Qazaxıstan ilə Azərbaycanı ortaq tarix və qardaşlıq əlaqələri birləşdirir.
Bu sözləri AZƏRTAC-a müsahibəsində Qazaxıstan Respublikası Prezidenti yanında Qazaxıstan Strateji Araşdırmalar İnstitutunun (KİSS) Asiyaşünaslıq şöbəsinin aparıcı eksperti Baurjan Auken deyib.
Onun sözlərinə görə, diplomatik münasibətlər qurulandan bəri Qazaxıstan və Azərbaycan müxtəlif sahələrdə əməkdaşlığı ardıcıl olaraq gücləndirib və genişləndirib. Əsas istiqamətlərdən biri nəqliyyat və logistikadır ki, burada Orta Dəhlizin (Trans-Xəzər marşrutu) potensialı fəal şəkildə inkişaf etdirilir.
“Hazırda Xəzər dənizinin dibi ilə fiber-optik kabel xəttinin çəkilməsi layihəsi həyata keçirilir. Bundan başqa, mədəniyyət və təhsil sahəsində əməkdaşlıq güclənir. Azərbaycanın Füzuli şəhərində Kurmanqazı adına Uşaq İncəsənət Mərkəzi açılıb”, -deyə ekspert vurğulayıb.
Ekspert əlavə edib ki, Qazaxıstan və Azərbaycan ikitərəfli əlaqələrin inkişafı ilə yanaşı, Türk Dövlətləri Təşkilatı (TDT) çərçivəsində də fəal əməkdaşlıq edir və bu, Azərbaycanın Qəbələ şəhərində bu yaxınlarda keçirilən Zirvə Görüşündə də öz təsdiqini tapıb.
O qeyd edib: “Sözsüz ki, Azərbaycan Prezidentinin Qazaxıstana dövlət səfəri ölkələrimiz arasında tərəfdaşlığın daha da möhkəmlənməsinə və genişlənməsinə yeni təkan verəcək”.
B.Auken Qazaxıstandakı Azərbaycan diasporunun ikitərəfli münasibətlərin dərinləşməsinə mühüm töhfə verdiyini də diqqətə çatdırıb.
İqtisadi-ticari əməkdaşlıqdan danışan ekspert bildirib ki, yaxın illərdə iki ölkə arasında ticarət dövriyyəsinin bir milyard dollara çatdırılması nəzərdə tutulur. “Bu, bizim ticarət və iqtisadi potensialımızın gücləndirilməsi üzrə iddialı planlardan xəbər verir”, -deyə o əlavə edib.
Azərbaycanın dövlət başçısının Qazaxıstana səfərinin əhəmiyyətini vurğulayan ekspert deyib ki, süni intellektin inkişafı, rəqəmsallaşma, kreativ iqtisadiyyat iki qardaş ölkə arasında əməkdaşlığın əsas istiqamətləri kimi ortaya çıxır, bu istiqamətdə yeni perspektivlər açır.
