ABŞ senatoru Bob Menendes və arvadı Nadin Arslanyan rüşvətxorluqda ittiham olunurlar

Amerikalı demokrat senator, Azərbaycanın qatı düşməni, Ermənistanın "Dostluq" ordenini alan və Rusiyanın "qara siyahısı"nın fiqurantı Robert Menendes Misir hakimiyyətinə xidmət müqabilində yüz minlərlə dollar rüşvət almaqda rəsmən 
ittiham olunur.
ABŞ Ədliyyə Nazirliyi elan edib ki, 2006-cı ildən Nyu Cersi ştatını Senatda təmsil edən Menendes Misir hakimiyyətinin xeyrinə olan hərəkətlər müqabilində külli məbləğdə rüşvət alıb.
Müstəntiqlər iddia edirlər ki, senator Menendes və erməni arvadı Nadin Arslanyan üç iş adamından rüşvət qismində nağd pul, qızıl külçələr, ev krediti ödənişləri və lüks avtomobil alıblar.
İttiham aktına əsasən, iş adamları Vael Hana, Xose Uribe və Fred Deybs Menendesə senator kimi nüfuzundan istifadə edərək onları qorumaq və həmçinin "Misir Ərəb Respublikasına faydalı işlər görmək" üçün pul ödəyiblər.
ABŞ Ədliyyə Nazirliyi təxminən bir il "Menendes işi" ilə bağlı araşdırma aparıb. Məlumata görə, ötən il senatorun evində axtarış aparılıb və bu zaman zərflərə qoyularaq paltarlarda, şkaflarda və seyfdə gizlədilmiş 480 min dollardan çox nağd pul aşkar edilib. Bundan əlavə, müstəntiqlər evdə 100 min dollar dəyərində qızıl külçələr aşkar ediblər. Müstəntiqlərin dediyinə görə, Xose Uribenin pulunu ödədiyi lüks avtomobil Mercedes-Benz kabrioleti qarajda aşkar edilib. Bütün bu tapıntılar, Ədliyyə Nazirliyinin fikrincə, senator Menendes tərəfindən rüşvətxorluğun sübutudur.
Nyu Yorkun cənub bölgəsinin prokuroru Damian Uilyamsın bildirdiyinə görə,  senator rüşvəti arvadının vasitəsilə alıb. Müstəntiqlərin fikrincə, Menendes avtomobili Xose Uribenin yoldaşlarından birini cinayət təqibindən xilas etdiyi üçün alıb.
İttihamnamədə deyilir ki, senatorun həyat yoldaşı Nadin Arslanyan adıçəkilən üç iş adamından biri, əslən misirli Vael Hana ilə birlikdə Menendesi Misir ordusu və kəşfiyyatının nümayəndələri ilə tanış edib.
Vael Hana və Nadin Arslanyan minlərlə mətn mesaj mübadiləsi aparıblar. Nadin daha sonra onları telefonundan silib.
İttihama görə, Nadin Arslanyan və Vael Hana tərəfindən təşkil edilən təmasların məqsədi hərbi tədarüklər və ABŞ-nin hərbi yardımı sahəsində Misirin maraqları üçün senatorun lobbiçilik etməsi olub.
69 yaşlı Bob Menendes  səkkiz il əvvəl də  rüşvətxorluqda ittiham olunub.
Lakin o vaxt andlılar heyətinin sayəsində onun barəsində həbs cəzası hökmü çıxarılmayıb.
Arvadı erməni olan Bob Menendes Konqresin Ermənistan məsələləri üzrə parlament qrupunun üzvü olub və ötən il bu ölkənin maraqlarını təbliğ etdiyinə görə Ermənistanın "Dostluq" ordeni ilə təltif edilib. Yalnız ordenləmi? Ümid edirik ki, bu suala ABŞ femidası ədalətli araşdırması ilə aydınlıq gətirəcək.

Rizvan CƏFƏROV,
"Azərbaycan"