Revanşist keşiş xalqı bazar günü mitinqə çağırıb
Ermənistanda müxalif qüvvələrin Nikol Paşinyan iqtidarına qarşı fəaliyyəti genişlənsə də, bu xüsusda keçmiş hərbi xunta yenidən önə çıxmağa cəhd etsə də, Xocalı soyqırımını törədənlərin və son savaşda məğlub olan müharibə canilərinin Paşinyanı hakimiyyətdən devirmək planları görünən odur ki, elə də asan olmayacaq.
Keşiş Baqrat Qalstanyan ictimai televiziyanın efirində çıxış edərək, əhalini bazar günü Respublika meydanında keçiriləcək mitinqə çağırıb. Televiziya efirində o, erməni xalqını mövcud iqtidarı hakimiyyətdən salmağa səsləyib.
Xatırladaq ki, bu qüvvələrin aprel-may aylarında keçirdiyi aksiyalar heç bir nəticə verməmişdi. Əhalinin əksər hissəsi müxalifəti dəstəkləmir. Bununla belə, Qalstanyan və onun havadarları payız mitinqlərinə böyük önəm verir və yaxud belə bir görüntü yaradırlar.
Bu arada Nikol Paşinyanın və arvadı Anna Akopyanın davranışları Ermənistanda daha çox qıcıq yaratmağa başlayıb. Təkcə müxalifət tərəfdarları deyil, hətta Paşinyanın ən yaxın adamları, partiya üzvləri də narazılıqlarını dilə gətirməyə başlayıblar. Qeyd olunur ki, ölkədə mövcud gərginlik fonunda Nikol Paşinyan öz adamlarına xalq arasında çox dolanmamağı, qıcıq yaratmamağı tapşırıb. Paşinyan və ailəsinin özləri belə buna məhəl qoymurlar. Xüsusən Anna Akopyanın tez-tez xalq arasında görünməsi böyük narazılıq yaradır. Çünki Anna Akopyanın onlarla mühafizəçinin əhatəsində olması xalqla bu cür yaxınlığın süni olmasını göstərir, həmçinin cəmiyyətdə ikrah hissi doğurur. Qıcıqlandırıcı daha bir məqam isə Akopyanın geyimidir.
Paşinyanın arvadının son səfəri zamanı çəkdirdiyi selfi kəskin narazılıqla qarşılanıb. Baş nazirin tərəfdarları olan "Vətəndaş sazişi" üzvləri belə Akopyanın açıq-saçıq geyimdəki selfisindən hiddətləniblər.
Siyasi analitik Hakop Badalyan isə deyib ki, Paşinyan və arvadı bir tərəfdən velosiped sürmək və ya küçədə qayğısız gəzmək kimi təbliğat fəndləri ilə tərəfdarlarına sakitlik nümayiş etdirmək istəyirlər. Digər tərəfdən isə narahat ola bilərlər, lakin bu yolla narazı qalan tərəfdarlarını sakitləşdirmək istəyirlər.
Onun sözlərinə görə, bu gün Ermənistanın və siyasi rəhbərliyin resursları o qədər məhduddur ki, onlar təbliğat üsullarına əl atırlar: "2018-ci ildən sonra mövcud imkanlardan sosial-siyasi problemlərin həlli üçün istifadə edilməli idi, əvəzində fəaliyyətdə olan hakimiyyət keçmişin və indikinin qısamüddətli məsələləri ilə məşğul idi. Ermənistanda daxili siyasi hadisələrin əsas generatoru xarici qüvvələrdir, Böyük Britaniyanın isə burada marağı daha böyükdür".
Görünən odur ki, Ermənistanda daxili siyasi vəziyyət tədricən mürəkkəbləşməyə doğru gedir. Bununla da ölkə sonu görünməyən daxili siyasi böhrana qədəm qoyur.
Elçin CƏFƏROV,
"Azərbaycan"
