21 Noyabr 2023 17:12
333
İDMAN
A- A+

Azərbaycan millisinin futbolçusu: "Bizə inanan Azərbaycan xalqından üzr istəyirəm" – MÜSAHİBƏ


Azərbaycan millisinin və Türkiyənin "Ümraniyəspor" klubunun futbolçusu Coşqun Diniyev "Report"un suallarını cavablandırıb.

28 yaşlı yarımmüdafiəçi son qarşılaşmalar və AVRO-2024-ün seçmə mərhələsi haqqında danışıb.

- Belçikaya səfərdə 0:5 hesabı ilə məğlub oldunuz. Matç haqqında nə deyə bilərsiniz?

- Oyun barədə deyiləcək çox söz yoxdur. Gözləmədiyimiz, ağır məğlubiyyət oldu. Üç gün əvvəl qazandığımız qələbəyə kölgə salan yenilgi idi. Bizə inanan, güvənən Azərbaycan xalqından öz adımdan üzr istəyirəm.

- İsveçə 3:0 hesabı ilə qalib gəldiyiniz görüşdə orta xətdə yaxşı mübarizə aparmışdınız. Baş məşqçi sonuncu qarşılaşmanın ilk dəqiqələrində sizə niyə şans vermədi? Özünüzü hazır hiss etmirdiniz?

- Bu, baş məşqçinin seçimidir. Bu barədə nəsə demək statusuna sahib deyiləm. Qərara hörmətlə yanaşmaqdan başqa əlimizdən heç nə gəlmir. Mən və ya başqasının oynamağının fərqi yoxdur. Xalqımızı bu qədər üzməməli idik. Oynamağa hazır idim və yorğun deyildim. Amma həmin gün qərar belə idi. Yəqin ki, baş məşqçi hər birimizin fiziki durumumuzu daha yaxşı bilir.

- Ümumiyyətlə, seçmə mərhələni necə dəyərləndirirsiniz?

- İlk üç görüşü və sonuncu matçı həm oyun, həm də xal cəhətdən çox zəif keçirtdik. Məncə, digər qarşılaşmalarda yaxşı çıxış etdik və istənilən xalları qazandıq. Amma demək olar ki, ilk üç matçdakı nəticələr qrupdakı taleyimizi həll etdi. Amma bəhanə olmamalıdır. Düşünürəm ki, bu qrupda ən azı üçüncü yeri tutmalı idik.

- Baş məşqçi Canni De Byazinin Belçikadakı oyundan sonra mətbuat nümayəndələri haqqında işlətdiyi fikirlərdən yəqin ki, xəbəriniz var. Siz bu barədə nə düşünsünüz?

- İnternet vasitəsi ilə oxumuşam. Bu barədə danışmağım düzgün olmaz. Fikir bildirəcək adam mən deyiləm. Amma onu da deməliyəm ki, bizim jurnalistlər bu sözlərin heç birinə layiq deyillər. Çox hörmətli, savadlı, insani keyfiyyətləri üstün olar mətbuat nümayəndələrimiz var. Ümid edirəm ki, bu məsələ jurnalistlərimizin istədiyi tərzdə yekunlaşar.

- İtaliyalı mütəxəssisin müqaviləsinin müddəti başa çatır və onun vəzifəsindən ayrılacağı gözlənilir. Sizin fikirləriniz necədir?

- İnşallah, millimiz və ölkəmiz üçün nə xeyirlidirsə, ümid edirəm ki, AFFA rəhbərliyi həmin qərarı verəcək. Baş məşqçinin qalması və ya getməsi qurumun qərarıdır. Bizə də hər şeyi hörmətlə qəbul etmək qalır.

- Türkiyədə legioner həyatınız necə davam edir? Artıq tam uyğunlaşdığınızı deyə bilərik?

- Bəli, tam uyğunlaşmışam. Çempionatın səviyyəsi, komandamdakı durumum, hər şey ürəyimcədir. Bəzi xırda maddi problemlər var. Onlar da aradan qalxsa, özümü çox rahat hiss edəcəyəm.

“Azərbaycan”
 

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video