Azərbaycanın paytaxtı və onun ən hündür nöqtələrindən biri sayılan müqəddəs Şəhidlər xiyabanı yenidən qərənfil yağışına, gül-çiçək atəşinə tutulub. Xalqımız 1990-cı ilin qanlı yanvar gecəsi baş verən faciəli hadisənin qurbanlarını yad edir. Onlar 1990-cı il yanvarın 19-dan 20-nə keçən gecə sinələrini tankların, topların, ölümsaçan güllələrin qabağına verərək öz qanları ilə şanlı tarix yazdılar. Həmin gecə yüzlərlə günahsız körpə, gənc, qoca, qadın və uşaq şəhərə yeridilən tanklardan və digər hərbi texnikalardan atəş açaraq şəhərin küçələrini qan gölünə çevirdilər. Qanlı şənbə gecəsi imperiya ordusunu öz xislətini, qəddarlıq və qaniçənliyini, xalqımızı isə özünün müqəddəs azadlıq arzuları yolunda dönməzliyini nümayiş etdirdi.
Sakit və dinc Bakı küçələrində gurlayan tanklar, atılan mərmilər, əliyalın sakinlərin üstünə yeridilən zirehli texnika böyük amallar, müstəqillik və suverenlik uğrunda mübarizəyə qalxan xalqımızı bu yoldan çəkindirə bilmədi. Azadlıq və müstəqillik elə ülvi hisslərdir ki, onu ən dəhşətli silahların lüləsindən tuşlanan mərmilər də susdura bilməz. 36 il əvvəl xalqımızın qəhrəman oğul və qızları öz fədakarlıqları ilə bunu sübut etdilər. Təkcə sübut yox, həm də addım-addım, zaman-zaman ona doğru irəliləyərək öz istəklərinə nail oldular. 20 yanvar gecəsi müqəddəs yolda qurban gedənlərin əməlləri ölkəmizin müstəqilliyə qovuşması, Vətən müharibəsində Qarabağ torpağının və Şərqi Zəngəzurun işğalçılardan tamamilə təmizlənməsi, ölkəmizin ərazi bütövlüyünün bərpa olunması və suverenliyinin qazanılması ilə nəticələndi. Ona görə də bu gün onların xatirəsi təkcə kədər, hüzn və göz yaşı ilə deyil, məğrurluq, vüqar və qürur hissi ilə yad edilir. Qəm, kədər, həsrət burada qürur, əzəmət və ləyaqət hissinə qarışır.
Havanın soyuq və şaxtalı olmasına baxmayaraq, Şəhidlər xiyabanının ətrafında izdiham yaşanır. Göydən ələnən yağış damcılarını arada qar dənəcikləri əvəz edir. Həmin gecənin qurbanları böyük iradə və yüksək dəyanət nümayiş etdirərək öz sinələrini avtomat güllələrinin, tank mərmilərinin qabağına verərək azadlıq yolunun ilk şəhidləri kimi adlarını tarixə həkk etdilər. Qanlı şənbə gecəsinin qurbanları bu yolda azadlıq mücahidlərinə, xalqımızın mübarizlik və qəhrəmanlıq simvollarına çevrildilər. Ziyarətçilərin arasıkəsilməz axını onların Vətən qarşısındakı fədakarlığına və cəsurluğuna verilən yüksək dəyər, sevgi, hörmət və ehtiram duyğularının parlaq təzahürüdür. Başdan-başa qərənfillərə bürünmüş xiyabanda onların uyuduğu məzarlar qərənfil yağışına tutulur. Əbədiyyət ünvanına üz tutan ziyarətçi axını azadlıq və müstəqillik yolunun ilk şəhidlərinin çiçək qədər təravətli, yağış qədər təmiz hisslərini paylaşır.
... Çiçəklər hiss və duyğuların ən yaxşı ifadəçilərindən biridir. Bu gün onların məzarlarına səpilən qərənfillər də həmin duyğuların, eləcə də onların unudulmazlığını, əbədiliyini göstərən sevginin ifadəsi, ardı-arası kəsilməyən ziyarətçi axını isə şəhidlərin əməllərinə olan qədirbilən münasibətin təntənəsidir.
AZƏRTAC
19 (1)jpg_1771885865.jpg)
