Astarada təhsildə yüksək uğur qazanmış məktəblilər, onların müəllim və valideynləri ilə görüş keçirilmişdir. Rayon icra hakimiyyətində keçirilən görüşdə qeyd olunmuşdur ki, yeni nəslin intellektual inkişafı, gənclərimizin yeni texnologiyaları öyrənməsi dövlətimizin diqqətindədir. 
Azərbaycanda "STEAM Azərbaycan" layihəsi istiqamətində görülən işlərə, məktəblilər arasında keçirilən müxtəlif intellektual və idman yarışlarının təşkilinə, o cümlədən "Əlaçı" verilişinə dövlət tərəfindən yüksək səviyyədə dəstək göstərilməsi buna misaldır. 
Bildirilmişdir ki, son illər respublika və beynəlxalq əhəmiyyətli yarışlarda yüksək nəticələr əldə edən Astara məktəblilərinin sayının artması  sevindiricidir. Bu uğurlar digər şagirdləri də motivasiya edir və həvəsləndirir. Deqadi kənd ümumi orta məktəbinin informatika müəllimi - "Sparrow" komandasının rəhbəri Nemət Tarverdiyev çıxış edərək qeyd etmişdir ki, 2019-2022-ci illərdə Astara məktəbliləri STEAM-lə bağlı müxtəlif sərgi və festivallarda 10 medal qazanmışlar: "Ötən il dekabrın 5-9-da Bakı Ekspo Mərkəzində STEAM Azərbaycan layihəsi çərçivəsində Elm və Təhsil Nazirliyinin dəstəyi ilə SAF-2022 (STEAM Azərbaycan Festivalı) keçirilmişdir. Ümumilikdə, 1300-dən çox məktəblinin qatıldığı festivalda 7 xarici ölkədən 127 əcnəbi iştirak etmişdir. Festivalda  "EduDrone kateqoriyası" üzrə Astara rayon Deqadi kənd ümumi orta məktəbinin "Sparrow" komandası birinci yerə layiq görülərək qızıl medal və qiymətli hədiyyələrlə mükafatlandırılmışdır". 
SAF-2022-nin qızıl medalçıları - "Sparrow" komandasının üzvləri  Deqadi kənd ümumi orta məktəbinin VII sinif şagirdləri Murad İsayev və Nuran Hacızadə çıxış edərək yeni uğurlar qazanmaq üçün bundan sonra da məsuliyyətlə çalışacaqlarını bildirmişlər. 
İctimai TV-nin "Əlaçı" verilişinin qalibi, Astara rayonu X.Şəkərov adına Tüləküvan kənd tam orta məktəbin XI sinif şagirdi Sevanə İsazadə də Elm və Təhsil Nazirliyinin diplomuna layiq görülməsində ona dəstək olan valideyn və müəllimlərinə təşəkkür etmişdir. 

Safail MƏMMƏDOV,
Astara