Türkiyə XİN Afrika Gününün 60 illiyi münasibətilə qitə ölkələrini təbrik edib
Türkiyənin Afrika ölkələri ilə əlaqələrin inkişafına münasibəti Afrika İttifaqının (Aİ) qurucu ölkələrinin prinsipləri ilə tam üst-üstə düşür. Ankara Afrika dövlətləri ilə qarşılıqlı hörmət və bərabərhüquqlu tərəfdaşlıq prinsiplərinə əsaslanan qarşılıqlı faydalı əlaqələrin tərəfdarıdır. Bu barədə Türkiyə Xarici İşlər Nazirliyinin Afrika Gününün 60-cı ildönümü ilə bağlı bəyanatında deyilir.
Nazirlik bütün qitə xalqlarını Afrikanın sülh, birlik və inkişafı ideallarına əsaslanan Aİ-nin yaranmasının ildönümü münasibətilə təbrik edib.
Türkiyə XİN-dən bildiriblər ki, müasir Afrika dünya səhnəsində öz mövqeyini gücləndirir. Onun əsas oyunçu kimi təsiri və rolu artır. Türkiyə də öz növbəsində Afrikada sülhün, sabitliyin və inkişafın gücləndirilməsi istiqamətində səylərini, habelə Afrika ölkələrinin beynəlxalq platformalarda daha çox təmsil olunmasını təmin etmək üçün təşəbbüslərini dəstəkləyir”.
Afrika Günü Afrika Birliyi Təşkilatının (ABT) yaradılması ilə təsis edilmişdir. Onun hüquqi varisi 2002-ci ilin yayında yaradılmış Afrika İttifaqıdır.
Bildirilir ki, Afrika Günü tədbirləri Aİ üzvü olan 55 ölkənin hamısında keçiriləcək.
Hazırda 38 Afrika ölkəsinin səfirliyinin fəaliyyət göstərdiyi Ankarada Afrika Gününə həsr olunmuş tədbirlər, o cümlədən Afrika ölkələrinin əl işlərindən ibarət sərgi də keçiriləcək.
Xatırladaq ki, 1963-cü il mayın 25-də Əddis-Əbəbədə (Efiopiya) Afrika Hökumətlərinin 1-ci Konfransında dövlətlərarası Afrika Birliyi Təşkilatı (ABT) yaradılıb və onun nizamnaməsi 30 Afrika ölkəsi tərəfindən imzalanıb.
ABT öz məqsədləri kimi bunları müəyyənləşdirmişdi: qitə ölkələrinin birliyinin və həmrəyliyinin gücləndirilməsi; Afrika dövlətlərinin fəaliyyətlərinin əlaqələndirilməsi və hərtərəfli əməkdaşlığının inkişafı, suverenliyin, ərazi bütövlüyünün və müstəqilliyinin qorunması; müstəmləkəçiliyin bütün formalarının məhv edilməsi və beynəlxalq əməkdaşlığın təşviqi.
Təyin olunmuş məqsədlərin uğurla həyata keçirilməsi üçün ABT üzvləri xarici siyasət, iqtisadiyyat, elm və texnologiya, müdafiə və təhlükəsizlik, mədəniyyət və səhiyyə sahələrində öz fəaliyyətlərini əlaqələndirməyi öhdələrinə götürüblər.
Əsas prinsiplər isə bərabərlik və üzv dövlətlərin daxili işlərinə qarışmamaqdır; onların ərazi bütövlüyünə və müstəqilliyinə hörmət, mübahisələrin sülh yolu ilə həllidir.
Rizvan CƏFƏROV,
“Azərbaycan”
jpeg_1766065291.jpeg)
jpeg_1766054270.jpeg)
