keçirilib. Bu sənəd həmin prosesin məntiqi davamıdır. Bu görüşdə də ABŞ hər vəchlə Ermənistana həm iqtisadi, həm də hərbi dəstək verilməsini dəstəkləyirdi. İlkin mərhələdə üçtərəfli sazişdən sonra məsələnin ikitərəfli formata keçəcəyini gözləyirdik və belə də oldu", - deyə o əlavə edib.
Deputat qeyd edib ki, Fransa Ermənistana həm maddi, həm də hərbi yardımlarını dəfələrlə artırıb. Makron hökuməti Ermənistanı hərbiləşdirməklə oradakı revanşist qüvvələri təşviq edir, Azərbaycana qarşı yeni müharibəyə həvəsləndirir. Ermənistanı silahlandıran və ona havadarlıq edən başlıca ölkə Fransa senatorları və silahlı qüvvələr naziri 23 oktyabr 2024-cü ildə senatda keçirilən ictimai dinləmə zamanı bunu etiraf edib. Fransa hesab edir ki, regionda qalmasının tək yolu Ermənistanın daxilinə daha dərindən inteqrasiya etməsidir, çünki Azərbaycan heç bir xarici qüvvəni öz ərazisinə buraxmır və ölkənin suverenliyini hökumət yüz faiz öz təminatı altında saxlayır.
2022-ci il oktyabrın 20-də iki ay müddətinə yaradılmış Aİ-nin Ermənistan-Azərbaycan sərhədindəki missiyasının müddəti bitdikdən sonra Fransanın öncüllüyündə və Azərbaycan tərəfinin razılığı olmadan ona 20 fevral 2023-cü ildən etibarən daha iki il müddətinə mandat verilib. Aİ Xarici İşlər Nazirləri Şurasının 11 dekabr 2023-cü ildəki iclasında Fransanın təşəbbüsü ilə təşkilatın Ermənistandakı missiyasının şəxsi heyətinin sayının 138-dən 209-a qaldırılması barədə qərar qəbul edilib. Hazırda onun əlavə müddətə uzadılması istiqamətində müzakirələr aparılır. Fransa ölkəmizə qarşı olan bu "binokl diplomatiyası"nın lokomotividir.
P.Vəliyeva vurğulayıb ki, Vətən müharibəsi təkcə işğalçı üzərində qələbə deyildi, həm də işğalçını həvəsləndirən bəzi siyasi liderlərin məğlubiyyəti idi: "Makron müharibənin ilk günlərindən Azərbaycana müxtəlif formalı təzyiqlər göstərməyə çalışdı, ölkəmiz əleyhinə BMT Təhlükəsizlik Şurasında 5 qətnamə layihəsi irəli sürdü. 2020-ci ilin oktyabrında BMT TŞ-də Fransa tərəfindən də dəstəklənən TŞ Sədrinin Bəyanatının qəbul edilməsi təşəbbüsü olub. Bu təşəbbüs həmin vaxt şuranın üzvü olan 7 Qoşulmama Hərəkatı üzvü dövlətinin mövqeyi nəticəsində baş tutmadı. Buna rəğmən dövlətimizin başçısı sonacan təzyiqlərə məhəl qoymayaraq qələbə qazandı".
Deputat bildirib ki, Makron Ermənistanın məğlubiyyətini şəxsi uğursuzluğu kimi qəbul etdiyindən müharibədən 4 il keçməsinə baxmayaraq, Azərbaycan əleyhinə səylərini dayandırmır. O, praqmatik düşüncədən kənara çıxaraq məsələni şəxsiləşdirir. Erməni xalqı bilməlidir ki, Fransa onları uçuruma aparır və bu, onların növbəti faciəsi ilə nəticələnə bilər. Avropa İttifaqı istiqamətinə dönən Ermənistan oyunların alətinə çevrilib.
Ə.QARDAŞXANOVA,
"Azərbaycan"
jpg_1763137673.jpg)
