Bu il təbii qaza qlobal tələbatın əvvəlki illə müqayisədə 1,7 faiz artaraq 4 trilyon 193 milyard kubmetrə çatacağı proqnozlaşdırılır.
AZƏRTAC “Anadolu” agentliyinə istinadla xəbər verir ki, tələbatın bölgə üzrə Yaxın Şərq və Asiyada olacağı təxmin edilir. Mənzil, sənaye və enerji istehsalı sektorları isə bu tələbatın əsas hərəkətverici qüvvəsi olacaq.
Belə ki, təbii qaz istehlakında ən böyük artımın 28,2 milyard kubmetrlə Yaxın Şərqdə olacağı proqnozlaşdırılır. Yaxın Şərqi 15,9 milyard kubmetrlə Asiya, 10,4 milyard kubmetrlə Şimali Amerika, 5,7 milyard kubmetrlə Afrika, 5,2 milyard kubmetrlə Avropa, 3,9 milyard kubmetrlə Cənubi Amerika, 1,7 milyard kubmetrlə Rusiyanın izləyəcəyi gözlənilir.
İlin birinci yarısında LNG-nin qlobal təbii qaz bazarında payı illik müqayisədə 2,2 faiz artaraq 340 milyard kubmetrə çatıb. Bu artım yanvarın 1-də Rusiya qazının Ukraynadan tranzitinin dayandırılması və sonradan Avropanın anbar tutumunun azalması səbəbindən idxalın artması ilə əlaqədardır.
Avropada LNG idxalı birinci yarımildə 23,5 faiz artarkən, Asiyada mülayim keçən qış səbəbindən, Çin və Yaponiya kimi əsas bazarlarda anbarların dolu olması və yüksək LNG qiymətləri nəticəsində idxal 8,8 faiz azalıb.
Dünyanın ən böyük təbii qaz istehsalçılarından biri olan ABŞ-da yüksək anbar tutumu səviyyəsi və qışın mülayim keçməsi səbəbindən aşağı qiymətlərə baxmayaraq hasilat sabit qalıb.
Təbii qaz hasilatının bu il təxminən 2,1 faiz və ya 87 milyard kubmetr artımla 4 trilyon 177 milyard kubmetrə çatacağı proqnozlaşdırılır.
Hasilatın ən böyük artımı 40,1 milyard kubmetrlə Şimali Amerikada gözlənilir. Şimali Amerikadan sonra 21,3 milyard kubmetrlə Yaxın Şərq, 13 milyard kubmetrlə Afrika, 10,1 milyard kubmetrlə Asiya, 3,9 milyard kubmetrlə Cənubi Amerika, 1,6 milyard kubmetrlə Okeaniyanın olacağı gözlənilir. Həmçinin hasilatın Avropada 3,4 milyard kubmetr, Okeaniyada isə 300 milyon kubmetr azalacağı proqnozlaşdırılır.
jpg_1765800994.jpg)
jpg_1765800788.jpg)
