Azərbaycan qazandığı böyük zəfərdən sonrakı beş il ərzində mövqelərini daha da möhkəmləndirib. Beynəlxalq aktorlar Azərbaycan kimi qətiyyətli, ədalətli, sülhpərvər tərəfdaşla əməkdaşlığa maraq göstərirlər. Bu xüsusda 2025-ci il ölkəmiz üçün növbəti uğurlu il kimi yadda qaldı. Azərbaycan ötən 5 il ərzində mövcud reallıqları beynəlxalq birliyə qəbul etdirə bildi. Prezident İlham Əliyevin
31 Dekabr Dünya Azərbaycanlılarının Həmrəyliyi və Yeni il münasibətilə xalqa müraciətində də qeyd etdiyi kimi, "Biz Vətən müharibəsindəki Zəfərimizdən sonra yorulmadan bu Zəfəri beynəlxalq və siyasi müstəvidə möhkəmləndirmək və təsdiqləmək üçün çalışmışıq və buna nail olmuşuq. Bütün dünya bizim Zəfərimizi qəbul edir və bizim haqlı olduğumuzu əyani şəkildə görür".
Milli Məclisin deputatı Nigar Məmmədova "Azərbaycan" qəzetinə açıqlamasında bildirib ki, rəsmi Bakının əsas üstünlüklərindən biri də müharibədən sonra sülh təşəbbüsü ilə çıxış etməsidir: "Bu illər ərzində sülhün əsas təşəbbüskarı kimi Azərbaycanın nüfuzu daha da möhkəmləndi. Sülh istiqamətində atılan addımlar praktik nəticələr verməkdədir. Ötən ilin avqustunda Vaşinqtonda əldə olunan razılaşmalar da Azərbaycanın müdrik yanaşmasını təsdiqlədi. Cənab Prezidentin söylədiyi kimi, "Zəfər çalmış ölkə kimi biz məğlub edilmiş Ermənistana sülh əlimizi uzatdıq və cəmi beş ilə yaxındır ki, de-fakto sülh şəraitində yaşayırıq. Biz döyüş meydanında qan tökərək, şəhidlər verərək şanlı Qələbə qazanmışıq və bu Qələbəni dünyanın ən mötəbər yeri olan Amerikanın Ağ Evində, Amerika Prezidentinin iştirakı ilə möhürlədik. Beləliklə, 30 il ərzində əsas vəzifəmiz olan ərazi bütövlüyümüzün bərpası və bütün dünya tərəfindən bunun qəbul edilməsi məsələsi öz həllini tapmışdır".
Deputat qeyd edib ki, Azərbaycanın diplomatik uğurlarından biri də 30 ilə yaxın müddətdə münaqişənin həlli istiqamətində heç bir addım atmayan ATƏT-in Minsk qrupunun tarixin arxivinə göndərilməsi olub. Bununla da Qarabağ münaqişəsinin artıq beynəlxalq gündəlikdən tamamilə silinməsinə nail olduq. Bu da rəsmi Bakının prinsipiallığı sayəsində gerçəkləşdi. Çünki Ermənistan hər cəhdlə bu yarıtmaz qrupun çətiri altında revanşist mövqeyini davam etdirmək istəyirdi, amma Azərbaycan Prezidentinin qətiyyəti burada da öz sözünü dedi və de-fakto fəaliyyətsiz olan "Minsk üçlüyü" ləğv edildi.
N.Məmmədova vurğulayıb ki, Azərbaycan faktiki qalib, eyni zamanda sülhpərvər və ədalətli tərəf kimi regionun təhlükəsizliyinin təmin olunması istiqamətində praktik addımlar atır: "Hərbi sahədə əldə olunan nailiyyətlər də regional təhlükəsizliyin bir hissəsidir. Zəfərin 5-ci ili münasibətilə keçirilən hərbi paradda da son illər ərzində ordu quruculuğunda görülmüş işlərin bir hissəsi dünyaya nümayiş etdirildi. Təbii ki, bu, müharibəyə hazırlıq demək deyil. Dövlət başçımızın da söylədiyi kimi: "Biz yeni müharibəyə hazırlaşmırıq. Bizim üçün müharibələr arxada qaldı. Ancaq bugünkü dünyada hər bir ölkə ilk növbədə öz təhlükəsizliyi haqqında ciddi düşünməlidir. Bugünkü dünyada beynəlxalq hüquq normaları işləmir, "kim güclüdür, o da haqlıdır" prinsipi əsas prinsip kimi bir çox ölkələr tərəfindən qəbul edilib". Bu xüsusda Azərbaycanın ordu quruculuğu sahəsində gördüyü işlər regionun təhlükəsizliyi baxımından olduqca vacibdir".
Deputat bildirib ki, hər zaman bərabərhüquqlu tərəfdaşlığın tərəfdarı olan Azərbaycan həm də heç kimin daxili işlərinə müdaxilə etməməklə fərqlənir: "Cənab Prezident müraciətində bu məsələyə xüsusi toxundu. Bildirdi ki, bizə təzyiq etmək üçün heç kimin əlində heç bir vasitə yoxdur. Bizim güclü siyasi iradəmiz, xalq-iqtidar birliyi, hərbi gücümüz, iqtisadi potensialımız, enerji siyasətimiz, nəqliyyat imkanlarımız və digər amillər bizi o qədər gücləndirib ki, heç kim bizə öz iradəsini diktə edə bilməz".
Əsmər QARDAŞXANOVA,
"Azərbaycan"
