Bugünkü əsas çağırışlardan biri də mənzil siyasətinin daha inteqrasiya olunmuş şəkildə nəzərdən keçirilməsidir. Çünki mənzil təhlükəsizliyi iqlim dayanıqlılığı, sosial müdafiə, iqtisadi iştirak və gender bərabərliyi məsələlərindən ayrı şəkildə təmin oluna bilməz.
AZƏRTAC xəbər verir ki, bunu Ailə, Qadın və Uşaq Problemləri üzrə Dövlət Komitəsinin sədri Bahar Muradova Ümumdünya Şəhərsalma Forumunun 13-cü Sessiyası (WUF13) çərçivəsində keçirilən “Gender bərabərliyi və qadınların gücləndirilməsi üçün adekvat mənzil” mövzusunda dəyirmi masada səsləndirib.
O bildirib ki, by baxımdan çoxtərəfli tərəfdaşlıqlar xüsusi əhəmiyyət daşıyır. Dövlət institutları, beynəlxalq təşkilatlar, yerli hakimiyyət orqanları, özəl sektor və vətəndaş cəmiyyəti arasında əməkdaşlıq gender həssas və dayanıqlı mənzil sistemlərinin formalaşdırılması üçün mühüm platforma yaradır.
“Qadın hüquqları təşkilatlarının, vətəndaş cəmiyyətinin və yerli icmaların iştirakı belə risklərin azaldılması və uyğunlaşma strategiyalarının hazırlanmasında mühüm rol oynayır. Xüsusilə iqlim dəyişiklikləri, münaqişə və məcburi köçkünlük şəraitində qadınların ehtiyac və təcrübələrinin qərarvermə proseslərində nəzərə alınması daha dayanıqlı və effektiv nəticələrin əldə edilməsinə imkan verir”,- deyə Bahar Muradova bildirib.
Dövlət Komitəsinin sədri qeyd edib ki, aparılan müzakirələrdə qadınların torpaq və mənzil hüquqlarını qoruyan hüquqi mexanizmlərin daha da təkmilləşdirilməsinə, gender həssas urban siyasətlərin təşviqinə xüsusi diqqət yetirilməli və müsbət təcrübələrin tətbiqinə çalışmalıdır.
“Qadınların şəhərsalma və iqlim siyasətində iştirak imkanlarının genişləndirilməsi, eləcə də gender əsaslı məlumat bazalarının və sübuta əsaslanan siyasət mexanizmlərinin gücləndirilməsini xüsusi diqqət altında saxlamaq lazımdır. İnanıram ki, qadınların ehtiyac və təcrübələrini nəzərə alan mənzil sistemləri daha dayanıqlı şəhərlərin, daha güclü icmaların və daha inklüziv cəmiyyətlərin formalaşmasına mühüm töhfə verə bilər”, - deyə Bahar Muradova qeyd edib.
O bildirib ki, Azərbaycan bu istiqamətdə beynəlxalq əməkdaşlığın, təcrübə mübadiləsinin və çoxtərəfli siyasət dialoqunun gücləndirilməsinə bundan sonra da dəstək verməyə hazırdır.
