Bu gün Qazaxıstanla Azərbaycan arasında təkcə logistika həllərinə deyil, həm də xüsusən rəqəmsallaşma və energetika sahələrində gələcəyin iddialı infrastruktur layihələrinə strateji qarşılıqlı fəaliyyətin yeni səviyyəsi formalaşır.
Bu barədə AZƏRTAC-a müsahibəsində Qazaxıstanın iqtisadiyyat və nəqliyyat üzrə eksperti, Qazaxıstan Respublikasının “Heavy Trans” Böyük və Ağır Yükdaşıyıcıları Milli Assosiasiyasının beynəlxalq layihələr üzrə direktor müavini, elmlər namizədi Dastan Ospanov bildirib.
Agentliyin həmsöhbəti iki layihəni - Xəzərin dibi ilə çəkilən fiber-optik kabel və sualtı neft kəmərini xüsusilə maraqlı və perspektivli adlandırıb.
Onun sözlərinə görə, Aktau ilə Sumqayıt arasında sualtı fiber-optik kabel layihəsi uzunluğu təqribən 380 kilometr və layihə gücü 400 Tbit/s-ə qədər olan kəmərin rəqəmsal analoqu hesab olunur. O, Asiya ilə Avropa arasında birbaşa və təhlükəsiz rəqəmsal magistralın formalaşdırılmasına yönəlmiş transregional “Digital Silk Way” (“Rəqəmsal İpək Yolu”) təşəbbüsünün tərkib hissəsidir.
Ekspert vurğulayıb ki, Layihə qabaqcıl mühəndislik standartlarına uyğunluğu təmin edən beynəlxalq texniki tərəfdaş “Pioneer Consulting” (ABŞ) şirkətinin nəzarəti altında “Qazaxtelecom” və “AzerTelecom” tərəfindən birgə həyata keçirilir.
Dastan Ospanov qeyd edib ki, aktiv mərhələ - marşrut hissəsində batimetrik və geofiziki tədqiqatlar cari ilin avqustunda başlayıb. Tikinti işlərinin 2026-cı ilin sonunda başa çatdırılması gözlənilir.
O əmindir ki, kabel qeyri-sabit quru tranzit kanallarından yan keçərək region üçün rəqəmsal muxtariyyət yaratmalı, rəqəmsal hablar kimi Bakı və Astananın mövqelərini gücləndirməlidir. Bundan əlavə, o, Qazaxıstanın bulud platformalarından məlumat mərkəzlərinə rəqəmsal ixrac üçün imkanlar açacaq.
jpg_1765800994.jpg)
jpg_1765800788.jpg)
