“COP29 iqlim böhranına qarşı kollektiv iradəmizin bariz nümunəsi oldu. Bakı şəhərində Paris Sazişinin bütün sütunları üzrə irəliləyişə nail olduq – uzun illərdir davam edən yüksək dürüstlüklü karbon bazarları üzrə çıxılmaz vəziyyətdən çıxış yolu tapıldı, yeni birgə iqlim maliyyələşdirmə məqsədi qəbul edildi və İtki və Zərərlərə dair Fondun fəaliyyəti təmin olundu. Bu nəticələr güclü çoxtərəfli əməkdaşlığın real nəticələr gətirə biləcəyini sübut etdi”.
AZƏRTAC xəbər verir ki, bu barədə Bonn İqlim Sammiti çərçivəsində Potensialın artırılması üzrə Paris Komitəsinin (PCCB) doqquzuncu iclasında COP29 Sədrliyinin nümayəndəsi, Xarici İşlər Nazirliyinin İqlim Diplomatiyası İdarəsinin rəis müavini Ülfət Maçanov çıxışında deyib.
“İqlim dəyişikliyi ilə mübarizədə inkişaf etməkdə olan ölkələrin imkanlarının artırılması, onların davamlı inkişaf yolunu seçməsi, istixana qazı emissiyalarını azaldılması və iqlim dəyişikliklərinin təsirlərinə qarşı dayanıqlılığını artırılması baxımından potensialların gücləndirilməsi olduqca vacibdir.
Paris üzrə İxtisasartırma Komitəsi bu sahədə mühüm rol oynayır. O,BMT İqlim Dəyişikliyi Çərçivə Konvensiyası və Paris Sazişi çərçivəsində həyata keçirilən çoxşaxəli ixtisasartırma səyləri arasında əlaqələndirməni gücləndirmək üçün əsas platformadır,” – deyə Ülfət Maçanov qeyd edilib.
Nümayəndə, həmçinin bildirib ki, Komitənin 2025–2029-cu illəri əhatə edəcək yeni Fəaliyyət Planının hazırlanması bu iclasın əsas gündəliyində yer alır. Sənədin, Bakı görüşündə müəyyən edilmiş prioritet istiqamətlər əsasında formalaşdırılması nəzərdə tutulur.
Tədbirdə iştirak edən PCCB üzvlərinə, Tərəflərin nümayəndələrinə, müşahidəçilərə, gənc nümayəndələrə və digər maraqlı tərəflərə çağırış edilib ki, öz təcrübələrini, baxışlarını və dərslərini bölüşsünlər. “Bu plan həm iddialı, həm də reallığa əsaslanan şəkildə tərtib olunmalıdır,” – deyə XİN nümayəndəsi vurğulayıb.
COP29 Sədrliyi adından bildirilib ki, bu müzakirələr nəticəsində inkişaf etməkdə olan ölkələrdə iqlim tədbirlərinə mane olan problemləri aradan qaldırmaq üçün praktik və tətbiq oluna biləcək həll yolları müəyyən edilməlidir. İxtisasartırma məsələsi texniki deyil, ədalətli və effektiv iqlim fəaliyyətinin əsasını təşkil edən bir məsələdir.
Sonda vurğulanıb ki, Azərbaycan Respublikasının COP29 Sədrliyi, Braziliya ilə COP30 prosesinə keçid çərçivəsində, iqlim tədbirlərinin həyata keçirilməsi üçün vacib olan vasitələrin – xüsusilə ixtisasartırmanın ön plana çəkilməsi istiqamətində əməkdaşlığa hazırdır.
jpeg_1765955251.jpeg)
