Prezident İlham Əliyev AMEA-nın 80 illiyində etdiyi tarixi çıxışında Azərbaycanın ictimai, siyasi, elmi və mədəni həyatına dair bir çox mühüm məqamlara toxundu. O, çıxışında Qərbi Azərbaycan məsələsinə, soydaşlarımızın doğma torpaqlarına qayıdışı mövzusuna xüsusi önəm verdi. Prezident qeyd etdi ki, uzun illər ərzində ermənilər və erməni diasporu Azərbaycan tarixini saxtalaşdırmaqla məşğul olublar. Təəssüf ki, bu saxtakarlıqlar bu gün də davam edir. Bu təhriflərin qarşısına yalnız öz həqiqətlərimizi elmi əsaslarla qoymaqla çıxa bilərik.
Bu sözləri AZƏRTAC-a açıqlamasında Qərbi Azərbaycan İcmasının İdarə Heyətinin sədri, Milli Məclisin deputatı Əziz Ələkbərli söyləyib.
O deyib: “Prezident İlham Əliyev Azərbaycanın tarixi-coğrafi məkanına diqqət çəkərək bildirdi ki, ölkəmizin qədim əraziləri bugünkü inzibati sərhədlərdən daha geniş olub. O vurğuladı ki, bu gün də Azərbaycan xalqının nümayəndələri dövlət sərhədlərimizdən kənarda, öz tarixi torpaqlarında yaşayırlar və yaşadıqları ölkələrin dövlətçiliyinə daim töhfə veriblər. Azərbaycan xalqının xarakterində heç vaxt separatizm olmayıb, bu, ermənilərdən bizi fərqləndirən əsas xüsusiyyətlərdəndir. Bir vaxtlar Ermənistanda da bizim soydaşlarımız yaşayıblar. Lakin onlar zaman-zaman ermənilər tərəfindən öz doğma torpaqlarından qovulublar”.
Deputatın sözlərinə görə, XX əsrin əvvəllərində Çar Rusiyası tərəfindən hazırlanmış hərbi-topoqrafik xəritələrdə Qərbi Azərbaycan ərazisindəki yaşayış məntəqələri öz orijinal - türk və azərbaycanlı adları ilə göstərilib. Dövlətimizin başçısı alimlər və Milli Elmlər Akademiyasının strukturları qarşısında mühüm vəzifə qoydu: Qərbi Azərbaycan həqiqətlərini daha geniş şəkildə dünyaya çatdırmaq, bu istiqamətdə kitabların, tədqiqatların, sərgilərin sayını artırmaq lazımdır.
jpg_1773660552.jpg)
