Amerika sağçılarının tanınmış simalarından biri və ABŞ Prezidenti Donald Trampın ən sadiq müttəfiqlərindən olan 32 yaşlı Çarli Kirk Yuta Universitetində “Mənim səhv etdiyimi sübuta yetir” adlı ictimai debat zamanı güllələnib. Qətldən əvvəl fəal ABŞ-də baş verən kütləvi atışmalardan danışırmış. O, snayper tərəfindən boynundan vurulub və ağır vəziyyətdə xəstəxanaya çatdırılıb. Lakin həkimlər onun həyatını xilas edə bilməyiblər.
Prezidenti Donald Tramp Çarli Kirkın öldüyünü təsdiqləyib və özünün Truth Social sosial şəbəkəsində yazıb: “Böyük və əfsanəvi Çarli Kirk öldü. Amerika Birləşmiş Ştatlarının gənclərini Çarlidən yaxşı başa düşən və ya empatiya göstərən heç kim yox idi. Hər kəs onu sevirdi və heyran idi, xüsusən də mən və indi o, artıq aramızda deyil. Melaniya və mən onun gözəl həyat yoldaşı Erikaya və ailəsinə başsağlığı veririk. Çarli, səni sevirik!”
Əsasən kollec tələbələrinin iştirak etdiyi tədbir zamanı baş vermiş hadisədə başqa heç kim xəsarət almayıb. Səlahiyyətlilər atəş açan şəxsin təkbaşına hərəkət etdiyini güman edirlər.
Hücum zamanı Kirkın həyat yoldaşı və iki azyaşlı uşağı hadisə yerində olub.
Çarli Kirk ABŞ-nin ən görkəmli mühafizəkar fiqurlarından biri idi. Siyasətçi və yazıçı 1993-cü ildə İllinoys ştatının Arlinqton-Hayts şəhərində anadan olub. Onun siyasi karyerası hələ məktəbdə təhsil alarkən başlayıb.
18 yaşında olarkən, o, MAGA hərəkatının gənclər qanadının səsi kimi çıxış edən Turning Point USA təşkilatının həmtəsisçisi olub. Həmtəsisçisi Uilyam Montqomeri ilə birlikdə Kirk vergilərin azaldılması və məhdud hökumət haqqında fikirləri populyarlaşdırmağa çalışıb. Öz etirafına görə, Kirk liberallarla, xüsusən də kollec şəhərciklərində gender və immiqrasiya kimi məsələlərlə bağlı “mədəniyyət müharibələri” – müzakirələr və mübahisələrlə məşğul olub. Kirk ABŞ-dəkı mühafizəkar hərəkatın ən görünən simalarından birinə çevrilmişdi və ölkə daxilində milyonlarla tərəfdarı onu dinləyirdi...
Təsiri və büdcələri illər ərzində artan Kirk və onun təşkilatı Trampın Ağ Evə qayıtmasına kömək etmək üçün mühafizəkar gənclərin səfərbər edilməsində əsas rol oynayıblar.
Turning Point USA, 2016-cı ildə prezidentliyə namizədliyi zamanı Trampı həvəslə dəstəkləyib və Kirk kampaniya zamanı onun böyük oğlu, kiçik Donald Trampın şəxsi köməkçisi kimi xidmət edib.
Kirk, Trampın kampaniyası zamanı mütəmadi olaraq televiziyada prezidenti tərifləmək üçün çıxış edərək tanınan media şəxsiyyətinə çevrilib. NBC News-un məlumatına görə, təşkilat hazırda 800-dən çox universitet bölməsinə malikdir və Birləşmiş Ştatlarda təxminən 4000 orta məktəb və kollec kampuslarında mövcuddur.
Senator Mayk Li deyir ki, " hətta onlarla razılaşmadıqda, hətta onlar ona qışqıranda belə Çarli Kirk digər insanlara həqiqi ədəb və hörmət göstərib. Onun nifrətə nifrət və ya hörmətdən başqa bir şeylə cavab verdiyini xatırlamıram".
Son məlumata əsasən,Tramp özünün Truth Social sosial şəbəkəsində matəm əlaməti olaraq ölkədə bayraqların dörd gün ərzində yarıya endirilməsini əmr etdiyini açıqlayıb.
Qətldən bir neçə saat sonra FTB direktoru Keş Patel bir adamın cinayətə görə həbs edildiyini açıqlasa da, üç saat keçdikdə X şəbəkəsində həmin şəxsin sorğu-sualdan sonra sərbəst buraxıldığını bildirib.
Bir müddət sonra, Yuta ştatının İctimai Təhlükəsizlik Departamenti Kirkın qətlindən sonra iki nəfərin həbs edildiyini, lakin onların cinayətlə əlaqəsi olmadığı müəyyən edildikdən sonra hər ikisinin sərbəst buraxıldığını açıqlayıb.
Departamentin bəyanatında həmçinin deyilir ki, axtarılan qatil yaxınlıqdakı binanın damından Kirkə atəş açıb.
Yuta qubernatoru, respublikaçı Spenser Koks qətlin siyasi motivli olduğunu bildirib: “Bu, dövlətimiz üçün qara gündür. Bu, ölkəmiz üçün faciəli gündür. Mən aydın şəkildə bəyan etmək istəyirəm: bu, siyasi sui-qəsddir”.
Rizvan CƏFƏROV,
“Azərbaycan”
