ABŞ, Avropa İttifaqı və Kanada kimi Qərb ölkələrinin gördüyü məhdudlaşdırıcı tədbirlərə baxmayaraq, avqust ayında Çinin əsas istehsalçılarının elektrik avtomobil satışları azalmayıb. Çin elektrik avtomobil şirkətlərinin satış məlumatlarından əldə etdiyi məlumata görə, “BYD” və “Xpeng” kimi müxtəlif şirkətlərin avtomobillərinə tələb ötən ay da intensiv şəkildə davam edib.
Dünyanın ən böyük elektrik avtomobil istehsalçısı “BYD”nin avqust ayında satışları keçən ilin eyni dövrünə görə 30 faiz artaraq 370 min 854 ədədə çatıb. Onlardan 148 min 470-i tam elektrik, 222 min 384-ü isə hibrid modellər olub. Şirkətin elektrik avtomobil satışları illik yüzdə 12, hibrid satışları isə 48,3 faiz artıb.
Çin şirkəti “Xpeng” də avqust ayında 14 min 36 elektrikli avtomobil satıb. Şirkətin satışları aylıq 26 faiz, illik isə 2,5 faiz artıb. Şirkət ötən ay “Mona Mo3” sedan modelini rəsmi olaraq təqdim edib. Bu modelə olan gözləntilər şirkətə marağı daha da artırıb.
Yüksək səviyyəli modelləri ilə tanınan “Nio” avqust ayında 20 min 176 yeni elektrikli avtomobil sataraq, şirkətin satışlarını illik 4 faiz artırıb.
“Zeekr” ötən ay 18 min 15 avtomobil satıb. Şirkətin satışları aylıq olaraq 15 faiz, illik bazda isə 46,4 faiz artıb.
Çində istehsal edilən “Tesla” modellərinin ixracı da daxil olmaqla satışı avqust ayında 86 min 697 ədədə çatıb. Tesla Çinin satışları aylıq 17 faiz, illik isə 3 faiz artıb.
ABŞ və Kanada Çin istehsalı olan elektrikli avtomobil idxalına 100 faiz gömrük rüsumu tətbiq edərkən, Avropa İttifaqı indiki 10 faizlik gömrük rüsumunun üzərinə yüzdə 36,3-ə çatan yeni vergi tətbiq etməyə hazırlaşır.
Ülkər XASPOLADOVA,
“Azərbaycan”
